Shatapatha Brahmana · Chapter 2.5.4

२.५.४.
mahāhaviṣa ha vai devā vṛtraṃ jaghnuḥ / teno eva vyajayanta yeyameṣāṃ vijitistāṃ tatho evaiṣa etena pāpmānaṃ dviṣantaṃ bhrātṛvyaṃ hanti tatho eva vijayate tasmādvā eṣa etena yajate -

tasyāvṛt / upakirantyuttaravediṃ gṛhṇanti pṛṣadājyaṃ manthantyagniṃ navaprayājambhavati navānuyājaṃ trīṇi samiṣṭayajūṃṣi bhavantyathaitānyeva pañca havīṃṣi bhavanti -

sa yadāgneyo'ṣṭākapālaḥ puroḍāśo bhavati / agninā ha vā enaṃ tejasāghnantsa tejo'gnirnāvyathata tasmādāgneyo bhavati -

atha yatsaumyaścarurbhavati / somena ha vā enaṃ rājñāghnantsomarājāna eva tasmātsaumyaścarurbhavati -

atha yatsāvitraḥ / dvādaśakapālo vāṣṭākapālo vā puroḍāśo bhavati savitā vai devānāmprasavitā savitṛprasūtā haivainamaghnaṃstasmātsāvitro bhavati -

atha yatsārasvataścarurbhavati / vāgvai sarasvatī vāgu haivānumamāda prahara jahīti tasmātsārasvataścarurbhavati -

atha yatpauṣṇaścarurbhavati / iyaṃ vai pṛthivī pūṣeyaṃ haivainaṃ vadhāya pratipradadāvanayā haivainaṃ pratiprattaṃ jaghnustasmātpauṣṇaścarurbhavati -

athaindrāgnau dvādaśakapālaḥ puroḍāśo bhavati / etena haivainamaghnaṃstejo vā agnirindriyaṃ vīryamindra etābhyāmenamubhābhyāṃ vīryābhyāmaghnanbrahma vā agniḥ kṣatramindraste ubhe saṃrabhya brahma ca kṣatraṃ ca sayujau kṛtvā tābhyāmenamubhābhyāṃ vīryābhyāmaghnaṃstasmādaindrāgno dvādaśakapālaḥ puroḍāśo bhavati -

atha māhendraścarurbhavati / indro vā eṣa purā vṛtrasya vadhādatha vṛtraṃ hatvā yathā mahārājo vijigyāna evaṃ mahendro'bhavattasmānmāhendraścarurbhavati mahāntamu caivainametatkhalu karoti vṛtrasya vadhāya tasmādveva māhendraścarurbhavati -

atha vaiśvakarmaṇa ekakapālaḥ puroḍāśo bhavati / viśvaṃ vā etatkarma kṛtaṃ sarvaṃ jitaṃ devānāmāsītsākamedhairījānānāṃ vijigyānānāṃ viśvamvevaitasyai tatkarma kṛtaṃ sarvaṃ jitaṃ bhavati sākamedhairījānasya vijigyānasya tasmādvaiśvakarmaṇa ekakapālaḥ puroḍāśo bhavati -

etena vai devāḥ / yajñeneṣṭvā yeyaṃ devānāṃ prajātiryā śrīretadbabhūvuretāṃ ha vai prajātiṃ prajāyata etāṃ śriyaṃ gacchati ya evaṃ vidvānetena yajñena yajate tasmādvā etena yajeta -