Shatapatha Brahmana · Chapter 12.1.3

१२.१.३ devavidyābrāhmaṇam
yadvai dīkṣante/ agnāviṣṇū eva devate yajante/ agnāviṣṇū devate bhavanti/ agnāviṣṇvoḥ sāyujyaṃ salokatāṃ jayanti

atha yat prāyaṇīyena yajante/ aditimeva devatāṃ yajante/ aditirdevatā bhavanti/ aditeḥ sāyujyaṃ salokatāṃ jayanti

atha yat krayeṇa caranti/ somameva devatāṃ yajante/ somo devatā bhavanti/ somasya sāyujyaṃ salokatāṃ jayanti

atha yadātithyena yajante/ viṣṇumeva devatāṃ yajante/ viṣṇurdevatā bhavanti/ viṣṇoḥ sāyujyaṃ salokatāṃ jayanti

atha yatpravargyeṇa yajante/ ādityameva devatāṃ yajante/ ādityo devatā bhavanti/ ādityasya sāyujyaṃ salokatāṃ jayanti

atha yadupasada upayanti/ etā eva devatā yajante/ yā etā upasatsu/ etā devatā bhavanti/ etāsāṃ devatānāṃ sāyujyaṃ salokatāṃ jayanti

atha yadagnīṣomīyeṇa paśunā yajante/ agnīṣomāveva devate yajante/ agnīṣomau devate bhavanti/ agnīṣomayoḥ sāyujyaṃ salokatāṃ jayanti

atha yat prāyaṇīyamatirātramupayanti/ ahorātre eva devate yajante/ ahorātre devate bhavanti/ ahorātrayoḥ sāyujyaṃ salokatāṃ jayanti

atha yaccaturviṃśamaharupayanti/ saṃvatsarameva devatāṃ yajante/ saṃvatsaro devatā bhavanti/ saṃvatsarasya sāyujyaṃ salokatāṃ jayanti

atha yadabhiplavaṃ ṣaḍahamupayanti/ arddhamāsāṃśca māsāṃśca devate yajante/ arddhamāsāśca māsāśca devatā bhavanti/ arddhamāsānāṃ ca māsānāṃ ca sāyujyaṃ salokatāṃ jayanti

atha yatpṛṣṭhyaṃ ṣaḍahamupayanti/ ṛtūneva devatā yajante/ agnirdevatā bhavanti/ agneḥ sāyujyaṃ salokatāṃ jayanti

atha yadabhijitamupayanti/ agnimeva devatāṃ yajante/ agnirdevatā bhavanti/ agneḥ sāyujyaṃ salokatāṃ jayanti

atha yat svarasāmna upayanti/ apa eva devatā yajante/ āpo devatā bhavanti/ apāṃ sāyujyaṃ salokatāṃ jayanti

atha yadviṣuvantamupayanti/ ādityameva devatāṃ yajante/ ādityo devatā bhavanti/ ādityasya sāyujyaṃ salokatāṃ jayanti/ uktāḥ svarasāmānaḥ

atha yadviśvajitamupayanti/ indrameva devatāṃ yajante/ indro devatā bhavanti/ indrasya sāyujyaṃ salokatāṃ jayanti/ uktau pṛṣṭhyābhiplavau

atha yat goāyuṣī upayanti/ mitrāvaruṇāveva devate yajante/ mitrāvaruṇau devate bhavanti/ mitrāvaruṇayoḥ sāyujyaṃ salokatāṃ jayanti

atha yaddaśarātramupayanti/ viśvāneva devān devatā yajante/ viśve devā devatā bhavanti/ viśveṣāṃ devānāṃ sāyujyaṃ salokatāṃ jayanti

atha yaddāśarātrikaṃ pṛṣṭhyaṃ ṣaḍahamupayanti/ diśa eva devatā yajante/ diśo devatā bhavanti/ diśāṃ sāyujyaṃ salokatāṃ jayanti

atha yacchaṃdomānupayanti/ imāneva lokān devatā yajante/ ime lokā devatā bhavanti/ eṣāṃ lokānāṃ sāyujyaṃ salokatāṃ jayanti

atha yaddaśamamaharupayanti/ saṃvatsarameva devatāṃ yajante/ saṃvatsaro devatā bhavanti/ saṃvatsarasya sāyujyaṃ salokatāṃ jayanti

atha yanmahāvratamupayanti/ prajāpatimeva devatāṃ yajante/ prajāpatirdevatā bhavanti/ prajāpateḥ sāyujyaṃ salokatāṃ jayanti

atha yadudayanīyamatirātramupayanti/ saṃvatsarameva tadāptvā svarge loke pratitiṣṭhanti/ tān yadi pṛccheyuḥ kāmadya devatāṃ yajadhve/ kā devatā stha/ kasyāṃ devatāyāṃ vasatheti/ ata evaikatamāṃ brūyuḥ/ yasyai tu nediṣṭhaṃ syuḥ/ ete satisadaḥ/ ete hi satīṣu devatāsu sīdanto yanti/ satrasado haivetare/ sa yo haivaṃ viduṣāṃ dīkṣitānāṃ pāpakaṃ satre kīrtayet/ etābhyastvā devatābhya āvṛścāmaḥ ityenaṃ brūyuḥ/ sa pāpīyān bhavati/ śreyāṃsa ātmanā

sa eṣa saṃvatsarastrimahāvrataḥ/ caturviṃśe mahāvratam/ viṣuvati mahāvratam/ mahāvrata eva mahāvratam/ taṃ ha smaitaṃ pūrva upayaṃti/ trimahāvrataṃ te/ te tejasvina āsuḥ/ satyavādinaḥ/ saṃśitavratāḥ/ atha ya u ha enamapyetarhi tathopeyuḥ/ yathā''mapātramudaka āsikte vimrityetat/ evaṃ haiva te vimrityeyuḥ/ uparyupayaṃti/ tadeṣāṃ satyena śrameṇa tapasā śraddhayā yajñenāhutibhiravaruddhaṃ bhavati