શતપથબ્રાહ્મણમ્ · અધ્યાય 13.2.9

અપ વા એતસ્માત્ શ્રી રાષ્ટ્રં ક્રામતિ યોઽશ્વમેધેન યજતે -

ઊર્ધ્વામેનામુચ્છ્રાપયેતિ શ્રીર્વૈ રાષ્ટ્રમશ્વમેધઃ શ્રિયમેવાસ્મૈ રાષ્ટ્રમૂર્ધ્વમુચ્છ્રયતિ -

ગિરૌ ભારં હરન્નિવેતિ શ્રીર્વૈ રાષ્ટ્રસ્ય ભારઃ શ્રિયમેવાસ્મૈ રાષ્ટ્રં નહ્યત્યથો શ્રિયમેવાસ્મિન્રાષ્ટ્રમધિનિદધાતિ -

અથાસ્યૈ મધ્યમેધતામિતિ શ્રીર્વૈ રાષ્ટ્રસ્ય મધ્યં શ્રિયમેવ રાષ્ટ્રે મધ્યતોઽન્નાદ્યં દધાતિ -

શીતે વાતે પુનન્નિવેતિ ક્ષેમો વૈ રાષ્ટ્રસ્ય શીતં ક્ષેમમેવાસ્મૈ કરોતિ -

યકાસકૌ શકુન્તિકેતિ વિડ્વૈ શકુન્તિકાઽઽહલગિતિ વઞ્ચતીતિ વિશો વૈ રાષ્ટ્રાય વઞ્ચન્ત્યાહન્તિ ગભે પસો નિગલ્ગલીતિ ધારકેતિ વિડ્વૈ ગભો રાષ્ટ્રં પસો રાષ્ટ્રમેવ વિશ્યાહન્તિ તસ્માદ્રાષ્ટ્રો વિશં ઘાતુકઃ -

માતા ચ તે પિતા ચ ત ઇતિ ઇયં વૈ માતાઽસૌ પિતાઽઽભ્યામેવૈનં સ્વર્ગં લોકં ગમયત્યગ્રં વૃક્ષસ્ય રોહત ઇતિ શ્રીર્વૈ રાષ્ટ્રસ્યાગ્રં શ્રિયમેવૈનં રાષ્ટ્રસ્યાગ્રં ગમયતિ પ્રતિલામીતિ તે પિતા ગભે મુષ્ટિમતંસયદિતિ વિડ્વૈ ગભો રાષ્ટ્રં મુષ્ટી રાષ્ટ્રમેવ વિશ્યાહન્તિ તસ્માદ્રાષ્ટ્રી વિશં ઘાતુકઃ -

યદ્ધરિણો યવમત્તીતિ વિડ્વૈ યવો રાષ્ટ્રં હરિણો વિશમેવ રાષ્ટ્રાયાદ્યાં કરોતિ તસ્માદ્રાષ્ટ્રો વિશમત્તિ ન પુષ્ટં પશુ મન્યત ઇતિ તસ્માદ્રાજા પશૂન્ન પુષ્યતિ શૂદ્રા યદર્યજારા ન પોષાય ન ધનાયતીતિ તસ્માદ્વૈશીપુત્રં નાભિષિઞ્ચતિ -

અપ વા એતેભ્યઃ પ્રાણાઃ ક્રામન્તિ યે યજ્ઞેઽપૂતાં વાચં વદન્તિ દધિક્રાવ્ણો અકારિષમિતિ સુરભિમતીમૃચમન્તતોઽન્વાહુર્વાચમેવ પુનતે નૈભ્યઃ પ્રાણા અપક્રામન્તિ -