Scripture Library

Shatapatha Brahmana · Chapter 13.3.4

13.3.4.13.3.4.1

sarvābhyo vai devatābhyo'śva ālabhyate yatprājāpatyaṃ kuryādyā devatā apibhāgāstā
bhāgadheyena vyardhayecchādaṃ dadbhiravakāṃ dantamūlairityājyamavadānī kṛtvā pratyākhyāyaṃ devatābhya āhutīrjuhoti yā eva devatā apibhāgāstā bhāgadheyena samardhayatyaraṇye'nūcyānhutvā dyāvāpṛthivyāmuttamāmāhutiṃ juhoti dyāvāpṛthivyorvai sarvā devatāḥ pratiṣṭhitāstā evaitatprīṇāti devāsurāḥ saṃyattā āsan -

13.3.4.13.3.4.2

te'bruvan agnayaḥ sviṣṭakṛto'śvasya vayamuddhāramuddharāmahai tenāsurānabhibhaviṣyāma iti te lohitamudaharanta bhrātṛvyābhibhūtyai yatsviṣṭakṛdbhyo lohitaṃ juhoti bhrātṛvyābhibhūtyai bhavatyātmanā parāsya dviṣanbhrātṛvyo bhavati ya evaṃ veda -

13.3.4.13.3.4.3

gomṛgakaṇṭhena prathamāmāhutiṃ juhoti paśavo vai gomṛgā rudraḥ sviṣṭakṛtpaśūneva rudrādantardadhāti tasmādyatraiṣā'śvamedha āhutirhūyate na tatra rudraḥ paśūnabhimanyate -

13.3.4.13.3.4.4

aśvaśaphena dvitīyāmāhutiṃ juhoti paśavo vā ekaśaphā rudraḥ sviṣṭakṛtpaśūneva rudrādantardadhāti tasmādyatraiṣā'śvamedha āhutirhūyate na tatra rudraḥ paśūnabhimanyate -

13.3.4.13.3.4.5

ayasmayena caruṇā tṛtīyāmāhutiṃ juhoti āyāsyā vai prajā rudraḥ sviṣṭakṛtprajā eva
rudrādantardadhāti tasmādyatraiṣā'śvamedha āhutirhūyate na tatra rudraḥ prajā abhimanyate -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0