Shatapatha Brahmana · Chapter 10.4.4

prajāpatiṃ vai prajāḥ sṛjamānam pāpmā mṛtyurabhiparijaghāna sa tapo'tapyata sahasraṃ saṃvatsarānpāpmānaṃ vijihāsan -

tasya tapastepānasya ebhyo lomagartebhya ūrdhvāni jyotīṃṣyāyaṃstadyāni tāni jyotīṃṣyetāni tāni nakṣatrāṇi yāvantyetāni nakṣatrāṇi tāvanto lomagartā yāvanto lomagartāstāvantaḥ sahasrasaṃvatsarasya muhūrtāḥ -

sa sahasratame saṃvatsare sarvo'tyapavata sa yaḥ so'tyapavatāyameva sa vāyuryo'yaṃ pavate'tha yaṃ taṃ pāpmānamatyapavatedaṃ taccharīraṃ ka u tasmai manuṣyo yaḥ sahasrasaṃvatsaramavarundhīta vidyayā ha vā evaṃvitsahasrasaṃvatsaramavarunddhe -

sarvā evaitā iṣṭakāḥ sāhasrīrupāsīta rātrisahasreṇa rātrisahasreṇaikaikāṃ pariśritaṃ sampannāmupāsītāhaḥsahasreṇāhaḥsahasreṇaikaikāmaharbhājamardhamāsasahasreṇārdha māsasahasreṇaikaikāmardhamāsabhājaṃ māsasahasreṇamāsasahasreṇaikaikāṃ māsabhājamṛtusahasreṇa'rtusahasreṇaikaikāmṛtubhājaṃ muhūrtasahasreṇamuhūrtasahasreṇaikaikāṃ muhūrtabhājaṃ saṃvatsarasahasreṇa saṃvatsaraṃ te ya etamevamagniṃ saṃvatsareṇa sampannaṃ viduḥ sahasratamīṃ hāsya te kalāṃ viduratha ya enamevaṃ na vidurna hāsya te sahasratamīṃ cana kalāṃ viduratha ya evaivaṃ veda yo vaitatkarma kurute sa haivaitaṃ sarvaṃ kṛtsnaṃ prājāpatyamagnimāpnoti yaṃ prajāpatirāpnottasmādevaṃvittapa eva tapyeta yadu ha vā evaṃvittapa eva tapyata ā maithunātsarvaṃ hāsya tatsvargaṃ lokamabhisambhavati -

tadetadṛcābhyuktam na mṛṣā śrāntaṃ yadavanti devā iti na haivaivaṃ viduṣaḥ kiṃcana mṛṣā śrāntaṃ bhavati tatho hāsyaitatsarvaṃ devā avanti -