Scripture Library

Shatapatha Brahmana · Chapter 5.1.3

5.1.3.5.1.3.1

५.१.३ paśutantram
āgneyamagniṣṭoma'ālabhate / agnirvā agniṣṭomo'gniṣṭomamevaitenojjayatyaindrāgnamukthebhya ālabhata aindrāgnāni vā'ukthyānyukthānyevaitenojjayatyaindraṃ ṣoḍaśina'ālabhata indro vai ṣoḍaśī ṣoḍaśinamevaitenojjayati -

5.1.3.5.1.3.2

sārasvataṃ saptadaśāya stotrāyālabhate / tadetadanatirātre sati rātre rūpaṃ kriyate prajāpatiṃ vā eṣa ujjayati yo vājapeyena yajate saṃvatsaro vai prajāpatistadetena sārasvatena rātrimujjayati tasmādetadanatirātre sati rātre rūpaṃ kriyate -

5.1.3.5.1.3.3

atha marudbhya ujjeṣebhyaḥ / vaśāṃ pṛśnimālabhata iyaṃ vai vaśā pṛśniryadidamasyāṃ mūli cāmūlaṃ cānnādyaṃ pratiṣṭhitaṃ teneyaṃ vaśā pṛśnirannaṃ vā eṣa ujjayati yo vājapeyena yajate'nnapeyaṃ ha vai nāmaitadyadvājapeyaṃ viśo vai maruto'nnaṃ vai viśa ujjeṣebhya ityujjityā eva durvede ujjeṣavatyau yājyānuvākye yadyujjeṣavatyau na vindedapi ye eva ke ca mārutyau syātāṃ durvedo eva vaśāpṛśniryadi vaśāṃ pṛśni na vindedapi yaiva kā ca vaśā syāt -

5.1.3.5.1.3.4

tasyā āvṛt / yatra hotā māhendraṃ grahamanuśaṃsati tadasyai vapayā pracareyureṣa vā indrasya niṣkevalyo graho yanmāhendro'pyasyaitanniṣkevalyameva stotraṃ niṣkevalyaṃ śastramindro vai yajamānastanmadhyata evaitadyajamāne vīryaṃ dadhāti tasmādasyā atra vapayā pracareyuḥ -

5.1.3.5.1.3.5

dvedhāvadānāni śrapayanti / tato'rddhānāṃ juhvāmupastīrya dvirdviravadyati sakṛdabhighārayati pratyanaktyavadānānyathopabhṛti sakṛtsakṛdavadyati dvirabhighārayati na pratyanaktyavadānāni tadyadarddhānāṃ dvirdviravadyati tathaiṣā kṛtsnā bhavatyatha yadetaiḥ pracarati tena daivīṃ viśamujjayatyathārddhāni mānuṣyai viśa upaharati teno mānuṣīṃ viśamujjayati -

5.1.3.5.1.3.6

tadu tathā na kuryāt / hvalati vā eṣa yo yajñapathādetyeti vā eṣa yajñapathādya evaṃ karoti tasmādyatraivaitareṣāṃ paśūnāṃ vapābhiḥ pracaranti tadevaitasyai vapayā pracareyurekadhāvadānāni śrapayanti na mānuṣyai viśa upaharanti -

5.1.3.5.1.3.7

atha saptadaśa prājāpatyānpaśūnālabhate / te vai sarve tūparā bhavanti sarve śyāmāḥ sarve muṣkarāḥ prajāpatiṃ vā eṣa ujjayati yo vājapeyena yajate'nnaṃ vai prajāpatiḥ paśurvā annaṃ tatprajāpatimujjayati somo vai prajāpatiḥ paśurvai pratyakṣaṃ somastatpratyakṣaṃ prajāpatimujjayati saptadaśa bhavanti saptadaśo vai prajāpatistatprajāpatimujjayati -

5.1.3.5.1.3.8

te vai sarve tūparā bhavanti / puruṣo vai prajāpaternediṣṭhaṃ so'yaṃ tūparo'viṣāṇastūparo vā aviṣāṇaḥ prajāpatiḥ prājāpatyā ete tasmātsarve tūparā bhavanti -

5.1.3.5.1.3.9

sarve śyāmāḥ / dve vai śyāmasya rūpe śuklaṃ caiva loma kṛṣṇaṃ ca dvandvaṃ vai mithunaṃ prajananaṃ prajananaṃ prajāpatiḥ prājāpatyā ete tasmātsarve śyāmā bhavanti -

5.1.3.5.1.3.10

sarve muṣkarāḥ / prajananaṃ vai muṣkaraḥ prajananaṃ prajāpatiḥ prājāpatyā ete tasmātsarve muṣkarā bhavanti durvedā evaṃ samṛddhāḥ paśavo yadyevaṃ samṛddhānna vindedapi katipayā evaivaṃ samṛddhāḥ syuḥ sarvamu hyevedaṃ prajāpatiḥ -

5.1.3.5.1.3.11

taddhaike / vāca uttamamālabhante yadi vai prajāpateḥ paramasti vāgeva tadetadvācamujjayāma iti vadantastadu tathā na kuryātsarvaṃ vā idamprajāpatiryadime lokā yadidaṃ kiṃ ca sā yadevaiṣu lokeṣu vāgvadati tadvācamujjayati tasmādu tannādriyeta -

5.1.3.5.1.3.12

teṣāmāvṛt / yatra maitrāvaruṇo vāmadevyamanuśaṃsati tadeṣāṃ vapābhiḥ pracareyuḥ prajananaṃ vai vāmadevyaṃ prajananaṃ prajāpatiḥ prājāpatyā ete tasmādeṣāṃ vapābhiratra pracareyuḥ -

5.1.3.5.1.3.13

atheṣṭā anuyājā bhavanti / avyūḍhe srucāvathaiṣāṃ havirbhiḥ pracaranti so'nto'nto vai prajāpatistadantata evaitatprajāpatimujjayatyatha yatpurā pracaredyathā yamadhvānameṣyantsyāttaṃ gatvā sa kva tataḥ syādevaṃ tattasmādeṣāmatra havirbhiḥ pracaranti -

5.1.3.5.1.3.14

tadu tathā na kuryāt / hvalati vā eṣa yo yajñapathādetyeti vā eṣa yajñapathādya evaṃ karoti tasmādyatraivetareṣāṃ paśūnāṃ vapābhiḥ pracaranti tadevaiteṣāṃ vapābhiḥ pracareyuryatraivetareṣāṃ paśūnāṃ havirbhiḥ pracaranti tadevaiteṣāṃ haviṣā pracareyurekānuvākyā ekā yājyaikadevatyā hi prajāpataya ityupāṃśūktvā cchāgānāṃ haviṣo'nubrūhīti prajāpataya ityupāṃśūktvā cchāgānāṃ haviḥ prasthitaṃ preṣyeti vaṣaṭkṛte juhoti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0