Sarvatathāgatatattvasaṃgraha · Chapter 53

athātra hṛdayāni bhavanti /
huṃ aḥ //
huṃ jjaḥ //
huṃ hoḥ //
huṃ haṃ //
tatastrilokavijayamahāmaṇḍalasamayatatvamudrājñānaṃ śikṣayet /
vajradhātuprayogeṇa buddhānusmṛtimān bhavet /
yastu satvahitārthāya sa tu buddhatvamāpnuyāt

maheśvaramumāṃścaiva bhūmau likhya tathākramet /
yathālekhyānusāreṇa satvamudrāṃ samādhayet

anayā baddhamātrayā trilokavijayī sa tu /
siddhavidyo bhavetkṣipraṃ bajrahuṃkārasannibhaḥ

jvālāmaṇḍalamadhyasthā yathā lekhyānusārataḥ /
kāyavākcittavajraistu satvamudrāstu bandhayet

athāsāṃ karma vakṣyāmi vajrakarmamanuttaraṃ /
buddhānusmṛtisaṃsiddhaḥ śīghraṃ buddhatvamāpnuyād // iti

trilokavijayāṃ badhvā trilokavijayī bhavet /
vajrāyuḥ sarvagāmī tu vajrahuṃkārasannibhaḥ

vajrābhiṣekā rājyatvaṃ lokaiśvaryaṃ sudharmiṇī /
karmavajramahākrodhā vajrakarmakarī bhavet

satvakrodhā mahādāḍhryaṃ krodhāṅkuśyā samāvhāna /
rāgayetkrodharāgā tu sādhukrodhā tu tuṣṭidā

bhṛkuṭyā nāśayetsarvaṃ krodhasūryā sutejatāṃ /
ketukrodhā haredarthān aṭṭahāsā tu mārayet

dharmakrodhā hared dharmān cchindedvai krodhavajrayā /
hetukrodhā hared duḥkhān vāggharet krodhabhāṣayā

karmakrodhā sukarmāṇi kuryād rakṣāṃ tu rakṣayā /
krodhayakṣā ripuṃ khādet krodhamuṣṭistu siddhidā // iti