શતપથબ્રાહ્મણમ્ · અધ્યાય 12.1.1

૧૨.૧.૧.
ગવામયનબ્રાહ્મણમ્
અયં વૈ યજ્ઞો યોઽયં પવતે। તમેત ઈપ્સન્તિ, સંવત્સરાય દીક્ષન્તે। તેષાં ગૃહપતિઃ પ્રથમો દીક્ષતે। અયં વૈ લોકો ગૃહપતિઃ। અસ્મિન્ વૈ લોક ઇદં સર્વં પ્રતિષ્ઠિતમ્। ગૃહપતા ઉ વૈ સસત્રિણઃ પ્રતિષ્ઠિતાઃ પ્રતિષ્ઠાયામેવૈતત્ પ્રતિષ્ઠાય દીક્ષન્તે। - ૧૨.૧.૧.૧
અથ બ્રહ્માણં દીક્ષયતિ। ચન્દ્રમા વૈ બ્રહ્મા। સોમો વૈ ચન્દ્રમાઃ। સૌમ્યા ઓષધયઃ। ઓષધીસ્તદનેન લોકેન સંદધાતિ। તસ્માદેતાવંતરેણાન્યો ન દીક્ષેત। સ યદ્ધૈતાવન્તરેણાન્યો દીક્ષેત। ઓષધીસ્તદનેન લોકેન નાના કુર્યાત્। ઉચ્છોષુકા હ સ્યુઃ। તસ્માદેતાવન્તરેણાન્યો ન દીક્ષેત

અથોદ્ગાતારં દીક્ષયતિ। પર્જન્યો વા ઉદ્ગાતા। પર્જન્યાદુ વૈ વૃષ્ટિર્જાયતે। વૃષ્ટિં તદોષધિભિઃ સંદધાતિ। તસ્માદેતાવંતરેણાન્યો ન દીક્ષેત। સ યદ્ધૈતાવંતરેણાન્યો દીક્ષેત। વૃષ્ટિં તદોષધિભિર્નાના કુર્યાત્। અવર્ષુકો હ સ્યાત્। તસ્માદેતાવંતરેણાન્યો ન દીક્ષેત

અથ હોતારં દીક્ષયતિ। અગ્નિર્વૈ હોતાઽધિદેવતમ્। વાગધ્યાત્મમ્। અન્નં વૃષ્ટિઃ। અગ્નિં ચ તદ્વાચં ચાન્નેન સન્દધાતિ। તસ્માદેતાવન્તરેણાન્યો ન દીક્ષેત। સ યદ્ધૈતાવન્તરેણાન્યો દીક્ષેત। અગ્નિં ચ તદ્વાચં ચાન્નેન નાના કુર્યાત્। અશનાયુકા હ સ્યુઃ। તસ્માદેતાવન્તરેણાન્યો ન દીક્ષેત। એતાંશ્ચતુરોઽધ્વર્યુર્દીક્ષયતિ

અથાધ્વર્યું પ્રતિપ્રસ્થાતા દીક્ષયતિ। મનો વા અધ્વર્યુઃ। વાગ્ હોતા। મનશ્ચ તદ્વાચં ચ સન્દધાતિ। તસ્માદેતાવન્તરેણાન્યો ન દીક્ષેત। સ યદ્ધૈતાવન્તરેણાન્યો દીક્ષેત। મનશ્ચ તદ્વાચં ચ નાના કુર્યાત્। પ્રમાયુકા હ સ્યુઃ। તસ્માદેતાવન્તરેણાન્યો ન દીક્ષેત

અથ બ્રહ્મણે બ્રાહ્મણાચ્છંસિનં દીક્ષયતિ। તં હિ સોઽનુ। અથોદ્ગાત્રે પ્રસ્તોતારં દીક્ષયતિ। તં હિ સોઽનુ। અથ હોત્રે મૈત્રાવરુણં દીક્ષયતિ। તં હિ સોઽનુ। એતાંશ્ચતુરઃ પ્રતિપ્રસ્થાતા દીક્ષયતિ

અથાધ્વર્યવે પ્રતિપ્રસ્થાતારં નેષ્ટા દીક્ષયતિ। તં હિ સોઽનુ। એતેષાં વૈ નવાનાં ક્લૃપ્તિમન્વિતરે કલ્પન્તે। નવ વૈ પ્રાણાઃ। પ્રાણાનેવૈષ્વેતદ્દધાતિ। તથા સર્વમાયુર્યન્તિ। તથા ઉ હ ન પુરાઽઽયુષોઽસ્માલ્લોકાત્ પ્રયંતિ

અથ બ્રહ્મણે પોતારં દીક્ષયતિ। તં હિ સોઽનુ। અથોદ્ગાત્રે પ્રતિહર્તારં દીક્ષયતિ। તં હિ સોઽનુ। અથ હોત્રેઽચ્છાવાકં દીક્ષયતિ। તં હિ સોઽનુ। એતાંશ્ચતુરો નેષ્ટા દીક્ષયતિ

અથાધ્વર્યવે નેષ્ટારમુન્નેતા દીક્ષયતિ। તં હિ સોઽનુ। અથ બ્રહ્મણ આગ્નીધ્રં દીક્ષયતિ। તં હિ ઽનુ। અથોદ્ગાત્રે સુબ્રહ્મણ્યાં દીક્ષયતિ। તં હિ સોઽનુ। અથ હોત્રે ગ્રાવસ્તુતં દીક્ષયતિ। તં હિ સોઽનુ। એતાંશ્ચતુર ઉન્નેતા દીક્ષયતિ

અથોન્નેતારં સ્નાતકો વા બ્રહ્મચારી વાઽન્યો વા દીક્ષિતો દીક્ષયતિ। ન પૂતઃ પાવયેત્ ઇતિ હ્યાહુઃ। સૈષાઽનુપૂર્વદીક્ષા। સ યત્ર હૈવં વિદ્વાંસો દીક્ષન્તે। દીક્ષમાણા હૈવ તે યજ્ઞં કલ્પયન્તિ। યજ્ઞસ્ય ક્લૃપ્તિમનુ સત્રિણાં યોગક્ષેમઃ કલ્પતે। સત્રિણાં યોગક્ષેમસ્ય ક્લૃપ્તિમન્વપિ તસ્યાર્દ્ધસ્ય યોગક્ષેમઃ કલ્પતે। યસ્મિન્નર્દ્ધે યજન્તે

તેષાં વા ઉન્નેતોત્તમો દીક્ષતે। પ્રથમોઽવભૃથાદુદાયતામુદૈતિ। પ્રાણો વા ઉન્નેતા। પ્રાણમેવૈષ્વેતદુભયતો દધાતિ। તથા સર્વમાયુર્યન્તિ। તથા ઉ હ ન પુરાઽઽયુષોઽસ્માલ્લોકાત્પ્રયન્તિ। સૈષાઽનુપૂર્વદીક્ષા। સ યત્ર હૈવં વિદ્વાંસો દીક્ષેરન્। તદેવ દીક્ષેત