શતપથબ્રાહ્મણમ્ · શ્લોક 10.3-4

તદાહુઃ કિં છન્દઃ કા દેવતાગ્નેઃ શિર ઇતિ ગાયત્રી છન્દોઽગ્નિર્દેવતા શિરઃ -

કિં છન્દઃ કા દેવતા ગ્રીવા ઇત્યુષ્ણિક્છન્દઃ સવિતા દેવતા ગ્રીવાઃ -

કિં છન્દઃ કા દેવતાનૂકમિતિ બૃહતી છન્દો બૃહસ્પતિર્દેવતાનૂકમ્ -

કિં છન્દઃ કા દેવતા પક્ષાવિતિ બૃહદ્રથન્તરે ચ્છન્દો દ્યાવાપૃથિવી દેવતે પક્ષૌ -

કિં છન્દઃ કા દેવતા મધ્યમિતિ ત્રિષ્ટુપ્છન્દ ઇન્દ્રો દેવતા મધ્યમ્ -

કિં છન્દઃ કા દેવતા શ્રોણી ઇતિ જગતી છન્દ આદિત્યો દેવતા શ્રોણી -

કિં છન્દઃ કા દેવતા યસ્માદિદં પ્રાણાદ્રેતઃ સિચ્યત ઇત્યતિચ્છન્દાશ્છન્દઃ પ્રજાપતિર્દેવતા -

કિં છન્દઃ કા દેવતા યોઽયમવાઙ્પ્રાણ ઇતિ યજ્ઞાયજ્ઞિયં છન્દો વૈશ્વાનરો દેવતા -

કિં છન્દઃ કા દેવતોરૂ ઇત્યનુષ્ટુપ્છન્દો વિશ્વે દેવા દેવતોરૂ -

કિં છન્દઃ કા દેવતાઽષ્ઠીવન્તાવિતિ પઙ્ક્તિશ્છન્દો મરુતો દેવતાઽષ્ઠીવન્તૌ -

કિં છન્દઃ કા દેવતા પ્રતિષ્ઠે ઇતિ દ્વિપદા ચ્છન્દો વિષ્ણુર્દેવતા પ્રતિષ્ઠે -

કિં છન્દઃ કા દેવતા પ્રાણા ઇતિ વિચ્છન્દાશ્છન્દો વાયુર્દેવતા પ્રાણાઃ -

કિં છન્દઃ કા દેવતોનાતિરિક્તાનીતિ ન્યૂનાક્ષરા છન્દ આપો દેવતોનાતિરિક્તાનિ સૈષાઽઽવિદ્યૈવૈતન્મયો હૈવૈતા દેવતા એતમાત્માનમભિસમ્ભવતિ ન હાત્રાન્યા લોક્યતાયા આશીરસ્તિ -