Shatapatha Brahmana · Chapter 3.8.5

so'tyupayajati / yajñaṃ gaccha svāhetyāpo vai yajña āpo reto reta evaitatsiñcati -

somaṃ gaccha svāheti / reto vai somo reta evaitatsiñcati -

divyaṃ nabho gaccha svāheti / āpo vai divyaṃ nabha āpo reto reta evaitatsiñcati -

agniṃ vaiśvānaraṃ gaccha svāheti / iyaṃ vai pṛthivyagnirvaiśvānaraḥ seyampratiṣṭhemāmevaitatpratiṣṭhāmabhiprajanayati -

atha mukhaṃ vimṛṣṭe / mano me hārdi yaccheti tatho hopayaṣṭātmānaṃ nānupravṛṇakti -

atha jāghanyā patnīḥ saṃyājayanti / jaghanārddho vai jāghanī jaghanārddhādvai yoṣāyai prajāḥ prajāyante tatpraivaitajjanayati yajjāghanyā patnīḥ saṃyājayanti -

antarato devānāṃ patnībhyo'vadyati / antarato vai yoṣāyai prajāḥ prajāyanta upariṣṭādagnaye gṛhapataya upariṣṭādvai vṛṣā yoṣāmadhidravati -

atha hṛdayaśūlenāvabhṛthaṃ yanti / paśorha vā ālabhyamānasya hṛdayaṃ śuksamabhyavaiti hṛdayāddhṛdayaśūlamatha yacchṛtasya paritṛndanti tadalaṃjuṣaṃ tasmādu paritṛdyaiva śūlākuryāttattriḥ pracyute paśau hṛdayaṃ pravṛhyottamampratyavadadhāti -

atha hṛdayaśūlaṃ prayacchati / tanna pṛthivyāṃ parāsyennāpsu sa yatpṛthivyāmparāsyedoṣadhīśca vanaspatīṃścaiṣā śukpraviśedyadapsu parāsyedapa eṣā śukpraviśettasmānna pṛthivyāṃ nāpsu -

apa evābhyavetya / yatra śuṣkasya cārdrasya ca saṃdhiḥ syāttadupagūhedyadyu 'abhyavāyanāya glāyedagreṇa yūpamudapātraṃ ninīya yatra śuṣkasya cārdrasya ca saṃdhirbhavati tadupagūhati nāpo nauṣadhīrhiṃsīriti tathā nāpo nauṣadhīrhinasti dhāmnodhāmno rājaṃstato varuṇa no muñca yadāhuraghnyā iti varuṇeti śapāmahe tato varuṇa no muñceti tadenaṃ sarvasmādvaruṇapāśātsarvasmādvaruṇyātpramuñcati -

athābhimantrayate / sumitriyā na āpa oṣadhayaḥ santu durmitriyāstasmai santu yo'smāndveṣṭi yaṃ ca vayaṃ dviṣma iti yatra vā etena pracarantyāpaśca ha vā asmāttāvadoṣadhayaścāpakramyeva tiṣṭhanti tadu tābhirmitradheyaṃ kurute tatho hainaṃ tāḥ punaḥ praviśantyeṣo tatra prāyaścittiḥ kriyate sa vai nāgnīṣomīyasya paśoḥ karoti nāgneyasya vaśāyā evānūbandhyāyai tāṃ hi sarvo'nu yajñaḥ saṃtiṣṭhata etadu hāsyāgnīṣomīyasya ca paśorāgneyasya ca hṛdayaśūlena caritaṃ bhavati yadvaśāyāścaranti -