શતપથબ્રાહ્મણમ્ · અધ્યાય 11.1.2

ઘ્નન્તિ વા એતદ્યજ્ઞમ્। યદેનં તન્વતે યન્વેવ રાજાનમભિષુણ્વંતિ તત્તં ઘ્નન્તિ યત્પશું સંજ્ઞપયન્તિ વિશાસતિ તત્તં ઘ્નન્ત્યુલૂખલમુસલાભ્યાં દૃષદુપલાભ્યાં હવિર્યજ્ઞં ઘ્નન્તિ -

તં હત્વા યજ્ઞમ્। અગ્નાવેવ યોનૌ રેતોભૂતં સિઞ્ચત્યગ્નિર્વૈ યોનિર્યજ્ઞસ્ય સ તતઃ પ્રજાયતે તદ્દશતા આહુતીઃ સમ્પાદયેદ્યાભ્યો વષટ્ક્રિયતે -

અયં વૈ યજ્ઞો યોઽયં પવતે। સોઽયમેક ઇવૈવ પવતે સોઽયં પુરુષેઽન્તઃ પ્રવિષ્ટો દશધા વિહિતઃ સ એવં કૢપ્તૈઃ પ્રાણૈરગ્નેર્યોનેરધિજાયતે સૈષા દશાક્ષરા વિરાટ્સૈષા સમ્પત્સ યજ્ઞઃ -

અથો અપિ નવ સ્યુઃ। તન્ન્યૂનાં વિરાજં કરોતિ પ્રજનનાય ન્યૂનાદ્વા ઇમાઃ પ્રજાઃ પ્રજાયન્તે સૈષા સમ્પત્સ યજ્ઞઃ -

અથો અપ્યેકાતિરિક્તા સ્યાત્। સા પ્રજાપતિમભ્યતિરિચ્યતે સૈષા સમ્પત્સ યજ્ઞઃ -

અથો અપિ દ્વે અતિરિક્તે સ્યાતામ્। દ્વન્દ્વં વૈ મિથુનં પ્રજનનં મિથુનમેવૈતત્પ્રજનનં ક્રિયતે સૈષા સમ્પત્સ યજ્ઞઃ -

અથો અપિ તિસ્રોઽતિરિક્તાઃ સ્યુઃ। દ્વન્દ્વમહ મિથુનં પ્રજનનમથ યજ્જાયતે તત્તૃતીયં સૈષા સમ્પત્સ યજ્ઞઃ -

અથો અપિ ચતસ્રોઽતિરિક્તાઃ સ્યુઃ। તદ્યથૈકૈવં ચતસ્રસ્ત્રયો વા ઇમે લોકાસ્તદિમાનેવ
લોકાંસ્તિસૃભિરાપ્નોતિ પ્રજાપતિર્વા અતીમાંલ્લોકાંશ્ચતુર્થસ્તત્પ્રજાપતિમેવ ચતુર્થ્યાઽઽપ્નોતિ સૈષા સમ્પત્સ યજ્ઞઃ -

સ યદ્દ્વાભ્યામૂનં તદૂનં। સોઽયજ્ઞો યત્પઞ્ચભિરતિરિક્તં તદતિરિક્તં સોઽયજ્ઞઃ સૈષૈવ દશત્યધિ સંપદેષા વિંશત્યામેષાઽઽસહસ્રાત્ -

આજિં વા એતે ધાવન્તિ। યે દર્શપૂર્ણમાસાભ્યાં યજન્તે સ વૈ પઞ્ચદશ વર્ષાણિ યજેત
તેષાં પઞ્ચદશાનાં વર્ષાણાં ત્રીણિ ચ શતાનિ ષષ્ટિશ્ચ પૌર્ણમાસ્યશ્ચામાવાસ્યાશ્ચ ત્રીણિ ચ વૈ શતાનિ ષષ્ટિશ્ચ સંવત્સરસ્ય રાત્રયસ્તદ્રાત્રીરાપ્નોતિ -

અથાપરાણિ પઞ્ચદશૈવ વર્ષાણિ યજેત। તેષાં પઞ્ચદશાનાં વર્ષાણાં ત્રીણિ ચૈવ શતાનિ ષષ્ટિશ્ચ પૌર્ણમાસ્યશ્ચામાવાસ્યાશ્ચ ત્રીણિ ચ વૈ શતાનિ ષષ્ટિશ્ચ સંવત્સરસ્યાહાનિ તદહાન્યાપ્નોતિ તદ્વેવ સંવત્સરમાપ્નોતિ -

મર્ત્યા હ વા અગ્રે દેવા આસુઃ। સ યદૈવ તે સંવત્સરમાપુરથામૃતા આસુઃ સર્વં વૈ સંવત્સરઃ સર્વં વા અક્ષય્યમેતેનો હાસ્યાક્ષય્યં સુકૃતં ભવત્યક્ષય્યો લોકઃ -

સ આજિસૃતામેકઃ। ય એવં વિદ્વાંસ્ત્રિંશતં વર્ષાણિ યજતે તસ્માદુ ત્રિંશતમેવ વર્ષાણિ યજેત યદ્યુ દાક્ષાયણયજ્ઞી સ્યાદથો અપિ પઞ્ચદશૈવ વર્ષાણિ યજેતાત્ર હ્યેવ સા સમ્પત્સમ્પદ્યતે દ્વે હિ પૌર્ણમાસ્યૌ યજતે દ્વે અમાવાસ્યે અત્રો એવ ખલુ સા સમ્પદ્ભવતિ -