Shatapatha Brahmana · Chapter 13.3.8

१३.३.८ aśvamedhīya prāyaścittāni
athātaḥ prāyaścittīnām yadyaśvo vaḍavāṃ skandedvāyavyampayo'nunirvapedvāyurvai retasāṃ vikartā prāṇo vai vāyuḥ prāṇo hi retasāṃ vikartā retasaivāsmiṃstadreto dadhāti -

atha yadi srāmo vindet pauṣṇaṃ carumanunirvapetpūṣā vai paśūnāmīṣṭe sa yasyaiva paśavo yaḥ paśūnāmīṣṭe tamevaitatprīṇātyagado haiva bhavati -

atha yadyakṣatāmayo vindet vaiśvānaraṃ dvādaśakapālaṃ bhūmikapālampuroḍāśamanunirvapediyaṃ vai vaiśvānara imāmevaitatprīṇātyagado haiva bhavati -

atha yadyakṣyāmayo vindet sauryaṃ carumanunirvapetsūryo vai prajānāṃ cakṣuryadā hyevaiṣa udetyathedaṃ sarvaṃ carati cakṣuṣaivāsmiṃstaccakṣurdadhāti sa yaccarurbhavati cakṣuṣā hyayamātmā carati -

atha yadyudake mriyeta vāruṇaṃ yavamayaṃ carumanunirvapedvaruṇo vā etaṃ gṛhṇāti yo'psu mriyate sā yaivainaṃ devatā gṛhṇāti tāmevaitatprīṇāti sā'smai prītā'nyamālambhāyānumanyate tayā'numatamālabhate sa yadyavamayo bhavati varuṇyā hi yavāḥ -

atha yadi naśyet trihaviṣamiṣṭimanunirvapeddyāvāpṛthivyamekakapālampuroḍāśaṃ vāyavyaṃ payaḥ sauryaṃ caruṃ yadvai kiṃ ca naśyatyantaraiva taddyāvāpṛthivī naśyati tadvāyurupavātyādityo'bhitapati naitābhyo devatābhya ṛte kiṃcana naśyati saiṣā pṛthageva naṣṭavedanī sa yadyasyāpyanyannaśyedetayaiva yajetānu haivainadvindatyatha yadyamitrā aśvaṃ vinderanyadi vā mriyeta yadi vāpsvanyamānīya prokṣeyuḥ saiva tatra prāyaścittiḥ -