શતપથબ્રાહ્મણમ્ · અધ્યાય 10.4.4

પ્રજાપતિં વૈ પ્રજાઃ સૃજમાનમ્ પાપ્મા મૃત્યુરભિપરિજઘાન સ તપોઽતપ્યત સહસ્રં સંવત્સરાન્પાપ્માનં વિજિહાસન્ -

તસ્ય તપસ્તેપાનસ્ય એભ્યો લોમગર્તેભ્ય ઊર્ધ્વાનિ જ્યોતીંષ્યાયંસ્તદ્યાનિ તાનિ જ્યોતીંષ્યેતાનિ તાનિ નક્ષત્રાણિ યાવન્ત્યેતાનિ નક્ષત્રાણિ તાવન્તો લોમગર્તા યાવન્તો લોમગર્તાસ્તાવન્તઃ સહસ્રસંવત્સરસ્ય મુહૂર્તાઃ -

સ સહસ્રતમે સંવત્સરે સર્વોઽત્યપવત સ યઃ સોઽત્યપવતાયમેવ સ વાયુર્યોઽયં પવતેઽથ યં તં પાપ્માનમત્યપવતેદં તચ્છરીરં ક ઉ તસ્મૈ મનુષ્યો યઃ સહસ્રસંવત્સરમવરુન્ધીત વિદ્યયા હ વા એવંવિત્સહસ્રસંવત્સરમવરુન્દ્ધે -

સર્વા એવૈતા ઇષ્ટકાઃ સાહસ્રીરુપાસીત રાત્રિસહસ્રેણ રાત્રિસહસ્રેણૈકૈકાં પરિશ્રિતં સમ્પન્નામુપાસીતાહઃસહસ્રેણાહઃસહસ્રેણૈકૈકામહર્ભાજમર્ધમાસસહસ્રેણાર્ધ માસસહસ્રેણૈકૈકામર્ધમાસભાજં માસસહસ્રેણમાસસહસ્રેણૈકૈકાં માસભાજમૃતુસહસ્રેણઽર્તુસહસ્રેણૈકૈકામૃતુભાજં મુહૂર્તસહસ્રેણમુહૂર્તસહસ્રેણૈકૈકાં મુહૂર્તભાજં સંવત્સરસહસ્રેણ સંવત્સરં તે ય એતમેવમગ્નિં સંવત્સરેણ સમ્પન્નં વિદુઃ સહસ્રતમીં હાસ્ય તે કલાં વિદુરથ ય એનમેવં ન વિદુર્ન હાસ્ય તે સહસ્રતમીં ચન કલાં વિદુરથ ય એવૈવં વેદ યો વૈતત્કર્મ કુરુતે સ હૈવૈતં સર્વં કૃત્સ્નં પ્રાજાપત્યમગ્નિમાપ્નોતિ યં પ્રજાપતિરાપ્નોત્તસ્માદેવંવિત્તપ એવ તપ્યેત યદુ હ વા એવંવિત્તપ એવ તપ્યત આ મૈથુનાત્સર્વં હાસ્ય તત્સ્વર્ગં લોકમભિસમ્ભવતિ -

તદેતદૃચાભ્યુક્તમ્ ન મૃષા શ્રાન્તં યદવન્તિ દેવા ઇતિ ન હૈવૈવં વિદુષઃ કિંચન મૃષા શ્રાન્તં ભવતિ તથો હાસ્યૈતત્સર્વં દેવા અવન્તિ -