Shatapatha Brahmana · Chapter 13.2.9

apa vā etasmāt śrī rāṣṭraṃ krāmati yo'śvamedhena yajate -

ūrdhvāmenāmucchrāpayeti śrīrvai rāṣṭramaśvamedhaḥ śriyamevāsmai rāṣṭramūrdhvamucchrayati -

girau bhāraṃ haranniveti śrīrvai rāṣṭrasya bhāraḥ śriyamevāsmai rāṣṭraṃ nahyatyatho śriyamevāsminrāṣṭramadhinidadhāti -

athāsyai madhyamedhatāmiti śrīrvai rāṣṭrasya madhyaṃ śriyameva rāṣṭre madhyato'nnādyaṃ dadhāti -

śīte vāte punanniveti kṣemo vai rāṣṭrasya śītaṃ kṣemamevāsmai karoti -

yakāsakau śakuntiketi viḍvai śakuntikā''halagiti vañcatīti viśo vai rāṣṭrāya vañcantyāhanti gabhe paso nigalgalīti dhāraketi viḍvai gabho rāṣṭraṃ paso rāṣṭrameva viśyāhanti tasmādrāṣṭro viśaṃ ghātukaḥ -

mātā ca te pitā ca ta iti iyaṃ vai mātā'sau pitā''bhyāmevainaṃ svargaṃ lokaṃ gamayatyagraṃ vṛkṣasya rohata iti śrīrvai rāṣṭrasyāgraṃ śriyamevainaṃ rāṣṭrasyāgraṃ gamayati pratilāmīti te pitā gabhe muṣṭimataṃsayaditi viḍvai gabho rāṣṭraṃ muṣṭī rāṣṭrameva viśyāhanti tasmādrāṣṭrī viśaṃ ghātukaḥ -

yaddhariṇo yavamattīti viḍvai yavo rāṣṭraṃ hariṇo viśameva rāṣṭrāyādyāṃ karoti tasmādrāṣṭro viśamatti na puṣṭaṃ paśu manyata iti tasmādrājā paśūnna puṣyati śūdrā yadaryajārā na poṣāya na dhanāyatīti tasmādvaiśīputraṃ nābhiṣiñcati -

apa vā etebhyaḥ prāṇāḥ krāmanti ye yajñe'pūtāṃ vācaṃ vadanti dadhikrāvṇo akāriṣamiti surabhimatīmṛcamantato'nvāhurvācameva punate naibhyaḥ prāṇā apakrāmanti -