Scripture Library

Shatapatha Brahmana · Chapter 2.6.3

2.6.3.2.6.3.1

२.६.३ śunāsīrīyaparva
akṣayyaṃ ha vai sukṛtaṃ cāturmāsyayājino bhavati / saṃvatsaraṃ hi jayati tenāsyākṣayyaṃ bhavati taṃ vai tredhā vibhajya yajati tredhā vibhajya prajayati sarvaṃ vai saṃvatsaraḥ sarvaṃ vā akṣayyameteno hāsyākṣayyaṃ sukṛtambhavatyṛturu haivaitadbhūtvā devānapyetyakṣayyamu vai devānāmeteno haivāsyākṣayyaṃ sukṛtaṃ bhavatyetannu tadyasmāccāturmāsyairyajate -

2.6.3.2.6.3.2

atha yasmācchunāsīryeṇa yajeta / yā vai devānāṃ śrīrāsītsākamedhairījānānāṃ vijigyānānāṃ tacchunamatha yaḥ saṃvatsarasya prajitasya rasa āsīttatsīraṃ sā yā caiva devānāṃ śrīrāsītsākamedhairījānānāṃ vijigyānānāṃ ya u ca saṃvatsarasya prajitasya rasa āsīttamevaitadubhayaṃ parigṛhyātman kurute tasmācchunāsīryeṇa yajate -

2.6.3.2.6.3.3

tasyāvṛt / nopakirantyuttaravediṃ na gṛhṇanti pṛṣadājyaṃ na manthantyagniṃ pañca prayājā bhavanti trayo'nuyājā ekaṃ samiṣṭayajuḥ -

2.6.3.2.6.3.4

athaitānyeva pañca havīṃṣi bhavanti / etairvai havirbhiḥ prajāpatiḥ prajā asṛjataitairubhayato varuṇapāśātprajāḥ prāmuñcadetairvai devā vṛtramaghnannetairveva vyajayanta yeyameṣāṃ vijitistāṃ tatho evaiṣa etairyā caiva devānāṃ śrīrāsītsākamedhairījānānāṃ vijigyānānāṃ ya u ca saṃvatsarasya prajitasya rasa āsīttamevaitadubhayaṃ parigṛhyātman kurute tasmādvā etāni pañca havīṃṣi bhavanti -

2.6.3.2.6.3.5

atha śunāsīryo dvādaśakapālaḥ puroḍāśo bhavati / sa bandhuḥ śunāsīryasya yampūrvamavocāma -

2.6.3.2.6.3.6

atha vāyavyaṃ payo bhavati / payo ha vai prajā jātā abhisaṃjānate vijigyānaṃ mā prajāḥ śriyai yaśase'nnādyāyābhisaṃjānāntā iti tasmātpayo bhavati -

2.6.3.2.6.3.7

tadyadvāyavyaṃ bhavati / ayaṃ vai vāyuryo'yaṃ pavata eṣa vā idaṃ sarvamprapyāyayati yadidaṃ kiṃ ca varṣati vṛṣṭādoṣadhayo jāyanta oṣadhīrjagdhvāpaḥ pītvā tata etadadbhyo'dhi payaḥ sambhavatyeṣa hi vā etajjanayati tasmādvāyavyambhavati -

2.6.3.2.6.3.8

atha saurya ekakapālaḥ puroḍāśo bhavati eṣa vai sūryo ya eṣa tapatyeṣa vā idaṃ sarvamabhigopāyati sādhunā tvadasādhunā tvadeṣa idaṃ sarvaṃ vidadhāti sādhau tvadasādhau tvadeṣa mā vijigyānaṃ prītaḥ sādhunā tvadabhigopāyatsādhau tvadvidadhaditi tasmātsaurya ekakapālaḥ puroḍāśo bhavati -

2.6.3.2.6.3.9

tasyāśvaḥ śveto dakṣiṇā / tadetasya rūpaṃ kriyate ya eṣa tapati yadyaśvaṃ śvetaṃ na vindedapi gaureva śvetaḥ syāttadetasya rūpaṃ kriyate ya eṣa tapati -

2.6.3.2.6.3.10

sa yatraiva sākamedhairyajate / tacchunāsīryeṇa yajeta yadvai triḥ saṃvatsarasya yajate tenaiva saṃvatsaramāpnoti tasmādyadaiva kadā caitena yajeta -

2.6.3.2.6.3.11

taddhaike / rātrīrāpipayiṣanti sa yadi rātrīrāpipayiṣedyadadaḥ purastātphālgunyai paurṇamāsyā uddṛṣṭaṃ tacchunāsīryeṇa yajeta -

2.6.3.2.6.3.12

atha dīkṣeta taṃ nānījānaṃ punaḥ phālgunī paurṇamāsyabhiparyeyātpunaḥ prayāgarūpa iva ha sa yadenamanījānaṃ punaḥ phālgunī paurṇamāsyabhiparyeyāttasmādenaṃ nānījānaṃ punaḥ phālgunī
paurṇamāsyabhiparyeyāditi nūtsṛjamānasya -

2.6.3.2.6.3.13

atha punaḥ prayuñjānasya / pūrvedyuḥ phālgunyai paurṇamāsyai śunāsīryeṇa yajetātha prātarvaiśvadevenātha paurṇamāsenaitadu punaḥ prayuñjānasya -

2.6.3.2.6.3.14

athātaḥ / parivartanasyaiva sarvatomukho vā asāvāditya eṣa vā idaṃ sarvaṃ nirdhayati yadidaṃ kiṃ ca śuṣyati tenaiṣa sarvatomukhastenānnādaḥ -

2.6.3.2.6.3.15

sarvatomukho'yamagniḥ / yato hyeva kutaścāgnāvabhyādadhati tata eva pradahati tenaiṣa sarvatomukhastenānnādaḥ -

2.6.3.2.6.3.16

athāyamanyatomukhaḥ puruṣaḥ / sa etatsarvatomukho bhavati yatparivartayate sa evamevānnādo bhavati yathaitāvetadya evaṃ vidvānparivartayate tasmādvai parivartayeta -

2.6.3.2.6.3.17

tadu hovācāsuriḥ / kiṃ nu tatra mukhasya yadapi sarvāṇyeva lomāni vapeta yadvai triḥ saṃvatsarasya yajate tenaiva sarvatomukhastenānnādastasmānnādriyeta parivartayitumiti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0