Scripture Library

Shatapatha Brahmana · Chapter 4.2.2

4.2.2.4.2.2.1

४.२.२ āgrayaṇagrahaḥ
ātmā ha vā asyāgrayaṇaḥ / so'syaiṣa sarvameva sarvaṃ hyayamātmā tasmādanayā gṛhṇātyasyai hi sthālī bhavati sthālyā hyenaṃ gṛhṇāti sarvaṃ vā iyaṃ sarvameṣa grahastasmādanayā gṛhṇāti -

4.2.2.4.2.2.2

pūrṇaṃ gṛhṇāti / sarvaṃ vai pūrṇaṃ sarvameṣa grahastasmātpūrṇaṃ gṛhṇāti -

4.2.2.4.2.2.3

viśvebhyo devebhyo gṛhṇāti / sarvaṃ vai viśve devāḥ sarvameṣa grahastasmādviśvebhyo devebhyo gṛhṇāti -

4.2.2.4.2.2.4

sarveṣu savaneṣu gṛhṇāti / sarvaṃ vai savanāni sarvameṣa grahastasmātsarveṣu savaneṣu gṛhṇāti -

4.2.2.4.2.2.5

sa yadi rājopadasyet / tamata eva tanvīrannataḥ prabhāvayeyurātmā vā āgrayaṇa ātmano vā imāni sarvāṇyaṅgāni prabhavantyetasmādantato hāriyojanaṃ grahaṃ gṛhṇāti tadātmanyevāsyāṃ pratiṣṭhāyāmantato yajñaḥ pratitiṣṭhati -

4.2.2.4.2.2.6

atha yasmādāgrayaṇo nāma / yāṃ vā amūṃ grāvāṇamādadāno vācaṃ yacchatyatra vai sāgre'vadattadyatsātrāgre'vadattasmādāgrayaṇo nāma -

4.2.2.4.2.2.7

rakṣobhyo vai tāṃ bhīṣā vācamayacchan / ṣaḍvā ataḥ prāco grahāngṛhṇātyathaiṣa saptamaḥ ṣaḍvā ṛtavaḥ saṃvatsarasya sarvaṃ vai saṃvatsaraḥ -

4.2.2.4.2.2.8

tāṃ devāḥ / sarvasminvijite'bhaye'nāṣṭre'trāgre vācamavadaṃstatho evaiṣa etāṃ sarvasminvijite'bhaye'nāṣṭre'trāgre vācaṃ vadati -

4.2.2.4.2.2.9

athāto gṛhṇātyeva / ye devāso divyekādaśa stha pṛthivyāmadhyekādaśa stha apsukṣito mahinaikādaśa stha te devāso yajñamimaṃ juṣadhvamupayāmagṛhīto'syāgrayaṇo'si svāgrayaṇa iti vācamevaitadayātayāmnīṃ karoti tasmādanayā samānaṃ sadviparyāsaṃ vadatyajāmitāyai jāmi ha kuryādyadāgrayaṇo'syāgrayaṇo'sīti gṛhṇīyāttasmādāhāgrayaṇo'si svāgrayaṇa iti -

4.2.2.4.2.2.10

pāhi yajñaṃ pāhi yajñapatimiti / vācamevaitadutsṛṣṭāmāha gopāya yajñamiti pāhi yajñapatimiti vācamevaitadutsṛṣṭāmāha gopāya yajamānamiti yajamāno hi yajñapatirviṣṇustvāmindriyeṇa pātu viṣṇuṃ tvaṃ pāhīti vācamevaitadutsṛṣṭāmāha yajño vai viṣṇuryajñastvāṃ vīryeṇa gopāyatviti viṣṇuṃ tvaṃ pāhīti vācamevaitadutsṛṣṭāmāha yajñaṃ tvaṃ gopāyetyabhi savanāni pāhīti tadetaṃ grahamāha sarvāṇi hyeṣa savanāni prati -

4.2.2.4.2.2.11

atha daśāpavitramupagṛhya hiṅkaroti / sā haiṣā vāganudyamānā tatāma tasyāṃ devā vāci tāntāyāṃ hiṅkāreṇaiva prāṇamadadhuḥ prāṇo vai hiṅkāraḥ prāṇo hi vai hiṅkārastasmādapigṛhya nāsike na hiṅkartuṃ śaknoti saitena prāṇena samajihīta yadā vai tāntaḥ prāṇaṃ labhate'tha sa saṃjihīte tatho evaiṣa etadvāci tāntāyāṃ hiṅkāreṇaiva prāṇaṃ dadhāti saitena prāṇena saṃjihīte triṣkṛtvo hiṅkaroti trivṛddhi yajñaḥ -

4.2.2.4.2.2.12

athāha somaḥ pavata iti / sa yāmevāmūṃ bhīṣā'surarakṣasebhyo na nirabruvaṃstāmevaitatsarvasminvijite'bhaye'nāṣṭre'tra nirāha tāmāviṣkaroti tasmādāha somaḥ pavata iti -

4.2.2.4.2.2.13

asmai brahmaṇe'smai kṣatrāyeti / tadbrahmaṇe ca kṣatrāya cāhāsmai sunvate yajamānāya pavata iti tadyajamānāyāha -

4.2.2.4.2.2.14

tadāhuḥ / etāvadevoktvā sādayedetāvadvā idaṃ sarvaṃ yāvadbrahma kṣatraṃ viḍindrāgnī vā idaṃ sarvaṃ tasmādetāvadevoktvā sādayediti -

4.2.2.4.2.2.15

tadu brūyādeva bhūyaḥ / iṣa ūrje pavata iti vṛṣṭyai tadāha yadāheṣa ityūrja iti yo vṛṣṭādūrgraso jāyate tasmai tadāhādbhya oṣadhībhyaḥ pavata iti tadadbhyaścauṣadhībhyaścāha dyāvāpṛthivībhyāṃ pavata iti tadābhyāṃ dyāvāpṛthivībhyāmāha yayoridaṃ sarvamadhi subhūtāya pavata iti sādhave pavata ityevaitadāha -

4.2.2.4.2.2.16

tadu haika āhuḥ / brahmavarcasāya pavata iti tadu tathā na brūyādyadvā āhāsmai brahmaṇa iti tadeva brahmavarcasāyāha viśvebhyastvā devebhya eṣa te yonirviśvebhyastvā devebhya iti sādayati viśvebhyo hyenaṃ devebhyo gṛhṇāti taṃ vai madhye sādayatyātmā hyasyaiṣa madhya iva hyayamātmā dakṣiṇokthyasthālī bhavatyuttarādityasthālī -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0