Shatapatha Brahmana · Chapter 12.1.1

१२.१.१.
gavāmayanabrāhmaṇam
ayaṃ vai yajño yo'yaṃ pavate/ tameta īpsanti, saṃvatsarāya dīkṣante/ teṣāṃ gṛhapatiḥ prathamo dīkṣate/ ayaṃ vai loko gṛhapatiḥ/ asmin vai loka idaṃ sarvaṃ pratiṣṭhitam/ gṛhapatā u vai sasatriṇaḥ pratiṣṭhitāḥ pratiṣṭhāyāmevaitat pratiṣṭhāya dīkṣante/ - १२.१.१.१
atha brahmāṇaṃ dīkṣayati/ candramā vai brahmā/ somo vai candramāḥ/ saumyā oṣadhayaḥ/ oṣadhīstadanena lokena saṃdadhāti/ tasmādetāvaṃtareṇānyo na dīkṣeta/ sa yaddhaitāvantareṇānyo dīkṣeta/ oṣadhīstadanena lokena nānā kuryāt/ ucchoṣukā ha syuḥ/ tasmādetāvantareṇānyo na dīkṣeta

athodgātāraṃ dīkṣayati/ parjanyo vā udgātā/ parjanyādu vai vṛṣṭirjāyate/ vṛṣṭiṃ tadoṣadhibhiḥ saṃdadhāti/ tasmādetāvaṃtareṇānyo na dīkṣeta/ sa yaddhaitāvaṃtareṇānyo dīkṣeta/ vṛṣṭiṃ tadoṣadhibhirnānā kuryāt/ avarṣuko ha syāt/ tasmādetāvaṃtareṇānyo na dīkṣeta

atha hotāraṃ dīkṣayati/ agnirvai hotā'dhidevatam/ vāgadhyātmam/ annaṃ vṛṣṭiḥ/ agniṃ ca tadvācaṃ cānnena sandadhāti/ tasmādetāvantareṇānyo na dīkṣeta/ sa yaddhaitāvantareṇānyo dīkṣeta/ agniṃ ca tadvācaṃ cānnena nānā kuryāt/ aśanāyukā ha syuḥ/ tasmādetāvantareṇānyo na dīkṣeta/ etāṃścaturo'dhvaryurdīkṣayati

athādhvaryuṃ pratiprasthātā dīkṣayati/ mano vā adhvaryuḥ/ vāg hotā/ manaśca tadvācaṃ ca sandadhāti/ tasmādetāvantareṇānyo na dīkṣeta/ sa yaddhaitāvantareṇānyo dīkṣeta/ manaśca tadvācaṃ ca nānā kuryāt/ pramāyukā ha syuḥ/ tasmādetāvantareṇānyo na dīkṣeta

atha brahmaṇe brāhmaṇācchaṃsinaṃ dīkṣayati/ taṃ hi so'nu/ athodgātre prastotāraṃ dīkṣayati/ taṃ hi so'nu/ atha hotre maitrāvaruṇaṃ dīkṣayati/ taṃ hi so'nu/ etāṃścaturaḥ pratiprasthātā dīkṣayati

athādhvaryave pratiprasthātāraṃ neṣṭā dīkṣayati/ taṃ hi so'nu/ eteṣāṃ vai navānāṃ klṛptimanvitare kalpante/ nava vai prāṇāḥ/ prāṇānevaiṣvetaddadhāti/ tathā sarvamāyuryanti/ tathā u ha na purā''yuṣo'smāllokāt prayaṃti

atha brahmaṇe potāraṃ dīkṣayati/ taṃ hi so'nu/ athodgātre pratihartāraṃ dīkṣayati/ taṃ hi so'nu/ atha hotre'cchāvākaṃ dīkṣayati/ taṃ hi so'nu/ etāṃścaturo neṣṭā dīkṣayati

athādhvaryave neṣṭāramunnetā dīkṣayati/ taṃ hi so'nu/ atha brahmaṇa āgnīdhraṃ dīkṣayati/ taṃ hi 'nu/ athodgātre subrahmaṇyāṃ dīkṣayati/ taṃ hi so'nu/ atha hotre grāvastutaṃ dīkṣayati/ taṃ hi so'nu/ etāṃścatura unnetā dīkṣayati

athonnetāraṃ snātako vā brahmacārī vā'nyo vā dīkṣito dīkṣayati/ na pūtaḥ pāvayet iti hyāhuḥ/ saiṣā'nupūrvadīkṣā/ sa yatra haivaṃ vidvāṃso dīkṣante/ dīkṣamāṇā haiva te yajñaṃ kalpayanti/ yajñasya klṛptimanu satriṇāṃ yogakṣemaḥ kalpate/ satriṇāṃ yogakṣemasya klṛptimanvapi tasyārddhasya yogakṣemaḥ kalpate/ yasminnarddhe yajante

teṣāṃ vā unnetottamo dīkṣate/ prathamo'vabhṛthādudāyatāmudaiti/ prāṇo vā unnetā/ prāṇamevaiṣvetadubhayato dadhāti/ tathā sarvamāyuryanti/ tathā u ha na purā''yuṣo'smāllokātprayanti/ saiṣā'nupūrvadīkṣā/ sa yatra haivaṃ vidvāṃso dīkṣeran/ tadeva dīkṣeta