શતપથબ્રાહ્મણમ્ · અધ્યાય 13.3.4

સર્વાભ્યો વૈ દેવતાભ્યોઽશ્વ આલભ્યતે યત્પ્રાજાપત્યં કુર્યાદ્યા દેવતા અપિભાગાસ્તા
ભાગધેયેન વ્યર્ધયેચ્છાદં દદ્ભિરવકાં દન્તમૂલૈરિત્યાજ્યમવદાની કૃત્વા પ્રત્યાખ્યાયં દેવતાભ્ય આહુતીર્જુહોતિ યા એવ દેવતા અપિભાગાસ્તા ભાગધેયેન સમર્ધયત્યરણ્યેઽનૂચ્યાન્હુત્વા દ્યાવાપૃથિવ્યામુત્તમામાહુતિં જુહોતિ દ્યાવાપૃથિવ્યોર્વૈ સર્વા દેવતાઃ પ્રતિષ્ઠિતાસ્તા એવૈતત્પ્રીણાતિ દેવાસુરાઃ સંયત્તા આસન્ -

તેઽબ્રુવન્ અગ્નયઃ સ્વિષ્ટકૃતોઽશ્વસ્ય વયમુદ્ધારમુદ્ધરામહૈ તેનાસુરાનભિભવિષ્યામ ઇતિ તે લોહિતમુદહરન્ત ભ્રાતૃવ્યાભિભૂત્યૈ યત્સ્વિષ્ટકૃદ્ભ્યો લોહિતં જુહોતિ ભ્રાતૃવ્યાભિભૂત્યૈ ભવત્યાત્મના પરાસ્ય દ્વિષન્ભ્રાતૃવ્યો ભવતિ ય એવં વેદ -

ગોમૃગકણ્ઠેન પ્રથમામાહુતિં જુહોતિ પશવો વૈ ગોમૃગા રુદ્રઃ સ્વિષ્ટકૃત્પશૂનેવ રુદ્રાદન્તર્દધાતિ તસ્માદ્યત્રૈષાઽશ્વમેધ આહુતિર્હૂયતે ન તત્ર રુદ્રઃ પશૂનભિમન્યતે -

અશ્વશફેન દ્વિતીયામાહુતિં જુહોતિ પશવો વા એકશફા રુદ્રઃ સ્વિષ્ટકૃત્પશૂનેવ રુદ્રાદન્તર્દધાતિ તસ્માદ્યત્રૈષાઽશ્વમેધ આહુતિર્હૂયતે ન તત્ર રુદ્રઃ પશૂનભિમન્યતે -

અયસ્મયેન ચરુણા તૃતીયામાહુતિં જુહોતિ આયાસ્યા વૈ પ્રજા રુદ્રઃ સ્વિષ્ટકૃત્પ્રજા એવ
રુદ્રાદન્તર્દધાતિ તસ્માદ્યત્રૈષાઽશ્વમેધ આહુતિર્હૂયતે ન તત્ર રુદ્રઃ પ્રજા અભિમન્યતે -