શતપથબ્રાહ્મણમ્ · અધ્યાય 13.3.8

૧૩.૩.૮ અશ્વમેધીય પ્રાયશ્ચિત્તાનિ
અથાતઃ પ્રાયશ્ચિત્તીનામ્ યદ્યશ્વો વડવાં સ્કન્દેદ્વાયવ્યમ્પયોઽનુનિર્વપેદ્વાયુર્વૈ રેતસાં વિકર્તા પ્રાણો વૈ વાયુઃ પ્રાણો હિ રેતસાં વિકર્તા રેતસૈવાસ્મિંસ્તદ્રેતો દધાતિ -

અથ યદિ સ્રામો વિન્દેત્ પૌષ્ણં ચરુમનુનિર્વપેત્પૂષા વૈ પશૂનામીષ્ટે સ યસ્યૈવ પશવો યઃ પશૂનામીષ્ટે તમેવૈતત્પ્રીણાત્યગદો હૈવ ભવતિ -

અથ યદ્યક્ષતામયો વિન્દેત્ વૈશ્વાનરં દ્વાદશકપાલં ભૂમિકપાલમ્પુરોડાશમનુનિર્વપેદિયં વૈ વૈશ્વાનર ઇમામેવૈતત્પ્રીણાત્યગદો હૈવ ભવતિ -

અથ યદ્યક્ષ્યામયો વિન્દેત્ સૌર્યં ચરુમનુનિર્વપેત્સૂર્યો વૈ પ્રજાનાં ચક્ષુર્યદા હ્યેવૈષ ઉદેત્યથેદં સર્વં ચરતિ ચક્ષુષૈવાસ્મિંસ્તચ્ચક્ષુર્દધાતિ સ યચ્ચરુર્ભવતિ ચક્ષુષા હ્યયમાત્મા ચરતિ -

અથ યદ્યુદકે મ્રિયેત વારુણં યવમયં ચરુમનુનિર્વપેદ્વરુણો વા એતં ગૃહ્ણાતિ યોઽપ્સુ મ્રિયતે સા યૈવૈનં દેવતા ગૃહ્ણાતિ તામેવૈતત્પ્રીણાતિ સાઽસ્મૈ પ્રીતાઽન્યમાલમ્ભાયાનુમન્યતે તયાઽનુમતમાલભતે સ યદ્યવમયો ભવતિ વરુણ્યા હિ યવાઃ -

અથ યદિ નશ્યેત્ ત્રિહવિષમિષ્ટિમનુનિર્વપેદ્દ્યાવાપૃથિવ્યમેકકપાલમ્પુરોડાશં વાયવ્યં પયઃ સૌર્યં ચરું યદ્વૈ કિં ચ નશ્યત્યન્તરૈવ તદ્દ્યાવાપૃથિવી નશ્યતિ તદ્વાયુરુપવાત્યાદિત્યોઽભિતપતિ નૈતાભ્યો દેવતાભ્ય ઋતે કિંચન નશ્યતિ સૈષા પૃથગેવ નષ્ટવેદની સ યદ્યસ્યાપ્યન્યન્નશ્યેદેતયૈવ યજેતાનુ હૈવૈનદ્વિન્દત્યથ યદ્યમિત્રા અશ્વં વિન્દેરન્યદિ વા મ્રિયેત યદિ વાપ્સ્વન્યમાનીય પ્રોક્ષેયુઃ સૈવ તત્ર પ્રાયશ્ચિત્તિઃ -