શતપથબ્રાહ્મણમ્ · અધ્યાય 11.6.2

જનકો હ વૈ વૈદેહો। બ્રાહ્મણૈર્ધાવયદ્ભિઃ સમાજગામ શ્વેતકેતુનાઽઽરુણેયેન સોમશુષ્મેણ સાત્યયજ્ઞિના યાજ્ઞવલ્ક્યેન તાન્હોવાચ કથઙ્કથમગ્નિહોત્રઞ્જુહુથેતિ -

સ હોવાચ શ્વેતકેતુરારુણેયઃ। ઘર્માવેવ સમ્રાડહમજસ્રૌ યશસા વિષ્યન્દમાનાવન્યોઽન્યસ્મિઞ્જુહોમીતિ કથં તદિત્યાદિત્યો વૈ ઘર્મસ્તં સાયમગ્નૌ જુહોમ્યગ્નિર્વૈ ઘર્મસ્તં પ્રાતરાદિત્યે જુહોમીતિ કિં સ ભવતિ ય એવં જુહોત્યજસ્ર એવ શ્રિયા યશસા ભવત્યેતયોશ્ચ દેવતયોઃ સાયુજ્યં સલોકતાં જયતીતિ -

અથ હોવાચ સોમશુષ્મઃ સાત્યયજ્ઞિઃ। તેજ એવ સમ્રાડહં તેજસિ જુહોમીતિ કથં તદિત્યાદિત્યો વૈ તેજસ્તં સાયમગ્નૌ જુહોમ્યગ્નિર્વૈ તેજસ્તં પ્રાતરાદિત્યે જુહોમીતિ કિં સ ભવતિ ય એવં જુહોતીતિ તેજસ્વી યશસ્વ્યન્નાદો ભવત્યેતયોશ્ચૈવ દેવતયોઃ સાયુજ્યં સલોકતાં જયતીતિ -

અથ હોવાચ યાજ્ઞવલ્ક્યઃ। યદહમગ્નિમુદ્ધરામ્યગ્નિહોત્રમેવ તદુદ્યચ્છામ્યાદિત્યં વા અસ્તં યન્તં સર્વે દેવા અનુયન્તિ તે મ એતમગ્નિમુદ્ધૃતં દૃષ્ટ્વોપાવર્તન્તેઽથાહં પાત્રાણિ નિર્ણિજ્યોપવાપ્યાગ્નિહોત્રીં દોહયિત્વા પશ્યન્પશ્યતસ્તર્પયામીતિ ત્વં નેદિષ્ઠં યાજ્ઞવલ્ક્યાગ્નિહોત્રસ્યામીમાંસિષ્ઠા ધેનુશતં દદામીતિ હોવાચ ન ત્વેવૈનયોસ્ત્વમુત્ક્રાન્તિં ન ગતિં ન પ્રતિષ્ઠાં ન તૃપ્તિં ન પુનરાવૃત્તિં ન લોકં પ્રત્યુત્થાયિનમિત્યુક્ત્વા રથમાસ્થાય પ્રધાવયાંચકાર -

તે હોચુઃ અતિ વૈ નોઽયં રાજન્યબન્ધુરવાદીદ્ધન્તૈનં બ્રહ્મોદ્યમાહ્વયામહા ઇતિ સ હોવાચ યાજ્ઞવલ્ક્યો બ્રાહ્મણા વૈ વયં સ્મો રાજન્યબન્ધુરસૌ યદ્યમું વયં જયેમ કમજૈષ્મેતિ બ્રૂયામાથ યદ્યસાવસ્માઞ્જયેદ્બ્રાહ્મણાન્રાજન્યબન્ધુરજૈષીદિતિ નો બ્રૂયુર્મેદમાદૃઢ્વમિતિ તદ્ધાસ્ય જજ્ઞુરથ હ યાજ્ઞવલ્ક્યો રથમાસ્થાયાનુપ્રધાવયાંચકાર તં હાન્વાજગામ સ હોવાચાગ્નિહોત્રં યાજ્ઞવલ્ક્ય વેદિતૂ૩ ઇત્યગ્નિહોત્રં સમ્રાડિતિ -

તે વા એતે આહુતી હુતે ઉત્ક્રામતઃ। તે અન્તરિક્ષમાવિશતસ્તે અન્તરિક્ષમેવાહવનીયં કુર્વાતે વાયું સમિધં મરીચીરેવ શુક્રામાહુતિં તે અન્તરિક્ષં તર્પયતસ્તે તત ઉત્ક્રામતઃ -

તે દિવમાવિશતઃ। તે દિવમેવાહવનીયં કુર્વાતે આદિત્યં સમિધં ચન્દ્રમસમેવ શુક્રામાહુતિં તે દિવં તર્પયતસ્તે તત આવર્તેતે -

તે ઇમામાવિશતઃ। તે ઇમામેવાહવનીયં કુર્વાતે અગ્નિં સમિધમોષધીરેવ શુક્રામાહુતિં તે ઇમાં તર્પયતસ્તે તત ઉત્ક્રામતઃ -

તે પુરુષમાવિશતઃ। તસ્ય મુખમેવાહવનીયં કુર્વાતે જિહ્વાં સમિધમન્નમેવ શુક્રામાહુતિં તે પુરુષં તર્પયતઃ સ ય એવં વિદ્વાનશ્નાત્યગ્નિહોત્રમેવાસ્ય હુતં ભવતિ તે તત ઉત્ક્રામતઃ -

તે સ્ત્રિયમાવિશતઃ। તસ્યા ઉપસ્થમેવાહવનીયં કુર્વાતે ધારકાં સમિધં ધારકા હ વૈ નામૈષૈતયા હ વૈ પ્રજાપતિઃ પ્રજા ધારયાંચકાર રેત એવ શુક્રામાહુતિં તે સ્ત્રિયં તર્પયતઃ સ ય એવં વિદ્વાન્મિથુનમુપૈત્યગ્નિહોત્રમેવાસ્ય હુતમ્ભવતિ યસ્તતઃ પુત્રો જાયતે સ લોકઃ પ્રત્યુત્થાય્યેતદગ્નિહોત્રં યાજ્ઞવલ્ક્ય નાતઃ પરમસ્તીતિ હોવાચ તસ્મૈ હ યાજ્ઞવલ્ક્યો વરં દદૌ સ હોવાચ કામપ્રશ્ન એવ મે ત્વયિ યાજ્ઞવલ્ક્યાસદિતિ તતો બ્રહ્મા જનક આસ -