શતપથબ્રાહ્મણમ્ · અધ્યાય 13.2.7

નિયુક્તેષુ પશુષુ પ્રોક્ષણીરધ્વર્યુરાદત્તેઽશ્વં પ્રોક્ષિષ્યન્નન્વારબ્ધે યજમાન આધ્વરિકં યજુરનુદ્રુત્યાશ્વમેધિકં યજુઃ પ્રતિપદ્યતે -

વાયુષ્ટ્વા પચતૈરવત્વિતિ વાયુરેવૈનં પચત્યસિતગ્રીવશ્છાગૈરિત્યગ્નિર્વા અસિતગ્રીવોઽગ્નિરેવૈનં છાગૈઃ પચતિ -

ન્યગ્રોધશ્ચમસૈરિતિ યત્ર વૈ દેવા યજ્ઞેનાયજન્ત ત એતાંશ્ચમસાન્ન્યૌબ્જંસ્તે ન્યઞ્ચો ન્યગ્રોધા રોહન્તિ -

શલ્મલિર્વૃદ્ધ્યેતિ શલ્મલૌ વૃદ્ધિં દધાતિ તસ્માચ્છલ્મલિર્વનસ્પતીનાં વર્ષિષ્ઠં વર્ધતે -

એષ સ્ય રાથ્યો વૃષેતિ અશ્વેનૈવ રથં સમ્પાદયતિ તસ્માદશ્વો નાન્યદ્રથાદ્વહતિ -

પડ્ભિશ્ચતુર્ભિરેદગન્નિતિ તસ્માદશ્વસ્ત્રિભિસ્તિષ્ઠંસ્તિષ્ઠત્યથ યુક્તઃ સર્વૈઃ પદ્ભિઃ સમમાયુતે -

બ્રહ્માઽકૃષ્ણશ્ચ નોઽવત્વિતિ ચન્દ્રમા વૈ બ્રહ્માઽકૃષ્ણશ્ચન્દ્રમસ એવૈનમ્પરિદદાતિ નમોઽગ્નય ઇત્યગ્નય એવ નમસ્કરોતિ -

સંશિતો રશ્મિના રથ ઇતિ રશ્મિનૈવ રથં સમ્પાદયતિ તસ્માદ્રથઃ પર્યુતો દર્શનીયતમો ભવતિ -

સંશિતો રશ્મિના હય ઇતિ રશ્મિનૈવાશ્વં સમ્પાદયતિ તસ્માદશ્વો રશ્મિના પ્રતિહૃતો
ભૂયિષ્ઠં રોચતે -

સંશિતો અપ્સ્વપ્સુજા ઇતિ અપ્સુયોનિર્વા અશ્વઃ સ્વયૈવૈનં યોન્યા સમર્ધયતિ બ્રહ્મા
સોમપુરોગવ ઇતિ સોમપુરોગવમેવૈનં સ્વર્ગં લોકં ગમયતિ -

સ્વયં વાજિંસ્તન્વં કલ્પયસ્વેતિ સ્વયં રૂપં કુરુષ્વ યાદૃશમિચ્છસીત્યેવૈનં તદાહ સ્વયં યજસ્વેતિ સ્વારાજ્યમેવાસ્મિન્દધાતિ સ્વયં જુષસ્વેતિ સ્વયં લોકં રોચયસ્વ યાવન્તમિચ્છસીત્યેવૈનં તદાહ મહિમા તેઽન્યેન ન સંનશ ઇત્યશ્વમેવ મહિમ્ના સમર્ધયતિ -

ન વા ઉ એતન્મ્રિયસે ન રિષ્યસીતિ પ્રશ્વાસયત્યેવૈનં તદ્દેવાં ઇદેષિ પથિભિઃ સુગેભિરિતિ દેવયાનાનેવૈનં પથો દર્શયતિ યત્રાસતે સુકૃતો યત્ર તે યયુરિતિ સુકૃદ્ભિરેવૈનં સલોકં કરોતિ તત્ર ત્વા દેવઃ સવિતા દધાત્વિતિ સવિતૈવૈનં સ્વર્ગે લોકે દધાતિ પ્રજાપતયે ત્વા જુષ્ટં પ્રોક્ષામીત્યુપાંશ્વથોપગૃહ્ણાતિ -

અગ્નિઃ પશુરાસીત્ તેનાયજન્ત સ એતં લોકમજયદ્યસ્મિન્નગ્નિઃ સ તે લોકો ભવિષ્યતિ તં જેષ્યસિ પિબૈતા અપ ઇતિ યાવાનગ્નેર્વિજયો યાવાંલ્લોકો યાવદૈશ્વર્યં તાવાંસ્તે વિજયસ્તાવાંલ્લોકસ્તાવદૈશ્વર્યં ભવિષ્યતીત્યેવૈનં તદાહ -

વાયુઃ પશુરાસીત્ તેનાયજન્ત સ એતં લોકમજયદ્યસ્મિન્વાયુઃ સ તે લોકો ભવિષ્યતિ
તં જેષ્યસિ પિબૈતા અપ ઇતિ યાવાન્વાયોર્વિજયો યાવાંલ્લોકો યાવદૈશ્વર્યં તાવાંસ્તે વિજયસ્તાવાંલ્લોકસ્તાવદૈશ્વર્યં ભવિષ્યતીત્યેવૈનં તદાહ -

સૂર્યઃ પશુરાસીત્ તેનાયજન્ત સ એતં લોકમજયદ્યસ્મિન્ત્સૂર્યઃ સ તે લોકો ભવિષ્યતિ
તં જેષ્યસિ પિબૈતા અપ ઇતિ યાવાન્ત્સૂર્યસ્ય વિજયો યાવાંલ્લોકો યાવદૈશ્વર્યં તાવાંસ્તે
વિજયસ્તાવાંલ્લોકસ્તાવદૈશ્વર્યં ભવિષ્યતીત્યેવૈનં તદાહ તર્પયિત્વાશ્વં પુનઃ સંસ્કૃત્ય પ્રોક્ષણીરિતરાન્પશૂન્પ્રોક્ષતિ તસ્યાતઃ -