Scripture Library

Shatapatha Brahmana · Chapter 4.5.5

4.5.5.4.5.5.1

eṣa vai prajāpatiḥ / ya eṣa yajñastāyate yasmādimāḥ prajāḥ prajātā etamvevāpyetarhyanu prajāyante -

4.5.5.4.5.5.2

upāṃśupātramevānvajāḥ prajāyante / tadvai tatpunaryajñe prayujyate tasmādimāḥ prajāḥ punarabhyāvartaṃ prajāyante -

4.5.5.4.5.5.3

antaryāmapātramevānvavayaḥ prajāyante / tadvai tatpunaryajñe prayujyate tasmādimāḥ prajāḥ punarabhyāvartaṃ prajāyante -

4.5.5.4.5.5.4

atha yadetayorubhayoḥ / saha satorupāṃśu pūrvaṃ juhoti tasmādu saha sato'jāvikasyobhayasyaivājāḥ pūrvā yantyanūcyo'vayaḥ -

4.5.5.4.5.5.5

atha yadupāṃśuṃ hutvā / ūrdhvamunmārṣṭi tasmādimā ajā arāḍītarā ākramamāṇā iva yanti -

4.5.5.4.5.5.6

atha yadantaryāmaṃ hutvā / avāñcamavamārṣṭi tasmādimā avayo'vācīnaśīrṣṇyaḥ khanantya iva yantyetā vai prajāpateḥ pratyakṣatamāṃ yadajāvayastasmādetāstriḥ saṃvatsarasya vijāyamānā dvau trīniti janayanti -

4.5.5.4.5.5.7

śukrapātramevānu manuṣyāḥ prajāyante / tadvai tatpunaryajñe prayujyate tasmādimāḥ prajāḥ punarabhyāvartaṃ prajāyanta eṣa vai śukro ya eṣa tapatyeṣa u evendraḥ puruṣo vai paśūnāmaindrastasmātpaśūnāmīṣṭe -

4.5.5.4.5.5.8

ṛtupātramevānvekaśaphaṃ prajāyate / tadvai tatpunaryajñe prayujyate tasmādimāḥ prajāḥ punarabhyāvartaṃ prajāyanta itīva vā ṛtupātramitīvaikaśaphasya śira āgrayaṇapātramukthyapātramādityapātrametānyevānu gāvaḥ prajāyante tāni vai tāni punaryajñe prayujyante tasmādimāḥ prajāḥ punarabhyāvartaṃ prajāyante -

4.5.5.4.5.5.9

atha yadajāḥ / kaniṣṭhāni pātrāṇyanu prajāyante tasmādetāstriḥ saṃvatsarasya vijāyamānā dvau trīniti janayantyaḥ kaniṣṭhāḥ kaniṣṭhāni hi pātrāṇyanu prajāyante -

4.5.5.4.5.5.10

atha yadgāvaḥ / bhūyiṣṭhāni pātrāṇyanu prajāyante tasmādetāḥ sakṛtsaṃvatsarasya vijāyamānā ekaikaṃ janayantyo bhūyiṣṭhā bhūyiṣṭhāni hi pātrāṇyanu prajāyante -

4.5.5.4.5.5.11

atha droṇakalaśe / antato hāriyojanaṃ grahaṃ gṛhṇāti prajāpatirvai droṇakalaśaḥ sa imāḥ prajā upāvartate tā avati tā abhijighratyetadvā enā bhavati yadenāḥ prajanayati -

4.5.5.4.5.5.12

pañca ha tveva tāni pātrāṇi / yānīmāḥ prajā anu prajāyante samānamupāṃśvantaryāmayoḥ śukrapātramṛtupātramāgrayaṇapātramukthyapātrampañca vā ṛtavaḥ saṃvatsarasya saṃvatsaraḥ prajāpatiḥ prajāpatiryajño yadyu ṣaḍevartavaḥ saṃvatsarasyetyādityapātramevaiteṣāṃ ṣaṣṭham -

4.5.5.4.5.5.13

ekaṃ ha tveva tatpātram / yadimāḥ prajā anu prajāyanta upāṃśupātrameva prāṇo hyupāṃśuḥ prāṇo hi prajāpatiḥ prajāpatiṃ hyevedaṃ sarvamanu -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0