શતપથબ્રાહ્મણમ્ · અધ્યાય 3.8.5

સોઽત્યુપયજતિ । યજ્ઞં ગચ્છ સ્વાહેત્યાપો વૈ યજ્ઞ આપો રેતો રેત એવૈતત્સિઞ્ચતિ -

સોમં ગચ્છ સ્વાહેતિ । રેતો વૈ સોમો રેત એવૈતત્સિઞ્ચતિ -

દિવ્યં નભો ગચ્છ સ્વાહેતિ । આપો વૈ દિવ્યં નભ આપો રેતો રેત એવૈતત્સિઞ્ચતિ -

અગ્નિં વૈશ્વાનરં ગચ્છ સ્વાહેતિ । ઇયં વૈ પૃથિવ્યગ્નિર્વૈશ્વાનરઃ સેયમ્પ્રતિષ્ઠેમામેવૈતત્પ્રતિષ્ઠામભિપ્રજનયતિ -

અથ મુખં વિમૃષ્ટે । મનો મે હાર્દિ યચ્છેતિ તથો હોપયષ્ટાત્માનં નાનુપ્રવૃણક્તિ -

અથ જાઘન્યા પત્નીઃ સંયાજયન્તિ । જઘનાર્દ્ધો વૈ જાઘની જઘનાર્દ્ધાદ્વૈ યોષાયૈ પ્રજાઃ પ્રજાયન્તે તત્પ્રૈવૈતજ્જનયતિ યજ્જાઘન્યા પત્નીઃ સંયાજયન્તિ -

અન્તરતો દેવાનાં પત્નીભ્યોઽવદ્યતિ । અન્તરતો વૈ યોષાયૈ પ્રજાઃ પ્રજાયન્ત ઉપરિષ્ટાદગ્નયે ગૃહપતય ઉપરિષ્ટાદ્વૈ વૃષા યોષામધિદ્રવતિ -

અથ હૃદયશૂલેનાવભૃથં યન્તિ । પશોર્હ વા આલભ્યમાનસ્ય હૃદયં શુક્સમભ્યવૈતિ હૃદયાદ્ધૃદયશૂલમથ યચ્છૃતસ્ય પરિતૃન્દન્તિ તદલંજુષં તસ્માદુ પરિતૃદ્યૈવ શૂલાકુર્યાત્તત્ત્રિઃ પ્રચ્યુતે પશૌ હૃદયં પ્રવૃહ્યોત્તમમ્પ્રત્યવદધાતિ -

અથ હૃદયશૂલં પ્રયચ્છતિ । તન્ન પૃથિવ્યાં પરાસ્યેન્નાપ્સુ સ યત્પૃથિવ્યામ્પરાસ્યેદોષધીશ્ચ વનસ્પતીંશ્ચૈષા શુક્પ્રવિશેદ્યદપ્સુ પરાસ્યેદપ એષા શુક્પ્રવિશેત્તસ્માન્ન પૃથિવ્યાં નાપ્સુ -

અપ એવાભ્યવેત્ય । યત્ર શુષ્કસ્ય ચાર્દ્રસ્ય ચ સંધિઃ સ્યાત્તદુપગૂહેદ્યદ્યુ ઽઅભ્યવાયનાય ગ્લાયેદગ્રેણ યૂપમુદપાત્રં નિનીય યત્ર શુષ્કસ્ય ચાર્દ્રસ્ય ચ સંધિર્ભવતિ તદુપગૂહતિ નાપો નૌષધીર્હિંસીરિતિ તથા નાપો નૌષધીર્હિનસ્તિ ધામ્નોધામ્નો રાજંસ્તતો વરુણ નો મુઞ્ચ યદાહુરઘ્ન્યા ઇતિ વરુણેતિ શપામહે તતો વરુણ નો મુઞ્ચેતિ તદેનં સર્વસ્માદ્વરુણપાશાત્સર્વસ્માદ્વરુણ્યાત્પ્રમુઞ્ચતિ -

અથાભિમન્ત્રયતે । સુમિત્રિયા ન આપ ઓષધયઃ સન્તુ દુર્મિત્રિયાસ્તસ્મૈ સન્તુ યોઽસ્માન્દ્વેષ્ટિ યં ચ વયં દ્વિષ્મ ઇતિ યત્ર વા એતેન પ્રચરન્ત્યાપશ્ચ હ વા અસ્માત્તાવદોષધયશ્ચાપક્રમ્યેવ તિષ્ઠન્તિ તદુ તાભિર્મિત્રધેયં કુરુતે તથો હૈનં તાઃ પુનઃ પ્રવિશન્ત્યેષો તત્ર પ્રાયશ્ચિત્તિઃ ક્રિયતે સ વૈ નાગ્નીષોમીયસ્ય પશોઃ કરોતિ નાગ્નેયસ્ય વશાયા એવાનૂબન્ધ્યાયૈ તાં હિ સર્વોઽનુ યજ્ઞઃ સંતિષ્ઠત એતદુ હાસ્યાગ્નીષોમીયસ્ય ચ પશોરાગ્નેયસ્ય ચ હૃદયશૂલેન ચરિતં ભવતિ યદ્વશાયાશ્ચરન્તિ -