શતપથબ્રાહ્મણમ્ · અધ્યાય 4.5.4

૪.૫.૪ અતિગ્રાહ્યાગ્રહાઃ
સર્વે હ વૈ દેવાઃ । અગ્રે સદૃશા આસુઃ સર્વે પુણ્યાસ્તેષાં સર્વેષાં સદૃશાનાં સર્વેષામ્પુણ્યાનાં ત્રયોઽકામયન્તાતિષ્ઠાવાનઃ સ્યામેત્યગ્નિરિન્દ્રઃ સૂર્યઃ -

તેઽર્ચન્તઃ શ્રામ્યન્તશ્ચેરુઃ । ત એતાનતિગ્રાહ્યાન્દદૃશુસ્તાનત્યગૃહ્ણત તદ્યદેનાનત્યગૃહ્ણત તસ્માદતિગ્રાહ્યા નામ તેઽતિષ્ઠાવાનોઽભવન્યથૈત એતદતિષ્ઠેવાતિષ્ઠેવ હ વૈ ભવતિ યસ્યૈવં વિદુષ એતાન્ગ્રહાન્ગૃહ્ણન્તિ -

નો હ વા ઇદમગ્રેઽગ્નૌ વર્ચ આસ । યદિદમસ્મિન્વર્ચઃ સોઽકામયતેદં મયિ વર્ચઃ સ્યાદિતિ સ એતં ગ્રહમપશ્યત્તમગૃહ્ણીત તતોઽસ્મિન્નેતદ્વર્ચ આસ -

નો હ વા ઇદમગ્ર ઇન્દ્ર ઓજ આસ । યદિદમસ્મિન્નોજઃ સોઽકામયતેદં મય્યોજઃસ્યાદિતિ સ એતં ગ્રહમપશ્યત્તમગૃહ્ણીત તતોઽસ્મિન્નેતદોજ આસ -

નો હ વા ઇદમગ્રે સૂર્યે ભ્રાજ આસ । યદિદમસ્મિન્ભ્રાજઃ સોઽકામયતેદં મયિ ભ્રાજઃ સ્યાદિતિ સ એતં ગ્રહમપશ્યત્તમગૃહ્ણીત તતોઽસ્મિન્નેતદ્ભ્રાજ આસૈતાનિ હ વૈ તેજાંસ્યેતાનિ વીર્યાણ્યાત્મન્ધત્તે યસ્યૈવં વિદુષ એતાન્ગ્રહાન્ ગૃહ્ણન્તિ -

તાન્વૈ પ્રાતઃસવને ગૃહ્ણીયાત્ । આગ્રયણં ગૃહીત્વાત્મા વા આગ્રયણો બહુ વા ઇદમાત્મન એકૈકમતિરિક્તં ક્લોમ હૃદયં ત્વદ્યત્ત્વત્ -

માધ્યન્દિને વૈનાન્ત્સવને ગૃહ્ણીયાત્ । ઉક્થ્યં ગૃહીત્વોપાકરિષ્યન્વા પૂતભૃતોઽયં હ વા અસ્યૈષોઽનિરુક્ત આત્મા યદુક્થ્યઃ સો એષા મીમાંસૈવ પ્રાતઃસવન એવૈનાન્ગૃહ્ણીયાદાગ્રયણં ગૃહીત્વા -

તે માહેન્દ્રસ્યૈવાનુ હોમં હૂયન્તે । એષ વા ઇન્દ્રસ્ય નિષ્કેવલ્યો ગ્રહો યન્માહેન્દ્રોઽપ્યસ્યૈતન્નિષ્કેવલ્યમેવ સ્તોત્રં નિષ્કેવલ્યં શસ્ત્રમિન્દ્રો વૈ યજમાનો યજમાનસ્ય વા એતે કામાય ગૃહ્યન્તે તસ્માન્માહેન્દ્રસ્યૈવાનુ હોમં હૂયન્તે -

અથાતો ગૃહ્ણાત્યેવ । અગ્ને પવસ્વ સ્વપા અસ્મે વર્ચઃ સુવીર્યં દધદ્રયિં મયિ પોષમુપયામગૃહીતોઽસ્યગ્નયે ત્વા વર્ચસ એષ તે યોનિરગ્નયે ત્વા વર્ચસે -

ઉત્તિષ્ઠન્નોજસા । સહ પીત્વી શિપ્રે અવેપયઃ સોમમિન્દ્ર ચમૂસુતમુપયામગૃહીતોઽસીન્દ્રાય ત્વૌજસ એષ તે યોનિરિન્દ્રાય ત્વૌજસે -

અદૃશ્રમસ્ય કેતવઃ । વિ રશ્મયો જનાં અનુ ભ્રાજન્તો અગ્નયો યથા ઉપયામગૃહીતોઽસિ સૂર્યાય ત્વા ભ્રાજાયૈષ તે યોનિઃ સૂર્યાય ત્વા ભ્રાજાયેતિ -

તેષાં ભક્ષઃ । અગ્ને વર્ચસ્વિન્વર્ચસ્વાંસ્ત્વં દેવેષ્વસિ વર્ચસ્વાનહમ્મનુષ્યેષુ ભૂયાસમિન્દ્રૌજિષ્ઠૌજિષ્ઠસ્ત્વં દેવેષ્વસ્યોજિષ્ઠોઽહમ્મનુષ્યેષુ ભૂયાસં સૂર્ય ભ્રાજિષ્ઠ ભ્રાજિષ્ઠસ્ત્વં દેવેષ્વસિ ભ્રાજિષ્ઠોઽહમ્મનુષ્યેષુ ભૂયાસમિત્યેતાનિ હ વૈ ભ્રાજાંસ્યેતાનિ વીર્યાણ્યાત્મન્ધત્તે યસ્યૈવંવિદુષ એતાન્ગ્રહાન્ ગૃહ્ણન્તિ -

તાન્વૈ પૃષ્ઠ્યે ષડહે ગૃહ્ણીયાત્ । પૂર્વે ત્ર્યહ આગ્નેયમેવ પ્રથમેઽહન્નૈન્દ્રં દ્વિતીયે સૌર્યં તૃતીય એવમેવાન્વહમ્ -

તાનુ હૈક ઉત્તરે ત્ર્યહે ગૃહ્ણન્તિ । તદુ તથા ન કુર્યાત્પૂર્વ એવૈનાંસ્ત્ર્યહે ગૃહ્ણીયાદ્યદ્યુત્તરે ત્ર્યહે ગ્રહીષ્યન્ત્સ્યાત્પૂર્વ એવૈનાંસ્ત્ર્યહે ગૃહીત્વાથોત્તરે ત્ર્યહે ગૃહ્ણીયાદેવમેવ યથાપૂર્વં વિશ્વજિતિ સર્વપૃષ્ઠ એકાહ એવ ગૃહ્યન્તે -