Scripture Library

Shatapatha Brahmana · Chapter 11.1.2

11.1.2.11.1.2.1

ghnanti vā etadyajñam/ yadenaṃ tanvate yanveva rājānamabhiṣuṇvaṃti tattaṃ ghnanti yatpaśuṃ saṃjñapayanti viśāsati tattaṃ ghnantyulūkhalamusalābhyāṃ dṛṣadupalābhyāṃ haviryajñaṃ ghnanti -

11.1.2.11.1.2.2

taṃ hatvā yajñam/ agnāveva yonau retobhūtaṃ siñcatyagnirvai yoniryajñasya sa tataḥ prajāyate taddaśatā āhutīḥ sampādayedyābhyo vaṣaṭkriyate -

11.1.2.11.1.2.3

ayaṃ vai yajño yo'yaṃ pavate/ so'yameka ivaiva pavate so'yaṃ puruṣe'ntaḥ praviṣṭo daśadhā vihitaḥ sa evaṃ kḷptaiḥ prāṇairagneryoneradhijāyate saiṣā daśākṣarā virāṭsaiṣā sampatsa yajñaḥ -

11.1.2.11.1.2.4

atho api nava syuḥ/ tannyūnāṃ virājaṃ karoti prajananāya nyūnādvā imāḥ prajāḥ prajāyante saiṣā sampatsa yajñaḥ -

11.1.2.11.1.2.5

atho apyekātiriktā syāt/ sā prajāpatimabhyatiricyate saiṣā sampatsa yajñaḥ -

11.1.2.11.1.2.6

atho api dve atirikte syātām/ dvandvaṃ vai mithunaṃ prajananaṃ mithunamevaitatprajananaṃ kriyate saiṣā sampatsa yajñaḥ -

11.1.2.11.1.2.7

atho api tisro'tiriktāḥ syuḥ/ dvandvamaha mithunaṃ prajananamatha yajjāyate tattṛtīyaṃ saiṣā sampatsa yajñaḥ -

11.1.2.11.1.2.8

atho api catasro'tiriktāḥ syuḥ/ tadyathaikaivaṃ catasrastrayo vā ime lokāstadimāneva
lokāṃstisṛbhirāpnoti prajāpatirvā atīmāṃllokāṃścaturthastatprajāpatimeva caturthyā''pnoti saiṣā sampatsa yajñaḥ -

11.1.2.11.1.2.9

sa yaddvābhyāmūnaṃ tadūnaṃ/ so'yajño yatpañcabhiratiriktaṃ tadatiriktaṃ so'yajñaḥ saiṣaiva daśatyadhi saṃpadeṣā viṃśatyāmeṣā''sahasrāt -

11.1.2.11.1.2.10

ājiṃ vā ete dhāvanti/ ye darśapūrṇamāsābhyāṃ yajante sa vai pañcadaśa varṣāṇi yajeta
teṣāṃ pañcadaśānāṃ varṣāṇāṃ trīṇi ca śatāni ṣaṣṭiśca paurṇamāsyaścāmāvāsyāśca trīṇi ca vai śatāni ṣaṣṭiśca saṃvatsarasya rātrayastadrātrīrāpnoti -

11.1.2.11.1.2.11

athāparāṇi pañcadaśaiva varṣāṇi yajeta/ teṣāṃ pañcadaśānāṃ varṣāṇāṃ trīṇi caiva śatāni ṣaṣṭiśca paurṇamāsyaścāmāvāsyāśca trīṇi ca vai śatāni ṣaṣṭiśca saṃvatsarasyāhāni tadahānyāpnoti tadveva saṃvatsaramāpnoti -

11.1.2.11.1.2.12

martyā ha vā agre devā āsuḥ/ sa yadaiva te saṃvatsaramāpurathāmṛtā āsuḥ sarvaṃ vai saṃvatsaraḥ sarvaṃ vā akṣayyameteno hāsyākṣayyaṃ sukṛtaṃ bhavatyakṣayyo lokaḥ -

11.1.2.11.1.2.13

sa ājisṛtāmekaḥ/ ya evaṃ vidvāṃstriṃśataṃ varṣāṇi yajate tasmādu triṃśatameva varṣāṇi yajeta yadyu dākṣāyaṇayajñī syādatho api pañcadaśaiva varṣāṇi yajetātra hyeva sā sampatsampadyate dve hi paurṇamāsyau yajate dve amāvāsye atro eva khalu sā sampadbhavati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0