શતપથબ્રાહ્મણમ્ · અધ્યાય 11.2.3

બ્રહ્મ વા ઇદમગ્ર આસીત્। તદ્દેવાનસૃજત તદ્દેવાન્ત્સૃષ્ટ્વૈષુ લોકેષુ વ્યારોહયદસ્મિન્નેવ લોકેઽગ્નિં વાયુમન્તરિક્ષે દિવ્યેવ સૂર્યમ્ -

અથ યેઽથ ઊર્ધ્વા લોકાઃ। તદ્યા અત ઊર્ધ્વા દેવતાસ્તેષુ તા દેવતા વ્યારોહયત્સ યથા હૈવેમ આવિર્લોકા ઇમાશ્ચ દેવતા એવમુ હૈવ ત આવિર્લોકાસ્તાશ્ચ દેવતા યેષુ તા દેવતા વ્યારોહયત્ -

અથ બ્રહ્મૈવ પરાર્દ્ધમગચ્છત્। તત્પરાર્દ્ધં ગત્વૈક્ષત કથંન્વિમાંલ્લોકાન્પ્રત્યવેયામિતિ તદ્દ્વાભ્યામેવ પ્રત્યવૈદ્રૂપેણ ચૈવ નામ્ના ચ સ યસ્ય કસ્ય ચ નામાસ્તિ તન્નામ યસ્યો અપિ નામ નાસ્તિ યદ્વેદ રૂપેણેદં રૂપમિતિ તદ્રૂપમેતાવદ્વા ઇદં યાવદ્રૂપં ચૈવ નામ ચ -

તે હૈતે બ્રહ્મણો મહતી અભ્વે। સ યો હૈતે બ્રહ્મણો મહતી અભ્વે વેદ મહદ્ધૈવાભ્વં ભવતિ -

તે હૈતે બ્રહ્મણો મહતી યક્ષ્યે। સ યો હૈતે બ્રહ્મણો મહતી યક્ષ્યે વેદ મહદ્ધૈવ યક્ષ્યં ભવતિ તયોરન્યતરજ્જ્યાયો રૂપમેવ યદ્ધ્યપિ નામ રૂપમેવ તત્સ યો હૈતયોર્જ્યાયો વેદ જ્યાયાન્હ તસ્માદ્ભવતિ યસ્માજ્જ્યાયાન્બુભૂષતિ -

મર્ત્યા હ વા અગ્રે દેવા આસુઃ। સ યદૈવ તે બ્રહ્મણાઽઽપુરથામૃતા આસુઃ સ યં મનસ આઘારયતિ મનો વૈ રૂપં મનસા હિ વેદેદં રૂપમિતિ તેન રૂપમાપ્નોત્યથ યં વાચ આઘારયતિ વાગ્વૈ નામ વાચા હિ નામ ગૃહ્ણાતિ તેનો નામાપ્નોત્યેતાવદ્વા ઇદં સર્વં યાવદ્રૂપં ચૈવ નામ ચ તત્સર્વમાપ્નોતિ સર્વં વા અક્ષય્યમેતેનો હાસ્યાક્ષય્યં સુકૃતં ભવત્યક્ષય્યો લોકઃ -

તદ્વા અદ આગ્નેય્યામિષ્ટા ઉદ્યતે। યથા તદૃષિભ્યો યજ્ઞઃ પ્રારોચત તં યથાઽતન્વત તદ્યજ્ઞં તન્વાનાનૃષીન્ગન્ધર્વા ઉપનિષેદુસ્તે હ સ્મ સંનિદધતીદં વા અત્યરીરિચન્નિદમૂનમક્રન્નિતિ સ યદૈષાં યજ્ઞઃ સંતસ્થેઽથૈનાંસ્તદ્દર્શયાંચક્રુરિદં વા અત્યરીરિચતેદમૂનમકર્તેતિ -

સ યદતિરેચયાંચક્રુઃ। યથા ગિરિરેવં તદાસાથ યદૂનં ચક્રુર્યથા શ્વભ્રાઃ પ્રદરા એવં તદાસ -

સ યત્ર શંયોરાહ। તદભિમૃશતિ યજ્ઞ નમશ્ચ ત ઉપ ચ યજ્ઞસ્ય શિવે સંતિષ્ઠસ્વ સ્વિષ્ટે મે સંતિષ્ઠસ્વેતિ સ યદતિરેચયતિ તન્નમસ્કારેણ શમયત્યથ યદૂનં કરોત્યુપ ચેતિ તેન તદન્યૂનં ભવતિ યજ્ઞસ્ય શિવે સંતિષ્ઠસ્વેતિ યદ્વૈ યજ્ઞસ્યાન્યૂનાતિરિક્તં તચ્છિવં તેન તદુભયં શમયતિ સ્વિષ્ટે મે સંતિષ્ઠસ્વેતિ યદ્વૈ યજ્ઞસ્યાન્યૂનાતિરિક્તં તત્સ્વિષ્ટં તેનો તદુભયં શમયત્યેવમુ હાસ્યૈતેન યજ્ઞેનાન્યૂનાતિરિક્તેનૈવેષ્ટં ભવતિ ય એવં વિદ્વાનેવમભિમૃશતિ તસ્માદેવમેવાભિમૃશેત્તે હ તે ગન્ધર્વા આસુઃ શૂર્પં યવમાન્કૃષિરુદ્વાલવાન્ધાનાન્તર્વાન્ -