શતપથબ્રાહ્મણમ્ · અધ્યાય 13.1.2

વ્યૃદ્ધમુ વા એતદ્યજ્ઞસ્ય યદયજુષ્કેણ ક્રિયત ઇમામગૃભ્ણન્રશનામૃતસ્યેત્યશ્વાભિધાનીમાદત્તે યજુષ્કૃત્યૈ યજ્ઞસ્ય સમૃદ્ધ્યૈ દ્વાદશારત્નિર્ભવતિ દ્વાદશ માસાઃ સંવત્સરઃ સંવત્સરમેવ યજ્ઞમાપ્નોતિ -

તદાહુઃ દ્વાદશારત્ની રશના કાર્યા૩ ત્રયોદશારત્ની૩ ઇત્યૃષભો વા એષ ઋતૂનાં યત્સંવત્સરસ્તસ્ય ત્રયોદશો માસો વિષ્ટપમૃષભ એષ યજ્ઞાનાં યદશ્વમેધો યથા વા ઋષભસ્ય વિષ્ટપમેવમેતસ્ય વિષ્ટપં ત્રયોદશમરત્નિં રશનાયામુપાદધ્યાત્તદ્યથ ઋષભસ્ય વિષ્ટપં સંસ્ક્રિયતે તાદૃક્તત્ -

અભિધા અસીતિ તસ્માદશ્વમેધયાજી સર્વા દિશોઽભિજયતિ ભુવનમસીતિ ભુવનં તજ્જયતિ યન્તાસિ ધર્તેતિ યન્તારમેવૈનં ધર્તારં કરોતિ સ ત્વમગ્નિં વૈશ્વાનરમિત્યગ્નિમેવૈનં વૈશ્વાનરં ગમયતિ સપ્રથસં ગચ્છેતિ પ્રજયૈવૈનં પશુભિઃ પ્રથયતિ સ્વાહાકૃત ઇતિ વષટ્કાર એવાસ્યૈષ સ્વગા ત્વા દેવેભ્ય ઇતિ દેવેભ્ય એવૈનં સ્વગા કરોતિ પ્રજાપતય ઇતિ પ્રાજાપત્યોઽશ્વઃ સ્વયૈવૈનં દેવતયા સમર્ધયતિ -

ઈશ્વરો વા એષઃ આર્તિમાર્તોર્યો બ્રહ્મણે દેવેભ્યોઽપ્રતિપ્રોચ્યાશ્વં બધ્નાતિ બ્રહ્મન્નશ્વં ભન્ત્સ્યામિ દેવેભ્યઃ પ્રજાપતયે તેન રાધ્યાસમિતિ બ્રહ્માણમામન્ત્રયતે બ્રહ્મણ એવૈનં પ્રતિપ્રોચ્ય બધ્નાતિ નાર્તિમાર્ચ્છતિ તં બધાન દેવેભ્યઃ પ્રજાપતયે તેન રાધ્નુહીતિ બ્રહ્મા પ્રસૌતિ સ્વયૈવૈનં દેવતયા સમર્ધયત્યથ પ્રોક્ષત્યસાવેવ બન્ધુઃ -

સ પ્રોક્ષતિ પ્રજાપતયે ત્વા જુષ્ટં પ્રોક્ષામીતિ પ્રજાપતિર્વૈ દેવાનાં વીર્યવત્તમો વીર્યમેવાસ્મિન્દધાતિ તસ્માદશ્વઃ પશૂનાં વીર્યવત્તમઃ -

ઇન્દ્રાગ્નિભ્યાં ત્વા જુષ્ટં પ્રોક્ષામીતિ ઇન્દ્રાગ્ની વૈ દેવાનામોજસ્વિતમા ઓજ એવાસ્મિન્દધાતિ તસ્માદશ્વઃ પશૂનામોજસ્વિતમઃ -

વાયવે ત્વા જુષ્ટં પ્રોક્ષામીતિ વાયુર્વૈ દેવાનામાશિષ્ઠો જવમેવાસ્મિન્દધાતિ તસ્માદશ્વઃ પશૂનામાશિષ્ઠઃ -

વિશ્વેભ્યસ્ત્વા દેવેભ્યો જુષ્ટં પ્રોક્ષામીતિ વિશ્વે વૈ દેવા દેવાનાં યશસ્વિતમા યશ એવાસ્મિન્દધાતિ તસ્માદશ્વઃ પશૂનાં યશસ્વિતમઃ સર્વેભ્યસ્ત્વા દેવેભ્યો જુષ્ટં પ્રોક્ષામીતિ -

તદાહુઃ યત્પ્રાજાપત્યોઽશ્વોઽથ કથાપ્યન્યાભ્યો દેવતાભ્યઃ પ્રોક્ષતીતિ સર્વા વૈ દેવતા અશ્વમેધેઽન્વાયત્તા યદાહ સર્વેભ્યસ્ત્વા દેવેભ્યઃ પ્રોક્ષામીતિ સર્વા એવાસ્મિન્દેવતા અન્વાયાતયતિ તસ્માદશ્વમેધે સર્વા દેવતા અન્વાયત્તાઃ પાપ્મા વા એતમ્ભ્રાતૃવ્ય ઈપ્સતિ યોઽશ્વમેધેન યજેત વજ્રોઽશ્વઃ પરો મર્તઃ પરઃ શ્વેતિ શ્વાનં ચતુરક્ષં હત્વાઽધસ્પદમશ્વસ્યોપપ્લાવયતિ વજ્રેણૈવૈનમવક્રામતિ નૈનમ્પાપ્મા ભ્રાતૃવ્ય આપ્નોતિ -