Shatapatha Brahmana · Chapter 1.4.3

१.४.३ śāntikarma
yo ha vā agniḥ sāmidhenībhiḥ samiddhaḥ / atitarāṃ ha vai sa itarasmādagnestapatyanavadhṛṣyo hi bhavatyanavamṛśyaḥ -

sa yathā haivāgniḥ / sāmidhenībhiḥ samiddhastapatyevaṃ haiva brāhmaṇaḥ sāmidhenīrvidvānanubruvaṃstapatyanavadhṛṣyo hi bhavatyanavamṛśyaḥ -

so'nvāha / prava iti prāṇo vai pravānprāṇamevaitayā saminddhe'gna āyāhi vītaya ityapāno vā etavānapānamevaitayā saminddhe bṛhacchocā yaviṣṭhyetyudāno vai bṛhacchocā udānamevaitayā saminddhe -

sa naḥ pṛthu śravāyyamiti / śrotraṃ vai pṛthu śravāyyaṃ śrotreṇa hīdamuru pṛthu śṛṇoti śrotramevaitayā saminddhe -

īḍenyo namasya iti / vāgvā īḍenyā vāgghīdaṃ sarvamīṭṭe vācedaṃ sarvamīḍitaṃ vācamevaitayā saminddhe -

aśvo na devavāhana iti / mano vai devavāhanaṃ mano hīdaṃ manasvinaṃ bhūyiṣṭhaṃ vanīvāhyate mana evaitayā saminddhe -

agne dīdyataṃ bṛhaditi / cakṣurvai dīdayeva cakṣurevaitayā saminddhe -

agniṃ dūtaṃ vṛṇīmaha iti / ya evāyaṃ madhyamaḥ prāṇa etamevaitayā samindhe sā haiṣāntasthā prāṇānāmato hyanya ūrdhvāḥ prāṇā ato'nye'vāñco'ntasthā ha bhavatyantasthāmenaṃ manyante ya evametāmantasthāṃ prāṇānāṃ veda -

śociṣkeśastamīmaha iti / śiśnaṃ vai śociṣkeśaṃ śiśnaṃ hīdaṃ śiśnaṃ bhūyiṣṭhaṃ śocayati śiśnamevaitayā saminddhe -

samiddho agna āhuteti / ya evāyamavāṅprāṇa etamevaitayā saminddha ā juhotā duvasyateti sarvamātmānaṃ saminddha ā nakhebhyo'tho lomabhyaḥ -

sa yadyenaṃ prathamāyāṃ sāmidhenyāmanuvyāharet / taṃ prati brūyātprāṇaṃ vā etadātmano'gnāvādhāḥ prāṇenātmana ārttimāriṣyasīti tathā haiva syāt -

yadi dvitīyasyāmanuvyāharet / taṃ prati brūyādapānaṃ vā etadātmano'gnāvādhā apānenātmana ārttimāriṣyasīti tathā haiva syāt -

yadi tṛtīyasyāmanuvyāharet / taṃ prati brūyādudānaṃ vā etadātmano'gnāvādhāḥ udānenātmana ārttimāriṣyasīti tathā haiva syāt -

yadi caturthyāmanuvyāharet / taṃ pratibrūyācchrotraṃ vā etadātmano'gnāvādhāḥ śrotreṇātmana ārttimāriṣyasi badhiro bhaviṣyasīti tathā haiva syāt -

yadi pañcamyāmanuvyāharet / taṃ prati brūyādvācaṃ vā etadātmano'gnāvādhā vācātmana ārttimāriṣyasi mūko bhaviṣyasīti tathā haivasyāt -

yadi ṣaṣṭhyāmanuvyāharet / taṃ prati brūyānmano vā etadātmano'gnāvādhā manasātmana ārttimāriṣyasi manomuṣigṛhīto momughaścariṣyasīti tathā haiva syāt -

yadi saptamyāṃ anuvyāharet taṃ prati brūyāccakṣurvā etadātmano'gnāvādhāścakṣuṣātmana ārttimāriṣyasyandho bhaviṣyasīti tathā haiva syāt -

yadyaṣṭamyāmanuvyāhet/ taṃ prati brūyānmadhyaṃ vā etatprāṇamātmano'gnāvādhā madhyena prāṇenātmana ārttimāriṣyasyuddhmāya mariṣyasīti tathā haiva syāt -

yadi navamyāmanuvyāharet/ taṃ pratibrūyācchiśnaṃ vā etadātmano'gnāvādhāḥ śiśnenātmana ārttimāriṣyasi klībo bhaviṣyasīti tathā haivasyāt -

yadi daśamyāmanuvyāharet/ taṃ prati brūyādavāñcaṃ vā etatprāṇamātmano'gnāvādhā avācā prāṇenātmana ārttimāriṣyasyapinaddho mariṣyasīti tathā haiva syāt -

yadyekādaśyāmanuvyāhet/ taṃ prati brūyātsarvaṃ vā etadātmānamagnāvādhāḥ sarveṇātmanārttirmāriṣyasi kṣipre'muṃ lokameṣyasīti tathā haiva syāt -

sa yathā haivāgnim / sāmidhenībhiḥ samiddhamāpadyārttiṃ nyetyevaṃ haiva brāhmaṇaṃ sāmidhenīrvidvāṃsaṃ samanubruvantamanuvyāhṛtyārttiṃ nyeti -