Scripture Library

Shatapatha Brahmana · Chapter 11.2.1

11.2.1.11.2.1.1

trirha vai puruṣo jāyate/ etannveva mātuścādhi pituścāgre jāyate'tha yaṃ yajña upanamati sa yadyajate taddvitīyaṃ jāyate'tha yatra mriyate yatrainamagnāvabhyādadhati sa yattataḥ sambhavati tattṛtīyaṃ jāyate tasmāttriḥ puruṣo jāyata ityāhuḥ -

11.2.1.11.2.1.2

tā vā etāḥ/ ekādaśa sāmidhenīranvāha daśa vā ime puruṣe prāṇā ātmaikādaśo yasminnete prāṇāḥ pratiṣṭhitā etāvānvai puruṣastadenaṃ kṛtsnaṃ janayatyatha yadūrdhvaṃ sāmidhenībhyaḥ sā pratiṣṭhā tadenaṃ janayitvā pratiṣṭhāpayati -

11.2.1.11.2.1.3

nava prasavasya vyāhṛtayaḥ/ naveme puruṣe prāṇāstadenaṃ dvitīyaṃ janayatyāśrāvaṇaṃ pratyāśrāvaṇaṃ sā pratiṣṭhātha yadevādaḥ sṛṣṭau janmodyate tadenaṃ tṛtīyaṃ janayati patnīsaṃyājā eva tatra pratiṣṭhā -

11.2.1.11.2.1.4

trirhi vai puruṣo jāyate/ evamevainametadyajñāttrirjanayati tāsāmekādaśānāṃ triḥ prathamāmanvāha triruttamām -

11.2.1.11.2.1.5

tāḥ pañcadaśa sāmidhenyaḥ/ dvāvāghārau pañca prayājā iḍā trayo'nuyājāḥ sūktavākaśca śaṃyorvākaśca tāstrayodaśāhutayo'tha yadevādaḥ patnīsaṃyājeṣu sampragṛhṇāti samiṣṭayajuśca -

11.2.1.11.2.1.6

tāḥ pañcadaśāhutayaḥ/ tāsāṃ pañcadaśānāmāhutīnāmetā anuvākyā etāḥ pañcadaśa sāmidhenya etāsāmanuvākyānāmetā yājyā ya evātra mantro yo nigadastadyājyārūpameteno hāsyaitā āhutayo'nuvākyavatyo bhavantyetābhiḥ sāmidhenībhiretābhirāhutibhiretā anuvākyā yājyavatyaścāhutivatyaśca bhavanti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0