શતપથબ્રાહ્મણમ્ · અધ્યાય 11.2.1

ત્રિર્હ વૈ પુરુષો જાયતે। એતન્ન્વેવ માતુશ્ચાધિ પિતુશ્ચાગ્રે જાયતેઽથ યં યજ્ઞ ઉપનમતિ સ યદ્યજતે તદ્દ્વિતીયં જાયતેઽથ યત્ર મ્રિયતે યત્રૈનમગ્નાવભ્યાદધતિ સ યત્તતઃ સમ્ભવતિ તત્તૃતીયં જાયતે તસ્માત્ત્રિઃ પુરુષો જાયત ઇત્યાહુઃ -

તા વા એતાઃ। એકાદશ સામિધેનીરન્વાહ દશ વા ઇમે પુરુષે પ્રાણા આત્મૈકાદશો યસ્મિન્નેતે પ્રાણાઃ પ્રતિષ્ઠિતા એતાવાન્વૈ પુરુષસ્તદેનં કૃત્સ્નં જનયત્યથ યદૂર્ધ્વં સામિધેનીભ્યઃ સા પ્રતિષ્ઠા તદેનં જનયિત્વા પ્રતિષ્ઠાપયતિ -

નવ પ્રસવસ્ય વ્યાહૃતયઃ। નવેમે પુરુષે પ્રાણાસ્તદેનં દ્વિતીયં જનયત્યાશ્રાવણં પ્રત્યાશ્રાવણં સા પ્રતિષ્ઠાથ યદેવાદઃ સૃષ્ટૌ જન્મોદ્યતે તદેનં તૃતીયં જનયતિ પત્નીસંયાજા એવ તત્ર પ્રતિષ્ઠા -

ત્રિર્હિ વૈ પુરુષો જાયતે। એવમેવૈનમેતદ્યજ્ઞાત્ત્રિર્જનયતિ તાસામેકાદશાનાં ત્રિઃ પ્રથમામન્વાહ ત્રિરુત્તમામ્ -

તાઃ પઞ્ચદશ સામિધેન્યઃ। દ્વાવાઘારૌ પઞ્ચ પ્રયાજા ઇડા ત્રયોઽનુયાજાઃ સૂક્તવાકશ્ચ શંયોર્વાકશ્ચ તાસ્ત્રયોદશાહુતયોઽથ યદેવાદઃ પત્નીસંયાજેષુ સમ્પ્રગૃહ્ણાતિ સમિષ્ટયજુશ્ચ -

તાઃ પઞ્ચદશાહુતયઃ। તાસાં પઞ્ચદશાનામાહુતીનામેતા અનુવાક્યા એતાઃ પઞ્ચદશ સામિધેન્ય એતાસામનુવાક્યાનામેતા યાજ્યા ય એવાત્ર મન્ત્રો યો નિગદસ્તદ્યાજ્યારૂપમેતેનો હાસ્યૈતા આહુતયોઽનુવાક્યવત્યો ભવન્ત્યેતાભિઃ સામિધેનીભિરેતાભિરાહુતિભિરેતા અનુવાક્યા યાજ્યવત્યશ્ચાહુતિવત્યશ્ચ ભવન્તિ -