Shatapatha Brahmana · Chapter 10.6.1

१०.६.१ vaiśvānarāgnyupāsanaṃ brāhmaṇam
atha haite'ruṇe/ aupaveśau samājagmuḥ satyayajñaḥ pauluṣirmahāśālo jābālo buḍila āśvatarāśvirindradyumno bhāllaveyo janaḥ śārkarākṣyaste ha vaiśvānare samāsata teṣāṃ ha vaiśvānare na samiyāya - १०.६.१.
te hocuḥ/ aśvapatirvā ayaṃ kaikeyaḥ samprati vaiśvānaraṃ veda taṃ gacchāmeti te hāśvapatiṃ kaikeyamājagmustebhyo ha pṛthagāvasathānpṛthagapacitīḥ pṛthaksāhasrāntsomānprovāca te ha prātarasaṃvidānā eva samitpāṇayaḥ praticakramira upa tvāyāmeti - १०.६.१.
sa hovāca/ yannu bhagavanto'nūcānā anūcānaputrāḥ kimidamiti te hocurvaiśvānaraṃ ha bhagavāntsamprati veda taṃ no brūhīti sa hovāca samprati khalu nvā ahaṃ vaiśvānaraṃ vedābhyādhatta samidha upetā stheti - १०.६.१.
sa hovācāruṇamaupaveśiṃ/ gautama kaṃ tvaṃ vaiśvānaraṃ vettheti pṛthivīmeva rājanniti hovācomiti hovācaiṣa vai vaiśvānara etaṃ hi vai tvaṃ pratiṣṭhāṃ vaiśvānaraṃ vettha tasmāttvaṃ pratiṣṭhitaḥ prajayā paśubhirasi yo vā etampratiṣṭhāṃ vaiśvānaraṃ vedāpa punarmṛtyuṃ jayati sarvamāyureti pādau tvā etau vaiśvānarasya pādau te'mlāsyatāṃ yadi ha nāgamiṣya iti pādau te'viditāvabhaviṣyatāṃ(te viditāvabhaviṣyatāṃ) yadi ha nāgamiṣya iti vā - १०.६.१.
atha hovāca satyayajñaṃ pauluṣim/ prācīnayogya kaṃ tvaṃ vaiśvānaraṃ vetthetyapa eva rājanniti hovācomiti hovācaiṣa vai rayirvaiśvānara etaṃ hi vai tvaṃ rayiṃ vaiśvānaraṃ vettha tasmāttvaṃ rayimānpuṣṭimānasi yo vā etaṃ rayiṃ vaiśvānaraṃ vedāpa punarmṛtyuṃ jayati sarvamāyureti vastistvā eṣa vaiśvānarasya vastistvā'hāsyadyadi ha nāgamiṣya iti vastiste'vidito'bhaviṣyadyadaॆ(vastiste vidito'bhaviṣyadyadi) ha nāgamiṣya' iti vā - १०.६.१.
atha hovāca mahāśālaṃ jābālam/ aupamanyava kaṃ tvaṃ vaiśvānaraṃ vetthetyākāśameva rājanniti hovācomiti hovācaiṣa vai bahulo vaiśvānara etaṃ hi vai tvaṃ bahulaṃ vaiśvānaraṃ vettha tasmāttvaṃ bahuḥ prajayā paśubhirasi yo vā etaṃ bahulaṃ vaiśvānaraṃ vedāpa punarmṛtyuṃ jayati sarvamāyuretyātmā tvā eṣa vaiśvānarasyātmā tvā'hāsyadyadi ha nāgamiṣya ityātmā te'vidito'bhaviṣyadyadi(te vidito'bhaviṣyadyadi) ha nāgamiṣya iti vā - १०.६.१.
atha hovāca buḍilamāśvatarāśvim/ vaiyāghrapadya kaṃ tvaṃ vaiśvānaraṃ vettheti vāyumeva rājanniti hovācomiti hovācaiṣa vai pṛthagvartmā vaiśvānara etaṃ hi vai tvaṃ pṛthagvartmānaṃ vaiśvānaraṃ vettha tasmāttvāṃ pṛthagrathaśreṇayo'nuyānti yo vā etaṃ pṛthagvartmānaṃ vaiśvānaraṃ vedāpa punarmṛtyuṃ jayati sarvamāyureti prāṇastvā eṣa vaiśvānarasya prāṇastvā'hāsyadyadi ha nāgamiṣya iti prāṇaste vidito 'bhaviṣyadyadi ha nāgamiṣya iti vā - १०.६.१.
atha hovācendradyumnaṃ bhāllaveyam/ vaiyāghrapadya kaṃ tvaṃ vaiśvānaraṃ vetthetyādityameva rājanniti hovācomiti hovācaiṣa vai sutatejā vaiśvānara etaṃ hi vai tvaṃ sutatejasaṃ vaiśvānaraṃ vettha tasmāttavaiṣa suto'dyamānaḥ pacyamāno'kṣīyamāṇo gṛheṣu tiṣṭhati yo vā etaṃ sutatejasaṃ vaiśvānaraṃ vedāpa punarmṛtyuṃ jayati sarvamāyureti cakṣustvā etadvaiśvānarasya cakṣustvā'hāsyadyadi ha nāgamiṣya iti cakṣuste'viditamabhaviṣyadyadi (cakṣuste viditamabhaviṣyadyadi) ha nāgamiṣya iti vā - १०.६.१.
atha hovāca janaṃ śārkarākṣyam/ sāyavasa kaṃ tvaṃ vaiśvānaraṃ vettheti divameva rājanniti hovācomiti hovācaiṣa vā atiṣṭhā vaiśvānara etaṃ hi vai tvamatiṣṭhāṃ vaiśvānaraṃ vettha tasmāttvaṃ samānānatitiṣṭhasi yo vā etamatiṣṭhāṃ vaiśvānaraṃ vedāpa punarmṛtyuṃ jayati sarvamāyureti mūrddhā tvā eṣa vaiśvānarasya mūrddhā tvā'hāsyadyadi ha nāgamiṣya iti mūrddhā te'vidito'bhaviṣyadyadi (te vidito'bhaviṣyadyadi) ha nāgamiṣya iti vā - १०.६.१.
tānhovāca ete vai yūyaṃ pṛthagvaiśvānarānvidvāṃsaḥ pṛthagannamaghasta prādeśamātramiva ha vai devāḥ suviditā abhisampannāstathā tu va enānvakṣyāmi yathā prādeśamātramevābhisampādayiṣyāmīti - १०.६.१.
sa hovāca/ mūrddhānamupadiśanneṣa vā atiṣṭhā vaiśvānara iti cakṣuṣī' upadiśannuvācaiṣa vai sutatejā vaiśvānara iti nāsike upadiśannuvācaiṣa vai pṛthagvartmā vaiśvānara iti mukhyamākāśamupadiśannuvācaiṣa vai bahulo vaiśvānara iti mukhyā apa upadiśannuvācaiṣa vai rayirvaiśvānaro iti cchubukamupadiśannuvācaiṣa vai pratiṣṭhā vaiśvānara iti sa eṣo'gnirvaiśvānaro yatpuruṣaḥ sa yo haitamevamagniṃ vaiśvānaraṃ puruṣavidhaṃ puruṣe'ntaḥ pratiṣṭhitaṃ vedāpa punarmṛtyuṃ jayati sarvamāyureti na hāsya bruvāṇaṃ cana vaiśvānaro hinasti - १०.६.१.