Scripture Library

Shatapatha Brahmana · Chapter 13.3.1

13.3.1.13.3.1.1

prajāpaterakṣyaśvayat tatparāpatattato'śvaḥ samabhavadyadaśvayattadaśvasyāśvatvaṃ taddevā aśvamedhenaiva pratyadadhureṣa ha vai prajāpatiṃ sarvaṃ karoti yo'śvamedhena yajate sarva eva bhavati sarvasya vā eṣā prāyaścittiḥ sarvasya bheṣajaṃ sarvaṃ vā etena pāpmānaṃ devā atarannapi vā etena brahmahatyāmataraṃstarati sarvaṃ pāpmānaṃ tarati brahmahatyāṃ yo'śvamedhena yajate -

13.3.1.13.3.1.2

uttaraṃ vai tatprajāpaterakṣyaśvayat tasmāduttarato'śvasyāvadyanti dakṣiṇato'nyeṣāṃ paśūnām -

13.3.1.13.3.1.3

vaitasaḥ kaṭo bhavati apsuyonirvā aśvo'psujā vetasaḥ svayaivainaṃ yonyā samardhayati -

13.3.1.13.3.1.4

catuṣṭoma stomo bhavati saraḍvā aśvasya sakthyāvṛhattaddevāścatuṣṭomenaiva stomena pratyadadhuryaccatuṣṭoma stomo bhavatyaśvasyaiva sarvatvāya sarvastomo'tirātra uttamamaharbhavati sarvaṃ vai sarvastomo'tirātraḥ sarvamaśvamedhaḥ sarvasyāptyai sarvasyāvaruddhyai -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0