Scripture Library

Shatapatha Brahmana · Chapter 2.1.1

2.1.1.2.1.1.1

२.१.१ athāgnyādhānam/ tatra sambhārabrāhmaṇam
sa yadvā itaścetaśca sambharati / tatsambhārāṇāṃ sambhāratvaṃ yatrayatrāgnernyaktaṃ tatastataḥ sambharati tadyaśaseva tvadevainametatsamardhayati paśubhiriva tvanmithuneneva tvatsambharan -

2.1.1.2.1.1.2

athollikhati / tadyadevāsyai pṛthivyā abhiṣṭhitaṃ vābhiṣṭhyūtaṃ vā tadevāsyā etaduddhantyatha yajñiyāyāmeva pṛthivyāmādhatte tasmādvā ullikhati -

2.1.1.2.1.1.3

athādbhirabhyukṣati / eṣa vā apāṃ sambhāro yadadbhirabhyukṣati tadyadapaḥ sambharatyannaṃ vā āpo'nnaṃ hi vā āpastasmādyademaṃ lokamāpa āgacchantyathehānnādyaṃ jāyate tadannādyenaivainametatsamardhayati -

2.1.1.2.1.1.4

yoṣā vā āpaḥ / vṛṣāgnirmithunenaivainametatprajananena samardhayatyadbhirvā idaṃ sarvamāptamadbhirevainametadāptvādhatte tasmādapaḥ sambharati -

2.1.1.2.1.1.5

atha hiraṇyaṃ sambharati / agnirha vā apo'bhidadhyau mithunyābhiḥ syāmiti tāḥ sambabhūva tāsu retaḥ prāsiñcattaddhiraṇyamabhavattasmādetadagnisaṃkāśamagnerhi retastasmādapsu vindantyapsu hi prāsiñcattasmādenena na dhāvayati na kiṃ cana karotyatha yaśo devaretasaṃ hi tadyaśasaivainametatsamardhayati saretasameva kṛtsnamagnimādhatte tasmāddhiraṇyaṃ sambharati -

2.1.1.2.1.1.6

athoṣāntsambharati / asau ha vai dyaurasyai pṛthivyā etānpaśūnpradadau tasmātpaśavyamūṣaramityāhuḥ paśavo hyevaite sākṣādevatatpaśubhirevainametatsamardhayati te'muta āgatā asyāṃ pṛthivyāmpratiṣṭhitāstamanayordyāvāpṛthivyo rasaṃ manyante tadanayorevainametaddyāvāpṛthivyo rasena samardhayati tasmādūṣāntsambharati -

2.1.1.2.1.1.7

athākhukarīṣaṃ sambharati / ākhavo ha vā asyai pṛthivyai rasaṃ vidustasmātte'dho'dha imāṃ pṛthivīṃ carantaḥ pīviṣṭhā asyai hi rasaṃ viduste yatra te'syai pṛthivyai rasaṃ vidustata utkiranti tadasyā evainametatpṛthivyai rasena samardhayati tasmādākhukarīṣaṃ sambharati purīṣya iti vai tamāhuryaḥ śriyaṃ gacchati samānaṃ vai purīṣaṃ ca karīṣaṃ ca tadetasyaivāvaruddhyai tasmādākhukarīṣaṃ sambharati -

2.1.1.2.1.1.8

atha śarkarāḥ sambharati / devāśca vā asurāścobhaye prājāpatyāḥ paspṛdhire sā heyampṛthivyalelāyadyathā puṣkaraparṇamevaṃ tāṃ ha sma vātaḥ saṃvahati sopaiva devāñjagāmopāsurāntsā yatra devānupajagāma -

2.1.1.2.1.1.9

taddhocuḥ / hantemāṃ pratiṣṭhāṃ dṛṃhāmahai tasyāṃ dhruvāyāmaśithilāyāmagnī ādadhāmahai tato'syai sapatnānnirbhakṣyāma iti -

2.1.1.2.1.1.10

tadyathā śaṅkubhiścarma vihanyāt / evamimāṃ pratiṣṭhāṃ paryabṛṃhanta seyaṃ dhruvāśithilā pratiṣṭhā tasyāṃ dhruvāyāmaśithilāyāmagnī ādadhata tato'syai sapatnānnirabhajan -

2.1.1.2.1.1.11

tatho evaiṣa etat / imāṃ pratiṣṭhāṃ śarkarābhiḥ paribṛṃhate tasyāṃ dhruvāyāmaśithilāyāmagnī ādhatte tato'syai sapatnānnirbhajati tasmāccharkarāḥ sambharati-

2.1.1.2.1.1.12

tānvā etān / pañca sambhārāntsambharati pāṅkto yajñaḥ pāṅktaḥ paśuḥ pañcartavaḥ saṃvatsarasya -

2.1.1.2.1.1.13

tadāhuḥ / ṣaḍevartavaḥ saṃvatsarasyeti nyūnamu tarhi mithunaṃ prajananaṃ kriyate nyūnādvā imāḥ prajāḥ prajāyante tacchvaḥśreyasamuttarāvattasmātpañca bhavanti yadyu ṣaḍevartavaḥ saṃvatsarasyetyagnirevaiteṣāṃ ṣaṣṭhastatho evaitadanyūnaṃ bhavati -

2.1.1.2.1.1.14

tadāhuḥ / naivaikaṃ cana sambhāraṃ sambharedityasyāṃ vā ete sarve pṛthivyāmbhavanti sa yadevāsyāmādhatte tatsarvānsambhārānāpnoti tasmānnaivaikaṃ cana sambhāraṃ sambharediti tadu sameva bharedyadahaivāsyāmādhatte tatsarvāntsambhārānāpnoti yadu sambhāraiḥ sambhṛtairbhavati tadu bhavati tasmādu sameva bharet -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0