Scripture Library

Shatapatha Brahmana · Chapter 5.3.3

5.3.3.5.3.3.1

५.३.३ dīkṣaṇīyayāgāḥ
sa vai dīkṣate / sa upavasathe'gnīṣomīyaṃ paśumālabhate tasya vapayā pracaryāgnīṣomīyamekādaśakapālaṃ puroḍāśaṃ nirvapati tadanu devasvāṃ havīṃṣi nirupyante -

5.3.3.5.3.3.2

savitre satyaprasavāya / dvādaśakapālaṃ vāṣṭākapālaṃ vā puroḍāśaṃ nirvapati plāśukānāṃ vrīhīṇāṃ savitā vā devānāṃ prasavitā savitṛprasūtaḥ sūyā ityatha yatplāśukānāṃ vrīhīṇāṃ kṣipre mā prasuvāniti -

5.3.3.5.3.3.3

athāgnaye gṛhapataye / aṣṭākapālaṃ puroḍāśaṃ nirvapatyāśūnāṃ śrīrvai gārhapataṃ yāvato yāvata īṣṭe tadenamagnireva gṛhapatirgārhapatamabhi pariṇayatyatha yadāśūnāṃ kṣipre mā pariṇayāniti -

5.3.3.5.3.3.4

atha somāya vanaspataye / śyāmākaṃ caruṃ nirvapati tadenaṃ soma eva vanaspatiroṣadhibhyaḥ suvatyatha yacchyāmāko bhavatyete vai somasyauṣadhīnāṃ pratyakṣatamāṃ yacchyāmākāstasmācchyāmāko bhavati -

5.3.3.5.3.3.5

atha bṛhaspataye vāce / naivāraṃ caruṃ nirvapati tadenaṃ bṛhaspatireva vāce suvatyatha yannaivāro bhavati brahma vai bṛhaspatirete vai brahmaṇā pacyante yannīvārāstasmānnaivāro bhavati -

5.3.3.5.3.3.6

athendrāya jyeṣṭhāya / hāyanānāṃ caruṃ nirvapati tadenamindra eva jyeṣṭho jyaiṣṭhyamabhi pariṇayatyatha yaddhāyanānāṃ bhavatyatiṣṭhā vā etā oṣadhayoyaddhāyanā atiṣṭho vā indrastasmāddhāyanānāṃ bhavati -

5.3.3.5.3.3.7

atha rudrāya paśupataye / raudraṃ gāvedhukaṃ caruṃ nirvapati tadenaṃ rudra eva paśupatiḥ paśubhyaḥ suvatyatha yadgāvedhuko bhavati vāstavyo vā eṣa devo vāstavyā gavedhukāstasmādgāvedhuko bhavati -

5.3.3.5.3.3.8

atha mitrāya satyāya / nāmbānāṃ caruṃ nirvapati tadenaṃ mitra eva satyo brahmaṇe suvatyatha yannāmbānāṃ bhavati varuṇyā vā etā oṣadhayo yāḥ kṛṣṭe jāyante'thaite maitrā yannāmbāstasmānnāmbānāṃ bhavati -

5.3.3.5.3.3.9

atha varuṇāya dharmapataye / vāruṇaṃ yavamayaṃ caruṃ nirvapati tadenaṃ varuṇa eva dharmapatirdharmasya patiṃ karoti paramatā vai sā yo dharmasya patirasadyo hi paramatāṃ gacchati taṃ hi dharma upayanti tasmādvaruṇāya dharmapataye -

5.3.3.5.3.3.10

athāgnīṣomīyena puroḍāśena pracarati / tasyāniṣṭa eva sviṣṭakṛdbhavatyathaitairhavirbhiḥ pracarati yadaitairhavirbhiḥ pracarati -

5.3.3.5.3.3.11

athainaṃ dakṣiṇe bāhāvabhipadya japati / savitā tvā savānāṃ suvatāmagnirgṛhapatīnāṃ somo vanaspatīnāṃ bṛhaspatirvāca indro jyaiṣṭhyāya rudraḥ paśubhyo mitraḥ satyo varuṇo dharmapatīnām -

5.3.3.5.3.3.12

imaṃ devāḥ / asapatnaṃ suvadhvamitīmaṃ devā abhrātṛvyaṃ suvadhvamityevaitadāha mahate kṣatrāya mahate jyaiṣṭhyāyeti nātra tirohitamivāsti mahate jānarājyāyeti mahate janānāṃ rājyāyetyevaitadāhendrasyendriyāyeti vīryāyetyevaitadāha yadāhendrasyendriyāyetīmamamuṣyai putramamuṣyai putramiti tadyadevāsya janma tata evaitadāhāsyai viśa iti yasyai viśo rājā bhavatyeṣa vo'mī rājā somo'smākaṃ brāhmaṇānāṃ rājeti tadasmā idaṃ sarvamādyaṃ karoti brāhmaṇamevāpoddharati tasmādbrāhmaṇo'nādyaḥ somarājā hi bhavati -

5.3.3.5.3.3.13

etā ha vai devāḥ savasyeśate / tasmāddevasvo nāma tadenametā eva devatāḥ suvate tābhiḥ sūtaḥ śvaḥ sūyate -

5.3.3.5.3.3.14

tā vai dvināmnyo bhavanti / dvandvaṃ vai vīryaṃ vīryavatyaḥ suvāntā iti tasmāddvināmnyo bhavanti -

5.3.3.5.3.3.15

athāhāgnaye sviṣṭakṛte'nubrūhīti / tadyadantareṇāhutī etatkarma kriyata eṣa vai prajāpatirya eṣa yajñastāyate yasmādimāḥ prajāḥ prajātā etamvevāpyetarhyanuprajāyante tadenaṃ madhyata evaitasya prajāpaterdadhāti madhyataḥ suvati tasmādantareṇāhutī etatkarma kriyata āśrāvyāhāgnaye sviṣṭakṛte preṣyeti vaṣaṭkṛte juhoti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0