Shatapatha Brahmana · Chapter 4.6.4

athāto mahāvratīyasyaiva / prajāpaterha vai prajāḥ sasṛjānasya parvāṇi visasraṃsuḥ sa visrastaiḥ parvabhirna śaśāka saṃhātuṃ tato devā arcantaḥ śrāmyantaścerusta etammahāvratīyaṃ dadṛśustamasmā agṛhṇastenāsya parvāṇi samadadhuḥ -

sa saṃhitaiḥ parvabhiḥ / idamannādyamabhyuttasthau yadidaṃ prajāpaterannādyaṃ yadvai manuṣyāṇāmaśanaṃ taddevānāṃ vrataṃ mahadvā idaṃ vratamabhūdyenāyaṃ samahāsteti tasmānmahāvratīyo nāma -

evaṃ vā ete bhavanti / ye saṃvatsaramāsate yathaiva tatprajāpatiḥ prajāḥ sasṛjāna āsītsa
yathaiva tatprajāpatiḥ saṃvatsare'nnādyamabhyudatiṣṭhadevamevaita etatsaṃvatsare'nnādyamabhyuttiṣṭhanti yeṣāmevaṃ viduṣāmetaṃ grahaṃ gṛhṇanti -

taṃ vā indrāyaiva vimṛdhe gṛhṇīyāt / sarvā vai teṣāṃ mṛdho hatā bhavanti sarvaṃjitaṃ ye saṃvatsaramāsate tasmādvimṛdhe vi na indra mṛdho jahi nīcā yaccha pṛtanyataḥ / yo asmānabhidāsatyadharaṃ gamayā tamaḥ / upayāmagṛhīto'sīndrāya tvā vimṛdha eṣa te yonirindrāya tvā vimṛdha iti -

atho viśvakarmaṇe / viśvaṃ vai teṣāṃ karma kṛtaṃ sarvaṃ jitaṃ bhavati ye saṃvatsaramāsate tasmādviśvakarmaṇe vācaspatiṃ viśvakarmāṇamūtaye manojuvaṃ vāje adyā huvema / sa no viśvāni havanāni joṣadviśvaśambhūravase sādhukarmā upayāmagṛhīto'sīndrāya tvā viśvakarmaṇa eṣa te yonirindrāya tvā viśvakarmaṇa iti -

yadyu aindrīṃ vaiśvakarmaṇīṃ vidyāt / tathaiva gṛhṇīyādviśvakarmanhaviṣā vardhanena trātāramindramakṛṇoravadhyam / tasmai viśaḥ samanamanta pūrvīrayamugro vihavyo yathāsat / upayāmagṛhīto'sīndrāya tvā viśvakarmaṇa eṣa te yonirindrāya tvā viśvakarmaṇa iti
-