Scripture Library

Shatapatha Brahmana · Chapter 1.1.2

1.1.2.1.1.2.1

१.१.२ pātrāsādanam
atha śūrpaṃ cāgnihotrahavaṇīṃ cādatte / karmaṇe vāṃ veṣāya vāmiti yajño vai karma yajñāya hi tasmādāha karmaṇe vāmiti veṣāya vāmiti veveṣṭīva hi yajñam -

1.1.2.1.1.2.2

atha vācaṃ yacchati / vāgvai yajño'vikṣubdho yajñaṃ tanavā ityatha pratapati pratyuṣṭaṃ rakṣaḥ pratyuṣṭā arātayo niṣṭaptaṃ rakṣo niṣṭaptā arātaya iti vā -

1.1.2.1.1.2.3

devā ha vai yajñaṃ tanvānāḥ / te'surarakṣasebhya āsaṅgādbibhayāñcakrustad yajñamukhādevaitannāṣṭrā rakṣāṃsyato'pahanti -

1.1.2.1.1.2.4

atha praiti / urvantarikṣamanvemītyantarikṣaṃ vā anurakṣaścaratyamūlamubhayataḥ paricchinnaṃ yathāyaṃ puruṣo'mūla ubhayataḥ paricchinno'ntarikṣamanucarati tadbrahmaṇaivaitadantarikṣamabhayamanāṣṭraṃ kurute -

1.1.2.1.1.2.5

sa vā anasa eva gṛhṇīyāt / ano ha vā agre paśceva vā idaṃ yacchālaṃ sa yadevāgre
tatkaravāṇiti tasmādanasa eva gṛhṇīyāt -

1.1.2.1.1.2.6

bhūmā vā anaḥ / bhūmā hi vā anastasmādyadā bahu bhavatyanovāhyamabhūdityāhustadbhūmānamevaitadupaiti tasmādanasa eva gṛhṇīyāt -

1.1.2.1.1.2.7

yajño vā anaḥ/ yajño hi vā anastasmād anasa eva yajūṃṣi santi/ na kauṣṭhasya na kumbhyai bhastrāyai ha smarṣayo gṛhṇanti tadvṛṣīnprati bhastrāyai yajūṃṣyāsustānyetarhi prākṛtāni yajñādyajñaṃ nirmimā iti tasmādanasa eva gṛhṇīyāt -

1.1.2.1.1.2.8

uto pātryai gṛhṇanti/ anantarāyamu tarhi yajūṃṣi japet/ sphyamu tarhyadhastādupohya gṛhṇīyādyato yunajāma tato vimuñcanti -

1.1.2.1.1.2.9

tasya vā etasyānasaḥ / agnireva dhūragnirhi vai dhūratha ya enadvahantyagnidagdhamivaiṣāṃ vahaṃ bhavatyatha yajjaghanena kastambhīṃ praugaṃ vedirevāsya sā nīḍa eva havirdhānam -

1.1.2.1.1.2.10

sa dhuramabhimṛśati / dhūrasi dhūrva dhūrvantaṃ dhūrva taṃ yo'smāndhūrvati taṃ dhūrvayaṃ vayaṃ dhūrvāma ityagnirvā eṣa dhuryastametadatyeṣyanbhavati havirgrahiṣyaṃstasmā evaitānnihnute tatho haitameṣo'tiyantamagnirdhuryo na hinasti -

1.1.2.1.1.2.11

taddha smaitadāruṇirāha / adharmāsaśo vā ahaṃ sapatnāndhūrvāmītyetaddha sma sa tadabhyāha -

1.1.2.1.1.2.12

atha jaghanena kastambhīmīṣāmabhimṛśya japati / devānāmasi vahnitamaṃ sasnitamaṃ papritamaṃ juṣṭatamaṃ devahūtamam / hrutamasi havirdhānaṃ dṛṃhasva mā hvārityana evaitadupastautyupastutādrātamanaso havirgṛhṇānīti mā te yajñapatirhvārṣīditi yajamāno vai yajñapatistadyajamānāyaivaitadahvalāmāśāste -

1.1.2.1.1.2.13

athākramate / viṣṇustvā kramatāmiti yajño vai viṣṇuḥ sa devebhya imāṃ vikrāntiṃ vicakrame yaiṣāmiyaṃ vikrāntiridameva prathamena padena paspārāthedamantarikṣaṃ dvitīyena divamuttamenaitāmvevaiṣa etasmai viṣṇuryajño vikrāntiṃ vikramate-

1.1.2.1.1.2.14

atha prekṣate / uru vātāyeti prāṇo vai vātastadbrahmaṇaivaitatprāṇāya vātāyorugāyaṃ kurute -

1.1.2.1.1.2.15

athāpāsyati / apahataṃ rakṣa iti yadyatra kiñcidāpannaṃ bhavati yadyu nābhyevamṛśettannāṣṭrā evaitadrakṣāṃsyato'pahanti -

1.1.2.1.1.2.16

athābhipadyate / yacchantāṃ pañceti pañca vā imā aṅgulayaḥ pāṅkto vai yajñastadyajñamevaitadatra dadhāti -

1.1.2.1.1.2.17

atha gṛhṇāti / devasya tvā savituḥ prasave'śvinorbāhubhyāṃ pūṣṇo hastābhyām agnaye juṣṭaṃ gṛhṇāmīti savitā vai devānāṃ prasavitā tatsavitṛprasūta evaitadgṛhṇāti aśvinorbāhubhyāmityaśvināvadhvaryū pūṣṇo hastābhyāmiti pūṣā bhāgadugho'śanaṃ pāṇibhyāmupanidhātā satyaṃ devā anṛtammanuṣyāstatsatyenaivaitadgṛhṇāti -

1.1.2.1.1.2.18

atha devatāyā ādiśati / sarvā ha vai devatā adhvaryuṃ havirgṛhīṣyantamupatiṣṭhante mama nāma grahīṣyati mama nāma grahīṣyatīti tābhya evaitatsaha satībhyo'samadaṃ karoti -

1.1.2.1.1.2.19

yadveva devatāyā ādiśati / yāvatībhyo ha vai devatābhyo havīṃṣi gṛhyanta ṝṇamu haiva tāstena manyante yadasmai taṃ kāmaṃ samardhayeyuryatkāmyā gṛhṇāti tasmādvai devatāyā'ādiśatyevameva yathāpūrvaṃ havīṃṣi gṛhītvā -

1.1.2.1.1.2.20

athābhimṛśati / bhūtāya tvā nārātaya iti tadyata eva gṛhṇāti tadevaitatpunarāpyāyayati -

1.1.2.1.1.2.21

atha prāṅprekṣate / svarabhivikhyeṣamiti parivṛtamiva vā etadano bhavati tadasyaitaccakṣuḥ pāpmagṛhītamiva bhavati yajño vai svarahardevāḥ sūryastatsvarevaitadatobhivipaśyati -

1.1.2.1.1.2.22

athāvarohati / dṛṃhantāṃ duryāḥ pṛthivyāmiti gṛhā vai duryāste haita īśvaro gṛhā yajamānasya yo'syaiṣo'dhvaryuryajñena carati taṃ prayantamanupracyotostasyeśvaraḥ kulaṃ vikṣobdhostānevaitadasyāṃ pṛthivyāṃ dṛṃhati tathā nānupracyavante tathā na vikṣobhante tasmādāha dṛṃhantāṃ duryāḥ pṛthivyāmityatha praityurvantarikṣamanvemīti so'sāveva bandhuḥ -

1.1.2.1.1.2.23

sa yasya gārhapatye havīṃṣi śrapayanti / gārhapatye tasya pātrāṇi saṃsādayanti jaghaneno tarhi gārhapatyaṃ sādayedyasyāhavanīye havīṃṣi śrapayantyāhavanīye tasya pātrāṇi saṃsādayanti jaghaneno tarhyāhavanīyaṃ sādayetpṛthivyāstvā nābhau sādayāmīti madhyaṃ vai nābhirmadhyamabhayaṃ tasmādāha pṛthivyāstvā nābhau sādayāmītyadityā upastha ityupastha ivainadabhārṣuriti vā āhuryatsuguptaṃ gopāyanti tasmādāhādityā upastha ityagne havyaṃ rakṣeti tadagnaye caivaitaddhaviḥ paridadāti guptyā asyai ca pṛthivyai tasmādāhāgne havyaṃ rakṣeti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0