Scripture Library

Shatapatha Brahmana · Chapter 13.3.3

13.3.3.13.3.3.1

yattisro'nuṣṭubho bhavanti tasmādaśvastribhistiṣṭhaṃstiṣṭhati yaccatasro gāyatryastasmādaśvaḥ sarvaiḥ padbhiḥ pratidadhatpalāyate paramaṃ vā etacchando yadanuṣṭupparamo'śvaḥ paśūnāṃ paramaścatuṣṭoma stomānāṃ parameṇaivainamparamatāṃ gamayati -

13.3.3.13.3.3.2

śakvaryaḥ pṛṣṭhaṃ bhavanti anyadanyacchando'nye'nye hi stomāḥ kriyante yacchakvaryaḥ pṛṣṭhaṃ bhavantyaśvasyaiva sarvatvāya -

13.3.3.13.3.3.3

ekaviṃśaṃ madhyamamaharbhavati asau vā āditya ekaviṃśaḥ so'śvamedhaḥ svenaivainaṃ stomena svāyāṃ devatāyāṃ pratiṣṭhāpayati -

13.3.3.13.3.3.4

vāmadevyaṃ maitrāvaruṇasāma bhavati prajāpatirvai vāmadevyaṃ prājāpatyo'śvaḥ svayaivainaṃ devatayā samardhayati -

13.3.3.13.3.3.5

pārthuraśmaṃ brahmasāma bhavati raśminā vā aśvo yata īśvaro vā aśvo'yato'dhṛto'pratiṣṭhitaḥ parāṃ parāvataṃ gantoryatpārthuraśmaṃ brahmasāma bhavatyaśvasyaiva dhṛtyai -

13.3.3.13.3.3.6

saṃkṛti acchāvākasāma bhavati utsannayajña iva vā eṣa yadaśvamedhaḥ kiṃ vā hyetasya kriyate kiṃ vā na yatsaṃkṛtyacchāvākasāma bhavatyaśvasyaiva sarvatvāya sarvastomo'tirātra uttamamaharbhavati sarvaṃ vai sarvastomo'tirātraḥ sarvamaśvamedhaḥ sarvasyāptyai sarvasyāvaruddhyai -

13.3.3.13.3.3.7

ekaviṃśo'gnirbhavati ekaviṃśa stoma ekaviṃśatiryūpā yathā vā ṛṣabhā vā vṛṣāṇo vā saṃsphurerannevamete stomāḥ samṛcchante yadekaviṃśāstānyatsamarpayedārtimārcchedyajamāno hanyetāsya yajñaḥ -

13.3.3.13.3.3.8

dvādaśa evāgniḥ syāt ekādaśa yūpā yaddvādaśo'gnirbhavati dvādaśa māsāḥ saṃvatsaraḥ saṃvatsarameva yajñamāpnoti yadekādaśa yūpā virāḍvā eṣā sammīyate yadekādaśinī tasyai ya ekādaśa stana evāsyai sa duha evaināṃ tena -

13.3.3.13.3.3.9

tadāhuḥ yaddvādaśo'gniḥ syādekādaśa yūpā yathā sthūriṇā yāyāttādṛktadityekaviṃśa evāgnirbhavatyekaviṃśa stoma ekaviṃśatiryūpāstadyathā praṣṭibhiryāyāttādṛktat -

13.3.3.13.3.3.10

śiro vā etadyajñasya yadekaviṃśaḥ yo vā aśvamedhe trīṇi śīrṣāṇi veda śiro ha rājñāṃ bhavatyekaviṃśo'gnirbhavatyekaviṃśa stoma ekaviṃśatiryūpā etāni vā aśvamedhe trīṇi śīrṣāṇi tāni ya evaṃ veda śiro ha rājñāṃ bhavati yo vā aśvamedhe tisraḥ kakudo veda kakuddha rājñāṃ bhavatyekaviṃśo'gnirbhavatyekaviṃśa stoma ekaviṃśatiryūpā etā aśvamedhe tisraḥ kakudastā ya evaṃ veda kakuddha rājñāmbhavati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0