Shatapatha Brahmana · Chapter 2.4.1

२.४.१.
atha hute'gnihotra upatiṣṭhate / bhūrbhuvaḥ svariti tatsatyenaivaitadvācaṃ samardhayati yadāha bhūrbhuvaḥ svariti tayā samṛddhayāśiṣamāśāste suprajāḥ prajābhiḥ syāma iti/ tatprajāmāśāste/ suvīro vīraiḥ iti/ tadvīrānāśāste/ supoṣaḥ poṣairiti tatpuṣṭimāśāste -

yadvā ado dīrghamagnyupasthānam / āśīreva sāśīriyaṃ tadetāvataivaitatsarvamāpnoti tasmādetenaivopatiṣṭhetaitena nveva vayamupacarāma iti ha smāhāsuriḥ -

atha pravatsyan / gārhapatyamevāgra upatiṣṭhate'thāhavanīyaṃ -

sa gārhapatyamupatiṣṭhate / narya prajāṃ me pāhīti prajāyā haiṣa īṣṭe tatprajāmevāsmā etatparidadāti guptyai -

athāhavanīyamupatiṣṭhate / śaṃsya paśūnme pāhīti paśūnāṃ haiṣa īṣṭe tatpaśūnevāsmā etatparidadāti guptyai -

atha pra vā vrajati pra vā dhāvayati / sa yatra velāṃ manyate tatsyanttvā vācaṃ visṛjate'tha proṣya parekṣya yatra velāṃ manyate tadvācaṃ yacchati sa yadyapi rājāntareṇa syānnaiva tamupeyāt -

sa āhavanīyamevāgra upatiṣṭhate / atha gārhapatyaṃ gṛhā vai gārhapatyo gṛhā vai pratiṣṭhā tadgṛheṣvevaitatpratiṣṭhāyāṃ pratitiṣṭhati -

sa āhavanīyamupatiṣṭhate / āganma viśvavedasamasmabhyaṃ vasuvittamamagne samrāḍabhi dyumnamabhi saha āyacchasvetyathopaviśya tṛṇānyapalumpati -

atha gārhapatyamupatiṣṭhate / ayamagnirgṛhapatirgārhapatyaḥ prajāyā vasuvittamaḥ agne gṛhapate'bhi dyumnamabhi saha āyacchasvetyathopaviśya tṛṇānyapalumpatyetannu japenaitena nveva bhūyiṣṭhā ivopatiṣṭhante -

sa vai khalu tūṣṇīmevopatiṣṭheta / idaṃ vai yasminvasati brāhmaṇo vā rājā vā śreyānmanuṣyo nveva tameva nārhati vaktumidaṃ me tvaṃ gopāya prāhaṃ vatsyāmītyathāsminnete śreyāṃso vasanti devā agnayaḥ ka u tānarhati vaktumidamme yūyaṃ gopāyata prāhaṃ vatsyāmīti -

mano ha vai devā manuṣyasyājānanti / sa veda gārhapatyaḥ paridāmmedamupāgāditi tūṣṇīmevāhavanīyamupatiṣṭhate sa vedāhavanīyaḥ paridāṃ medamupāgāditi –

atha pra vā vrajati pra vā dhāvayati / sa yatra velāṃ manyate tatsyattvā vācaṃ visṛjate'tha proṣya parekṣya yatra velāṃ manyate tadvācaṃ yacchati sa yadyapi rājāntareṇa syānnaiva tamupeyāt -

sa āhavanīyamevāgra upatiṣṭhate / atha gārhapatyaṃ tūṣṇīmevāhavanīyamupatiṣṭhate tūṣṇīmupaviśya tṛṇānyapalumpati tūṣṇīmeva gārhapatyamupatiṣṭhate tūṣṇīmupaviśya tṛṇānyapalumpati -

athāto gṛhāṇāmevopacāraḥ / etaddha vai gṛhapateḥ proṣuṣa āgatādgṛhāḥ samuttrastā iva bhavanti kimayamiha vadiṣyati kiṃ vā kariṣyatīti sa yo ha tatra kiṃcidvadati vā karoti vā tasmādgṛhāḥ pratrasanti tasyeśvaraḥ kulaṃ vikṣobdhoratha yo ha tatra na vadati na kiṃ cana karoti taṃ gṛhā upasaṃśrayante na vā ayamihāvādīnna kiṃcanākaraditi sa yadihāpi sukruddha iva syācchva eva tatastatkuryādyadvadiṣyanvā kariṣyanvā syādeṣa u gṛhāṇāmupacāraḥ -