Shadvimsha Brahmana · Chapter p1

atha caturtho'dhyāyaḥ
svarāntaḥ prathamastrirātro gāyatrī

prāṇo vai gāyatrī prajāpatiḥ svaraḥ prajāpatimevāpnoti

nidhanānto dvitīyastriṣṭup

vīryyam̐ vai triṣṭuptraiṣṭubhaḥ puruṣaḥ puruṣamevāpnoti

iḍāntastṛtīyo jagatī

paśavo vā iḍā paśavo jagatī jāgatāḥ paśavaḥ paśūnevāpnoti

prasṛtacchandāḥ prathamastrirātrastena so'yātayāmā

athottarasya cchandāṃsi vyūhanti triṣṭubhaḥ pratipado bhavanti triṣṭubhām̐lloke jagatyo jagatīnāṃ gāyatryastena so'yātayāmā

athottamasya cchandām̐si vyevohanti jagatyaḥ pratipado bhavanti jagatīnām̐lloke triṣṭubhastriṣṭubhāṃ gāyatryasteno eva so'yātayāmā

abhi vā etā anyonyasyai lokamabhyadhyāyana kāmamevaināgamayatyāpnoti taṃ kāmam̐ yasmai kāmāyaiṣa āhriyate

tasmādyujau na sadṛgvahatastasmādvipariṇītau vahīyām̐sau bhavatastasmādubhayatodantaḥ syadante

tṛce vā anya ṛṣayo virājamapaśyanvasiṣṭhaścaturṛce

tena sa caturṛco yastṛce'nyatsāma bhavatyekarcce'nyadyadvāva catasṛṣvekam̐ sāma sa eva caturṛcaḥ

sāma bhūyām̐saṃ poṣaṃ puṣyati tamanu poṣaṃ poṣuko bhavati

etaddha smāha muñjaḥ somaśravasa etam̐ ha vai vayam̐ sāmnaḥ poṣaṃ vidyeti tasmādvayamapratigṛhṇanto na sahasrapoṣāccyavāmahā iti

tadu ha smāha vāsiṣṭhaścaikitāneyaḥ sāma haiva nūnaṃ bhūyām̐saṃ poṣaṃ puṣyati tamanapoṣaṃ poṣako bhavati vidhavāyā iva tve vai tajjanma yadasāmnī caturthyevaṃ ha vā ete viduriti tasmādeteṣām̐ yuvānaḥ śrotriyāḥ purāyuṣaḥ pramāyukā bhavanti yuvatayo jāyā vidhavā bhavantīti yattṛce'nyatsāma bhavatyekarce'nyadyadvāva catasṛṣvekam̐ sāma sa eva caturṛca iti

paśuratiricyate sa aindrāggna ālambhyaḥ

indrāggnī vai devānāmojiṣṭhau tā u ayātayāmānau tāveva tadyunakti svargasya lokasya samaṣṭyai

sauryyaṃ brahmavarcasakāma ālabheta

etasyām̐ vā ekādaśinyāmādityāḥ sūryyamajanayatsa tejo brahmavarcasamavārundha tejasvī brahmavarcasī bhavati ya evaṃ veda

atho khalvāhurāggneya evālambhya ityaggnirvvai sarvvā devatāstena na devatānāṃ kāṃ canāntareti

iti prathamaḥ khaṇḍaḥ //४/१//
athaiṣa śyenaḥ

śyeno vai vayasāṃ kṣepiṣṭho yathā śyena ādadītaivamevainametenādatte

trivṛtaḥ pavamānā bhavanti

trivṛdvai stomānāṃ kṣepiṣṭho yattrivṛdbhavatyāśīyastṛṇavā iti

rathau havirdhāne bhavato rathavajjramevāsmai tatpravarttayati stutyai

vaṣaṭkāraṇidhanaṃ bhavati

eṣa vai vajrāṇāmojiṣṭho yatsāma vajjro yaṃ bahavo vaṣaṭ kurvanti tamevāsmai vajjraṃ praharati stṛtyai

ubhe bṛhadrathantare bhavata ubhābhyāmevāsmai bṛhadrathantarābhyām̐ vajjraṃ praharati stṛtyai

parācīṣu rathantaraṃ bhavati

parāñcamevāsmai vajjraṃ praharati stṛtyai

tasya rathantaraṃ pṛṣṭhaṃ bṛhat brahmasāmaiṣa vai sāma vajjrastamevāsmai vajjraṃ praharati stṛtyai

yaṃ kāmayeta kṣīyeteti tasya bṛhatpṛṣṭhaṃ kuryyādrathantaraṃ brahmasāma kṣatram̐ vai bṛhatpaśavo rathantaraṃ kṣatreṇaivāsya paśūn hantyapaśurbhavati kṣīyate

yaṃ kāmayeta parāṃ parāvatamiyānna pratitiṣṭhediti pavamāne rathantaraṃ kuryātbṛhatpṛṣṭhaṃ plavaṃ brahmasāma bṛhadrathantarābhyāmevainamebhyo lokebhya uddhṛtya plavena praplāvayati parāṃ parāvatameti na pratitiṣṭhati

vārṣāhare pavamānamukhe bhavataḥ saphaupagave nānadaṃ krūrāṇi sāmāni sambhavanti stṛtyai

tailvako vā bādhako vā yūpa sphyāgraḥ

aggnaye rudravate lohitaḥ paśuḥ

sādayantyupām̐śvantaryāmau

śaramayaṃ barhiḥ śīrtyai

vaibhītaka idhmo vibhityai

lohitoṣṇīṣā lohita vāsaso nivītā ṛtvijaḥ pracaranti stṛtyai

nava nava dakṣiṇā bhavanti

nāvayantyevainaṃ tat

iti dvitīyaḥ khaṇḍaḥ //४/२//
trivṛdaggniṣṭomaḥ

tasyeṣum̐ viṣṭutiṃ kṛtvābhicaranyajeta

iṣuvadho vai purāyuṣo bhavati yadiṣum̐ viṣṭutiṃ karoti puraivaināmāyuṣaḥ pravṛścati

trivṛdvai stomānāṃ kṣepiṣṭho yattrivṛdbhavatyāśīyastṛṇavā iti

vaṣaṭkāraṇidhanaṃ bhavati

saptahaṃ bhavatyāsaptamātpuruṣādanāyatano bhavati yametenābhicaranti

samānamitaracchyenena

iti tṛtīyaḥ khaṇḍaḥ //४/३//
athaiṣa sadam̐śaḥ

yadvai durādānam̐ sadam̐śena tadādatte

yaddvau dvau stomau saha yathā ha durādānam̐ sadam̐śenānuhāyādadītaivamevainametenādatte

vivṛtam̐ stomam̐ sampadyate bṛhatīṃ chando vajjro vai trivatpaśavo bṛhatīṃ vajjreṇaivāsya paśūn hantyapaśurbhavati

vaiyyaśvaṃ bhavati vyaśvamevainaṃ karoti

pariṣṭubdheḍaṃ bhavati paryyevainam̐ vṛścati

vārṣāhare pavamānamukhe bhavataḥ kāśītaupagave nānadaṃ krūrāṇi sāmāni sambhavanti stṛtyai

nissaptadaśastena krūraḥ

samānamitaracchyenena

iti caturthaḥ khaṇḍaḥ //४/४//
athaiṣa vajjro'bhicaranyajeta vajjreṇaivāsmai vajjraṃ praharati stṛtyai

sarvvaḥ pañcadaśo bhavati

vajjro vai pañcadaśastamevāsmai vajjraṃ praharati stṛtyai

ukthyaḥ ṣoḍaśimānbhavati

paśavo vā ukthāni vajjraḥ ṣoḍaśī vajjeṇaivāsmai vajjraṃ praharati stṛtyai

tasya mahānāmnyaḥ ṣoḍaśisāma bhavati

vajjro vai mahānāmnyo vajjraḥ ṣoḍaśī vajjeṇaivāsmai vajjraṃ praharati stṛtyai

samānamitaratpūrveṇa

iti pañcamaḥ khaṇḍaḥ//४/५//
atirātraścaturvim̐śaṃ prāyaṇīyamaharabhijittrayassvarasāmāno divākīrtyamahastrayassvara sāmāno viśvajinmahāvrataṃ cātirātraśca

viśvedevāḥ satramāsata somena rājñā gṛhapatinā te'bruvantsoma eva no rājā sarvvatra vibhavediti tasmātsomo rājā sarvvāṇi nakṣatrāṇyupaiti somo hi retodhāḥ

navāham̐ sam̐vatsarasya garbhamupayanti

navāho vai sam̐vatsarasya pratimā nava prāṇāḥ prāṇānevāvarundhate

prajāvanto jīvā jyotiraśnuvate ya etā upayanti