શતપથબ્રાહ્મણમ્ · અધ્યાય 11.1.4

૧૧.૧.૪ નૈમિત્તિકી ત્રિહવિષ્કા અભ્યુદયેષ્ટિઃ
તદ્ધૈકે દૃષ્ટ્વોપવસન્તિ। શ્વો નોદેતેત્યભ્રસ્ય વા હેતોરનિર્જ્ઞાય વાઽથોતોપવસન્ત્યથૈનમુતાભ્યુદેતિ સ યદ્યગૃહીતં હવિરભ્યુદિયાત્પ્રજ્ઞાતમેવ તદેષૈવ વ્રતચર્યા યત્પૂર્વેદ્યુર્દુગ્ધં દધિ હવિરાતઞ્ચનં તત્કુર્વન્તિ પ્રતિ પ્રમુઞ્ચન્તિ વત્સાંસ્તાન્પુનરપાકુર્વન્તિ -

તાનપરાહ્ણે પર્ણશાખયાપાકરોતિ। તદ્યથૈવાદઃ પ્રજ્ઞાતમામાવાસ્યં હવિરેવમેવ તદ્યદ્યુ વ્રતચર્યાં વા નોદાશંસેત ગૃહીતં વા હવિરભ્યુદિયાદિતરથો તર્હિ કુર્યાદેતાનેવ તણ્ડુલાન્ત્સુફલીકૃતાન્કૃત્વા સ યેઽણીયાંસસ્તાનગ્નયે દાત્રેઽષ્ટાકપાલં પુરોડાશં શ્રપયતિ -

અથ યત્પૂર્વેદ્યુઃ દુગ્ધં દધિ તદિન્દ્રાય પ્રદાત્રેઽથ તદાનીં દુગ્ધે વિષ્ણવે શિપિવિષ્ટાયૈતાંસ્તણ્ડુલાઞ્છૃતે ચરું શ્રપયતિ ચરુરુ હ્યેવ સ યત્ર ક્વ ચ તણ્ડુલાનાવપતિ -

તદ્યદેવં ભવતિ। એષ વૈ સોમો રાજા દેવાનામન્નં યચ્ચન્દ્રમાસ્તમેતદુપૈત્સીત્તમપારાત્સીત્તમસ્મા અગ્નિર્દાતા દદાતીન્દ્રઃ પ્રદાતા પ્રયચ્છતિ તમસ્મા ઇન્દ્રાગ્ની યજ્ઞં દત્તસ્તેનેન્દ્રાગ્નિભ્યાં દત્તેન યજ્ઞેન યજતેઽથ યદ્વિષ્ણવે શિપિવિષ્ટાયેતિ યજ્ઞો વૈ વિષ્ણુરથ યચ્છિપિવિષ્ટાયેતિ યમુપૈપ્સીત્તમપારાત્સીત્તચ્છિપિતમિવ યજ્ઞસ્ય ભવતિ તસ્માચ્છિપિવિષ્ટાયેતિ તત્રો યચ્છક્નુયાત્તદ્દદ્યાન્નાદક્ષિણં હવિઃ સ્યાદિતિ હ્યાહુરથ યદૈવ નોદિયાદથોપવસેત્ -