શતપથબ્રાહ્મણમ્ · અધ્યાય 13.2.5

પ્રજાપતિરશ્વમેધમસૃજત સોઽસ્માત્સૃષ્ટઃ પરાઙૈત્સ પઙ્ક્તિર્ભૂત્વા સંવત્સરમ્પ્રાવિશત્તેઽર્ધમાસા અભવંસ્તં પઞ્ચદશિભિરનુપ્રાયુઙ્ક્ત તમાપ્નોત્તમાપ્ત્વા પઞ્ચદશિભિરવારુન્દ્ધાર્ધમાસાનાં વા એષા પ્રતિમા યત્પઞ્ચદશિનો યત્પઞ્ચદશિન આલભતેઽર્ધમાસાનેવ તૈર્યજમાનોઽવરુન્દ્ધે -

તદાહુઃ અનવરુદ્ધો વા એતસ્ય સંવત્સરો ભવતિ યોઽન્યત્ર ચાતુર્માસ્યેભ્યઃસંવત્સરં તનુત ઇત્યેષ વૈ સાક્ષાત્સંવત્સરો યચ્ચાતુર્માસ્યાનિ યચ્ચાતુર્માસ્યાન્પશૂનાલભતે સાક્ષાદેવ તત્સંવત્સરમવરુન્દ્ધે વિ વા એષ પ્રજયા પશુભિરૃધ્યતેઽપ સ્વર્ગં લોકં રાધ્નોતિ યોઽન્યત્રૈકાદશિનેભ્યઃ સંવત્સરં તનુત ઇત્યેષ વૈ સમ્પ્રતિ સ્વર્ગો લોકો યદેકાદશિની પ્રજા વૈ પશવ એકાદશિની યદૈકાદશિનાન્પશૂનાલભતે ન સ્વર્ગં લોકમપરાધ્નોતિ ન પ્રજયા પશુભિર્વ્યૃદ્યતે -

પ્રજાપતિર્વિરાજમસૃજત સાસ્માત્સૃષ્ટા પરાચ્યેત્સાશ્વં મેધ્યં પ્રાવિશત્તાં દશિભિરનુપ્રાયુઙ્ક્ત તામાપ્નોત્તામાપ્ત્વા દશિભિરવારુન્દ્ધ યદ્દશિન આલભતે વિરાજમેવ તૈર્યજમાનોઽવરુન્દ્ધે શતમાલભતે શતાયુર્વૈ પુરુષઃ શતેન્દ્રિય આયુરેવેન્દ્રિયં વીર્યમાત્મન્ધત્તે -

એકાદશ દશત આલભતે એકાદશાક્ષરા વૈ ત્રિષ્ટુબિન્દ્રિયમુ વૈ વીર્યં ત્રિષ્ટુબિન્દ્રિયસ્યૈવ વીર્યસ્યાવરુદ્ધ્યા એકાદશ દશત આલભતે દશ વૈ પશોઃ પ્રાણા આત્મૈકાદશઃ પ્રાણૈરેવ પશૂન્ત્સમર્ધયતિ વૈશ્વદેવા ભવન્તિ વૈશ્વદેવો વા અશ્વોઽશ્વસ્યૈવ સર્વત્વાય બહુરૂપા ભવન્તિ તસ્માદ્બહુરૂપાઃ પશવો નાનારૂપા ભવન્તિ તસ્માન્નાનારૂપાઃ પશવઃ -