શતપથબ્રાહ્મણમ્ · અધ્યાય 13.3.3

યત્તિસ્રોઽનુષ્ટુભો ભવન્તિ તસ્માદશ્વસ્ત્રિભિસ્તિષ્ઠંસ્તિષ્ઠતિ યચ્ચતસ્રો ગાયત્ર્યસ્તસ્માદશ્વઃ સર્વૈઃ પદ્ભિઃ પ્રતિદધત્પલાયતે પરમં વા એતચ્છન્દો યદનુષ્ટુપ્પરમોઽશ્વઃ પશૂનાં પરમશ્ચતુષ્ટોમ સ્તોમાનાં પરમેણૈવૈનમ્પરમતાં ગમયતિ -

શક્વર્યઃ પૃષ્ઠં ભવન્તિ અન્યદન્યચ્છન્દોઽન્યેઽન્યે હિ સ્તોમાઃ ક્રિયન્તે યચ્છક્વર્યઃ પૃષ્ઠં ભવન્ત્યશ્વસ્યૈવ સર્વત્વાય -

એકવિંશં મધ્યમમહર્ભવતિ અસૌ વા આદિત્ય એકવિંશઃ સોઽશ્વમેધઃ સ્વેનૈવૈનં સ્તોમેન સ્વાયાં દેવતાયાં પ્રતિષ્ઠાપયતિ -

વામદેવ્યં મૈત્રાવરુણસામ ભવતિ પ્રજાપતિર્વૈ વામદેવ્યં પ્રાજાપત્યોઽશ્વઃ સ્વયૈવૈનં દેવતયા સમર્ધયતિ -

પાર્થુરશ્મં બ્રહ્મસામ ભવતિ રશ્મિના વા અશ્વો યત ઈશ્વરો વા અશ્વોઽયતોઽધૃતોઽપ્રતિષ્ઠિતઃ પરાં પરાવતં ગન્તોર્યત્પાર્થુરશ્મં બ્રહ્મસામ ભવત્યશ્વસ્યૈવ ધૃત્યૈ -

સંકૃતિ અચ્છાવાકસામ ભવતિ ઉત્સન્નયજ્ઞ ઇવ વા એષ યદશ્વમેધઃ કિં વા હ્યેતસ્ય ક્રિયતે કિં વા ન યત્સંકૃત્યચ્છાવાકસામ ભવત્યશ્વસ્યૈવ સર્વત્વાય સર્વસ્તોમોઽતિરાત્ર ઉત્તમમહર્ભવતિ સર્વં વૈ સર્વસ્તોમોઽતિરાત્રઃ સર્વમશ્વમેધઃ સર્વસ્યાપ્ત્યૈ સર્વસ્યાવરુદ્ધ્યૈ -

એકવિંશોઽગ્નિર્ભવતિ એકવિંશ સ્તોમ એકવિંશતિર્યૂપા યથા વા ઋષભા વા વૃષાણો વા સંસ્ફુરેરન્નેવમેતે સ્તોમાઃ સમૃચ્છન્તે યદેકવિંશાસ્તાન્યત્સમર્પયેદાર્તિમાર્ચ્છેદ્યજમાનો હન્યેતાસ્ય યજ્ઞઃ -

દ્વાદશ એવાગ્નિઃ સ્યાત્ એકાદશ યૂપા યદ્દ્વાદશોઽગ્નિર્ભવતિ દ્વાદશ માસાઃ સંવત્સરઃ સંવત્સરમેવ યજ્ઞમાપ્નોતિ યદેકાદશ યૂપા વિરાડ્વા એષા સમ્મીયતે યદેકાદશિની તસ્યૈ ય એકાદશ સ્તન એવાસ્યૈ સ દુહ એવૈનાં તેન -

તદાહુઃ યદ્દ્વાદશોઽગ્નિઃ સ્યાદેકાદશ યૂપા યથા સ્થૂરિણા યાયાત્તાદૃક્તદિત્યેકવિંશ એવાગ્નિર્ભવત્યેકવિંશ સ્તોમ એકવિંશતિર્યૂપાસ્તદ્યથા પ્રષ્ટિભિર્યાયાત્તાદૃક્તત્ -

શિરો વા એતદ્યજ્ઞસ્ય યદેકવિંશઃ યો વા અશ્વમેધે ત્રીણિ શીર્ષાણિ વેદ શિરો હ રાજ્ઞાં ભવત્યેકવિંશોઽગ્નિર્ભવત્યેકવિંશ સ્તોમ એકવિંશતિર્યૂપા એતાનિ વા અશ્વમેધે ત્રીણિ શીર્ષાણિ તાનિ ય એવં વેદ શિરો હ રાજ્ઞાં ભવતિ યો વા અશ્વમેધે તિસ્રઃ કકુદો વેદ કકુદ્ધ રાજ્ઞાં ભવત્યેકવિંશોઽગ્નિર્ભવત્યેકવિંશ સ્તોમ એકવિંશતિર્યૂપા એતા અશ્વમેધે તિસ્રઃ કકુદસ્તા ય એવં વેદ કકુદ્ધ રાજ્ઞામ્ભવતિ -