Shatapatha Brahmana · Chapter 4.5.4

४.५.४ atigrāhyāgrahāḥ
sarve ha vai devāḥ / agre sadṛśā āsuḥ sarve puṇyāsteṣāṃ sarveṣāṃ sadṛśānāṃ sarveṣāmpuṇyānāṃ trayo'kāmayantātiṣṭhāvānaḥ syāmetyagnirindraḥ sūryaḥ -

te'rcantaḥ śrāmyantaśceruḥ / ta etānatigrāhyāndadṛśustānatyagṛhṇata tadyadenānatyagṛhṇata tasmādatigrāhyā nāma te'tiṣṭhāvāno'bhavanyathaita etadatiṣṭhevātiṣṭheva ha vai bhavati yasyaivaṃ viduṣa etāngrahāngṛhṇanti -

no ha vā idamagre'gnau varca āsa / yadidamasminvarcaḥ so'kāmayatedaṃ mayi varcaḥ syāditi sa etaṃ grahamapaśyattamagṛhṇīta tato'sminnetadvarca āsa -

no ha vā idamagra indra oja āsa / yadidamasminnojaḥ so'kāmayatedaṃ mayyojaḥsyāditi sa etaṃ grahamapaśyattamagṛhṇīta tato'sminnetadoja āsa -

no ha vā idamagre sūrye bhrāja āsa / yadidamasminbhrājaḥ so'kāmayatedaṃ mayi bhrājaḥ syāditi sa etaṃ grahamapaśyattamagṛhṇīta tato'sminnetadbhrāja āsaitāni ha vai tejāṃsyetāni vīryāṇyātmandhatte yasyaivaṃ viduṣa etāngrahān gṛhṇanti -

tānvai prātaḥsavane gṛhṇīyāt / āgrayaṇaṃ gṛhītvātmā vā āgrayaṇo bahu vā idamātmana ekaikamatiriktaṃ kloma hṛdayaṃ tvadyattvat -

mādhyandine vaināntsavane gṛhṇīyāt / ukthyaṃ gṛhītvopākariṣyanvā pūtabhṛto'yaṃ ha vā asyaiṣo'nirukta ātmā yadukthyaḥ so eṣā mīmāṃsaiva prātaḥsavana evaināngṛhṇīyādāgrayaṇaṃ gṛhītvā -

te māhendrasyaivānu homaṃ hūyante / eṣa vā indrasya niṣkevalyo graho yanmāhendro'pyasyaitanniṣkevalyameva stotraṃ niṣkevalyaṃ śastramindro vai yajamāno yajamānasya vā ete kāmāya gṛhyante tasmānmāhendrasyaivānu homaṃ hūyante -

athāto gṛhṇātyeva / agne pavasva svapā asme varcaḥ suvīryaṃ dadhadrayiṃ mayi poṣamupayāmagṛhīto'syagnaye tvā varcasa eṣa te yoniragnaye tvā varcase -

uttiṣṭhannojasā / saha pītvī śipre avepayaḥ somamindra camūsutamupayāmagṛhīto'sīndrāya tvaujasa eṣa te yonirindrāya tvaujase -

adṛśramasya ketavaḥ / vi raśmayo janāṃ anu bhrājanto agnayo yathā upayāmagṛhīto'si sūryāya tvā bhrājāyaiṣa te yoniḥ sūryāya tvā bhrājāyeti -

teṣāṃ bhakṣaḥ / agne varcasvinvarcasvāṃstvaṃ deveṣvasi varcasvānahammanuṣyeṣu bhūyāsamindraujiṣṭhaujiṣṭhastvaṃ deveṣvasyojiṣṭho'hammanuṣyeṣu bhūyāsaṃ sūrya bhrājiṣṭha bhrājiṣṭhastvaṃ deveṣvasi bhrājiṣṭho'hammanuṣyeṣu bhūyāsamityetāni ha vai bhrājāṃsyetāni vīryāṇyātmandhatte yasyaivaṃviduṣa etāngrahān gṛhṇanti -

tānvai pṛṣṭhye ṣaḍahe gṛhṇīyāt / pūrve tryaha āgneyameva prathame'hannaindraṃ dvitīye sauryaṃ tṛtīya evamevānvaham -

tānu haika uttare tryahe gṛhṇanti / tadu tathā na kuryātpūrva evaināṃstryahe gṛhṇīyādyadyuttare tryahe grahīṣyantsyātpūrva evaināṃstryahe gṛhītvāthottare tryahe gṛhṇīyādevameva yathāpūrvaṃ viśvajiti sarvapṛṣṭha ekāha eva gṛhyante -