Shatapatha Brahmana · Verses 1.6-5

१.६.१ prayājānāmiṣṭau prāthamyam
ṛtavo ha vai deveṣu yajñe bhāgamīṣire / ā no yajñe bhajata mā no yajñādantargatāstveva no'pi yajñe bhāga iti -

tadvai devā na jajñuḥ / ta ṛtavo deveṣvajānatsvasurānupāvartantāpriyāndevānāṃ dviṣato bhrātṛvyān-

te haitāmedhatumedhāṃ cakrire / yāmeṣāmetāmanuśṛṇvanti kṛṣanto ha smaiva pūrve vapanto yanti lunanto'pare mṛṇantaḥ śaśvaddhaibhyo'kṛṣṭapacyā evauṣadhayaḥ pecire -

tadvai devānāmāga āsa / kanīya innvato dviṣandviṣate'rātīyati kimvetāvanmātramupajānīta yathedamito'nyathāsaditi -

te hocuḥ ṛtūnevānumantrayāmahā iti keneti prathamānevainānyajñe yajāmeti -

sa hāgniruvāca / atha yanmāṃ purā prathamaṃ yajatha kvāhaṃ bhavānīti na tvāmāyatanāccyāvayāma iti te yadṛtūnabhihvayamānā athāgnimāyatanānnācyāvayaṃstasmādagniracyuto na ha vā āyatanāccyavate yasminnāyatane bhavati ya evametamagnimacyutaṃ veda -

te devā agnimabruvan parehyenāṃstvamevānumantrayasveti sa hetyāgniruvāca'rtevo'vidaṃ vai vo deveṣu yajñe bhāgamiti kathaṃ no'vida iti prathamāneva vo yajñe yakṣyantīti -

ta ṛtavo'gnimabruvan / ā vayaṃ tvāmasmāsu bhajāmo yo no deveṣu yajñe bhāgamavida iti sa eṣo'gnirṛtuṣvābhaktaḥ samidho agne tanūnapādagna iḍo agne barhiragne svāhāgnimityābhakto ha vai tasyāṃ puṇyakṛtyāyāṃ bhavati yāmasya samāno bruvāṇaḥ karotyagnimate ha vā asmā agnimanta ṛtava oṣadhīḥ pacantīdaṃ sarvaṃ ya evametamagnimṛtuṣvābhaktaṃ veda -

tadāhuḥ / yaduttamānprayājānāvāhayantyatha kasmādenānprathamānyajantītyuttamānhyenānyajñe'vākalpayanprathamānvo yajāmetyabruvaṃstasmāduttamānāvāhayanti prathamānyajanti -

caturthena vai prayājena devāḥ / yajñamāpnuvaṃstaṃ pañcamena samasthāpayannatha yadata ūrdhvamasaṃsthitaṃ yajñasya svargameva tena lokaṃ samāśnuvata -

te svargaṃ lokaṃ yantaḥ / asurarakṣasebhya āsaṅgādbibhayāṃ cakruste'gnimpurastādakurvata rakṣohaṇaṃ rakṣasāmapahantāramagniṃ madhyato'kurvata rakṣohaṇaṃ rakṣasāmapahantāramagniṃ paścādakurvata rakṣohaṇaṃ rakṣasāmapahantāraṃ -

sa yadyenānpurastāt / asurarakṣasānyāsisaṃkṣannagnireva tānyapāhanrakṣohā rakṣasāmapahantā yadi madhyata āsisaṃkṣannagnireva tānyapāhanrakṣohā rakṣasāmapahantā yadi paścādāsisaṃkṣannagnireva tānyapāhanrakṣohā rakṣasāmapahantā ta evaṃ sarvato'gnibhirgupyamānāḥ svargaṃ lokaṃ samāśnuvata -

tatho evaiṣa etat / caturthenaiva prayājena yajñamāpnoti taṃ pañcamena saṃsthāpayatyatha yadata ūrdhvamasaṃsthitaṃ yajñasya svargameva tena lokaṃ samaśnute -

sa yadāgneyamājyabhāgaṃ yajati / agnimevaitatpurastātkurute rakṣohaṇaṃ rakṣasāmapahantāramatha yadāgneyaḥ puroḍāśo bhavatyagnimevaitanmadhyataḥ kurute rakṣohaṇaṃ rakṣasāmapahantāramatha yadagniṃ sviṣṭakṛtaṃ yajatyagnimevaitatpaścātkurute rakṣohaṇaṃ rakṣasāmapahantāraṃ -

sa yadyenaṃ purastāt / asurarakṣasānyāsisaṃkṣantyāgnereva tānyapahanti rakṣohā rakṣasāmapahantā yadi madhyata asurarakṣasānyāsisaṃkṣantyagnireva tānyapahanti rakṣohā rakṣasāmapahantā yadi paścādasurarakṣasānyāsisaṃkṣantyagnireva tānyapahanti rakṣohā rakṣasāmapahantā sa evaṃ sarvato'gnibhirgupyamānaḥ svargaṃ lokaṃ samaśnute -

sa yadyenaṃ purastāt / yajñasyānuvyāharettaṃ pratibrūyānmukhyāmārttimāriṣyasyandho vā badhiro vā bhaviṣyasītyetā vai mukhyā ārttayastathā haiva syāt -

yadi madhyato yajñasyānuvyāharet / taṃ prati brūyādaprajā apaśurbhaviṣyasīti prajā vai paśavo madhyaṃ tathā haiva syāt -

yadyantato yajñasyānuvyāharet / taṃ prati brūyādapratiṣṭhito daridraḥ kṣipre'muṃ lokameṣyasīti tathā haiva syāttasmādu ha nānuvyāhārīva syāduta hyevaṃvitparo bhavati -

saṃvatsaraṃ ha vai prayājairjayañjayati / sa ha nvevainaṃ jayati yo'sya dvārāṇi veda kiṃ hi sa tairgṛhaiḥ kuryādyānantarato na vyavavidyādyathāyathāsya te bhavanti tasya vasanta eva dvāraṃ hemanto dvāraṃ taṃ vā etaṃ saṃvatsaraṃ svargaṃ lokamprapadyate sarvaṃ vai saṃvatsaraḥ sarvaṃ vā akṣayyametena hāsyākṣayyaṃ sukṛtambhavatyakṣayyo lokaḥ -

tadāhuḥ / kiṃdevatyānyājyānīti prājāpatyānīti ha brūyādanirukto vai prajāpatiraniruktānyājyāni tāni haitāni yajamānadevatyānyeva yajamāno hyeva sve yajñe prajāpatiretena hyuktā ṛtvijastanvate taṃ janayanti -

sa ājyasyopastīrya / dvirhaviṣo'vadāyāthopariṣṭādājyasyābhighārayati saiṣājyena miśrāhutirhūyate yajamānena haivaiṣaitanmiśrā hūyate yadi ha vā api dūre sanyajate yadyantike yathā haivānte sata iṣṭaṃ syādevaṃ haivaivaṃ viduṣa iṣṭaṃ bhavati yadyu hāpi bahviva pāpaṃ karoti no haiva bahirdhā yajñādbhavati ya evametadveda -