Sarvatathāgatatattvasaṃgraha · Chapter 199

ityāha bhagavān buddhaḥ //
tatrāyaṃ tathāgatakulakarmasamayaguhyasiddhitantraḥ /
samantabhadraḥ kāmo 'haṃ sarvasatvasukhapradaḥ /
vajrasatvasamādhisthaḥ pūjayaṃ siddhimāpnuyād //
ityāha bhagavān kāmaḥ //
tatrāyaṃ vajrakulakarmasamayaguhyasiddhitantraḥ /
samantabhadraḥ krodho 'haṃ sarvasatvahitaṃkaraḥ /
vajrahuṃkārayogena pūjayaṃ siddhimāpnuyād //
ityāha bhagavān vajrapāṇiḥ //
tatrāyaṃ padmakulakarmasamayaguhyasiddhitantraḥ /
samantabhadro rāgo 'haṃ sarvasaukhyapradaḥ svayaṃ /
jagadvinayarūpasthaḥ pūjayaṃ siddhimāpnuyād //
ityāha bhagavān padmarāgaḥ //
tatrāyaṃ maṇikulakarmasamayaguhyasiddhitantraḥ /
samantabhadro rājāhaṃ sarvasatva[mahārthadaḥ /
sarvārthasiddhirūpeṇa] pūjayaṃ siddhimāpnuyād //
ityāha bhagavān sarvārthasiddhiḥ //
sarvakulakarmasamayaguhyasiddhividhivistaratantraṃ //
atha vajrapāṇirmahābodhisatvaḥ sarvatathāgatakarmadharmatottamasiddhitantramudājahāra / tatrāyaṃ tathāgatakarmadharmatottamasiddhitantraḥ /
dakṣiṇāgryābhimukhataḥ kavacaṃ svasamādhinā /
nibadhyoṣṇīṣasaṃsthā tu rakṣātyantaṃ bhaviṣyatī- //
tyāha bhagavān buddhaḥ //
tatrāyaṃ tathāgatakulakarmadharmottamasiddhitantraḥ /
saṃlikhya tu bhagākāraṃ kuḍye meḍhraṃ samucchritaṃ /
yāṃ striyaṃ cintayan mṛduṃ kuryātsāsya vaśībhaved //
ityāha bhagavānāryavajrapāṇiḥ //
tatrāyaṃ vajrakulakarmadharmottamasiddhitantraḥ /
bhūmau yakṣamukhaṃ likhya tasyāgryāṅgu lito nakhaṃ /
nihatya cakṣurdeśe tu samākarṣetstriyo varāḥ //
ityāha bhagavān vajrasatvaḥ //
tatrāyaṃ padmakulakarmadharmottamasiddhitantraḥ /
padmaṃ gṛhya karābhyāṃ tu nirīkṣya rāgaśuddhitāṃ /
vajradṛṣṭyā tu sa strīṇāṃ rāgayedabhitastathe- //
tyāha bhagavān vajradharaḥ //
tatrāyaṃ maṇikulakarmadharmottamasiddhitantraḥ /
vajraratnasamādhistho maṇiṃ gṛhya [dvi]pāṇinā /
ratnahuṃkārayogena mārayetsarvayoṣitaḥ //
ityāha bhagavān vajrahuṃkāraḥ //
sarvakulakarmadharmottamasiddhividhivistaratnatraḥ // //
atha vajrapāṇirmahābodhisatvaḥ sarvatathāgatakarmakāryasiddhitantramudājahāra / tatrāyaṃ tathāgatakarmakāryasiddhitantraḥ /
pūjākarmavidhiṃ yojya yadyat kāryaṃ tu cintayet /
tattad vijñāpya mudrāṃ tu sādhayeta vicakṣaṇaḥ //
ityāha bhagavān vajradhātuḥ //
tatrāyaṃ tathāgatakulakarmakāryasiddhitantraḥ /
guhyapūjāvidhiṃ yojya vajrasatvasamādhinā /
yatkāryaṃ vadate tattu śīghraṃ siddhimavāpnuyād //
ityāha bhagavān vajradharaḥ //
tatrāyaṃ vajrakulakarmakāryasiddhitantraḥ /
kulaguhyamahāpūjāṃ kṛtvā krodhasamādhinā /
yatkiñciccintayetprājñaḥ sa śīghraṃ siddhimeṣyatī- //
tyāha bhagavān vajrakrodhaḥ /
tatrāya padmakulakarmakāryasiddhitantraḥ /
kṛtvā tu manasīṃ pūjāṃ lokeśvarasamādhinā /
yatkāryaṃ cintayetprājñaḥ tatsarvaṃ śīghramāpnuyād //
ityāha bhagavān padmadharaḥ //
tatrāyaṃ maṇikulakarmakāryasiddhitantraḥ /
kṛtvā dhūpādibhiḥ pūjāṃ vajragarbhasamādhinā /
yatkāryaṃ cintayetprājñaḥ tatsarvaṃ sidhyati kṣaṇād //
ityāha bhagavān vajragarbhaḥ //
sarvakula[karmakārya]siddhividhivistaratantraṃ //
atha vajrapāṇirmahābodhisatvaḥ sarvatathāgatamudrābhāvanā[dhiṣṭhānayogasiddhitantramudājahāra /] tatrāyaṃ tathāgatādhiṣṭhānayogasiddhitantro bhavati /
sūkṣmavajraprayogeṇa buddhayogasamāhitaḥ /
uttamāsi[ddhimāpnuyād] buddhamudrāprasādhaka //
ityāha bhagavān vajrapāṇistathāgataḥ //
tatrāyaṃ tathāgatakulasatvādhiṣṭhānayogasiddhitantraḥ /
satvo hi [sarvātmabhāvaḥ kāye ']pyātmani saṃsthitaḥ /
ityadhiṣṭhāya satvo 'hamahaṃkāreṇa bhāvayan //
sidhyatītyāha bhagavān sarvatathāgatamahāyānābhisamaya[vajrasatvaḥ //
tatrāyaṃ va]jrakulavajrādhiṣṭhāna[yogasiddhitantraḥ /]
yathā satvastathā mudrā yathā mudrāstathā hyahaṃ /
anena bhāvayogena sarvamudrāḥ su[sādhayed //
ityāha bhagavān vajradharaḥ //
tatrāyaṃ padmakuladharmā]dhiṣṭhānayogasiddhitantraḥ /
dharmamudrāprayogeṇa sūkṣmavajreṇa bhāvanā /
vāṅmudrāṇāṃ [tu tatsarvaṃ mahāsatvasya samādhi //
ityāha bhagavānāryāvalokiteśvaraḥ //] tatrāyaṃ maṇikulakarmādhiṣṭhānayogasiddhitantraḥ /
sarvabuddhābhiṣekāṇi [pajāsamayasiddhayaḥ /
bhagavāniti bhāvayan vajrakarmāṇi sādhayed //
ityāha bhagavān] vajrakarma //
sarvakulamudrābhāva[nāsiddhitantraṃ //
atha] bhagavan[sarvatathāgatāḥ] punaḥ samājamāgamya, bhagavate sarvatathāgatacakravartine vajrapāṇaye mahābodhisatvāya sādhukārāṇyadaduḥ /
sādhu te vajrasatvāya [vajraratnā]ya sādhu te /
[vajradharmāya te sādhu sādhu te] vajrakarmaṇe //
subhāṣitamidaṃ sūtraṃ vajrayānamanuttaraṃ /
sarvatathāgataṃ guhyaṃ mahāyānābhisaṃ[graham // iti //]
sarvatathāgatatatvasaṃgrahāt sarvakalpaguhyottaratantravidhivistaraḥ parisamāptaḥ //
CHAPTER 26a SARVA-KALPANUTTARA-TANTRA
atha vajrapāṇirmahābodhisatva imā[mudānamudānayāmāsa /]
durdṛṣṭīnāṃ viraktānāmidaṃ guhyanna yujyate /
sarvasatvahitārthāya vakṣyāmi vidhayastathe- // ti //
athavajrapāṇirmahābodhisatvaḥ [sarvatathāgata] kulopacāravidhivistaramabhāṣat /
tatredaṃ sarvatathāgatakulopacāravidhivistaratantraṃ /
tatrāyaṃ hṛdayopacāravidhi[vistaratantro bhavati] / mahāmaṇḍalaṃ dṛṣṭvā dhūpapuṣpadīpagandhapūjāmudrābhir kṛtvā, tato vajra[vācā jāpamārabhyati /]
tatrāyaṃ jāpavidhirbhavati / yathā sthānasthitaścaturmāsaṃ catuḥsandhyaṃ dhūpādibhiryathāvatpūjāṃ kṛtvā, sarvatathāgatamahāyānābhisamayanāmāṣṭaśatena sarvatathāgatānabhiṣṭutya, caturmudrāpraṇāmayogena praṇamannātmaniryātanapūjā kāryanena mantracatuṣṭayena /
oṃ sarvatathāgatapūjopasthānāyātmānaṃ niryātayāmi sarvatathāgatavajrasatvādhitiṣṭhasva māṃ //
oṃ sarvatathāgatapūjābhiṣekāyātmānaṃ niryātayāmi sarvatathāgatavajraratnābhiṣiñca māṃ //
oṃ sarvatathāgatapūjāpravartanāyātmānaṃ niryātayāmi sarvatathāgatavajradharma pravartaya māṃ //
oṃ sarvatathāgatapūjākarmaṇe ātmānaṃ niryātayāmi sarvatathāgatavajrakarma kuru māṃ //
"tato 'viraktaḥ sarvakāmaguṇeṣu sarvāhāraḥ sarvakāmopabhogīhṛdayārthaḥ svamātmānaṃ buddhabimbaṃ purato vāṅmātreṇāpi bhāvayan yathākāmakaraṇīyatayā, aṣṭaśataṃ vajravācā japannāśu prasidhyatī-" tyāha bhagavān vajrasatvaḥ //

"athottamasiddhimicchettataḥ paṭe bhagavantaṃ tathāgataṃ madhye lekhayet / tasya caturmahāsatvamaṇḍalayogena yathābhirucitavarṇābharaṇā mahāsatvāścandramaṇḍalapratiṣṭhitā lekhyāḥ koṇabhāgeṣu kuladevya iti / tataḥ paṭasyodārāṃ pūjāṃ kṛtvā yathāvajjapayogena tāvajjapet yāvanmāsacatuṣṭayaṃ, tataḥ sakalāṃ rātriṃ japet / tataḥ prabhāte sarvatathāgatatatvādīnuttamasiddhīnavāpnotī-" tyāha bhagavān vajradharaḥ /
"athamudrāsādhanamicchettena sarvatathāgatasatvavajrimudrāṃ badhvā paṭasyāgrato vajravācāṃ śatasahasraṃ yathākāmakaraṇīyatayā yathāvad bandhan muñcaṃśca japet / tato 'nte sakalāṃ rātriṃ, aviśramato kiñcitkālaṃ muñcan, yathāvacca bandhan japet / tato mudrā jvalatyāviśatyuttiṣṭhati vācaṃ muñcatīti / tato mudrābandhanenotpatati kāmarūpī bhavati antardhāti sarvakarmāṇi ca karoti / sarvamudrāśca bandhamātrā yathāvatsarvakarmāṇi kurvantī-"tyāha bhagavān vajradharaḥ //
"atha samādhayo iṣyet tena sūkṣmavajrādārabdhavya samādhimabhirocet taṃ hṛdayayogato 'bhyaset, tāvadyāvac caturmāsaṃ / tato 'nte sakalāṃ [rātriṃ paryaṅkāvikṣaptasamāpannena tiṣṭhet / tataḥ prabhāte sarvatathāgatādyāḥ] sarvasiddhaya āmukhībhavanti / tato yādṛśī abhirucistādṛ[śīmavāpnotī-"tyāha bhagavān vajrasatvaḥ //]
atha karmasādhanaṃ bhavati / tathaiva japanmāsamekaṃ sādhayet / tato 'nte sakalāṃ rātriṃ ja[pet / tataḥ sarvakarmāṇi sidhyantī-"tyāha bhagavān vajradha]raḥ //
"atha karmāṇi bhavanti / sakṛduccāritenātmaparagrāmanagararakṣa bhavati // kavacaba[ndhādināveśamapi kṛtvā candanagandhena grahāgraha]spṛṣṭavajrāṅku śaśarahastaratnasūryadhvajadantapaṅktipadmakhaḍgacakrajivhāsarvavajrakavacadaṃṣṭrāmuṣṭimudrādinisarvabhāvānāviśayati sakṛjjaptena // māyākarma ca mayūrapatrapiñcchake vajraṃ cidhvā bandhayet / tatastaṃ mayūrāṅgapiñcchakaṃ satvavajri mudra[yā badhyāt tā]vajjapedyāvat sarvatathāgatamudrā āviśati / tataśca piñcchakān nānādyāni rūpāṇi paśyati / tataḥ prabhṛti tena piñcchakena sarvarūpāṇi vidhivad darśayati / tenaiva piñcchakena sakṛjjapte bhrāmitenātmanaḥ sarvarūpāṇi darśayati / tenaiva piñcchakena laukikāni māyākarmāṇi darśayati / buddhabodhisatvabimbānyapi darśayati / daśasu dikṣu sarvabuddhakṣetreṣu tathāgatāḥ saparṣanmaṇḍalāḥ samārasenādharṣaṇādibuddharddhivikurvitāni kurvanto darśayati / yāvatsarvākāravaropetaṃ buddharūpamātmānaṃ bhavatī-"ti //
"vaśīkaraṇaṃ kartukāmaḥ sarvatathāgatasatvamudrāṃ badhvā tāvajjaped yāvatsā mudrāṃ jvalati / tataḥ prabhṛti mudrābandhena sarvatathāgatānabhyārāgayati vaśīkaroti / kiṃ punaranyāṃ satvān? //
"atha laukikottamasiddhayaḥ sādhayitukāmena tenādita eva tathaiva japatā māsamekamaṣṭasāhasrikeṇa japtavyaḥ / tato 'nte mudrāṃ badhvā tathaiva sakalāṃ rātriṃ japet, yāvanmudrā jvalati / tataḥ prabhṛti mudrābandhena laukikasiddhividyādharasiddhīnāmekataro bhavatī-"tyāha bhagavāṃ vajradharaḥ //
tathāgatakulopacāravidhivistaraḥ parisamāptaḥ //
atha vajrakulopacāravidhivistaro bhavati /
"tatrādita eva pūrvamevaṃ kuryāt / tathaiva yathākāmakaraṇīyatayā, akṣaralakṣaṃ japet / asya sakalāṃ rātriṃ japet / tataḥ prabhṛti sarvasatvanigrahānugrahakṣamo bhavatī-"tyāha bhagavāṃ vajradharaḥ //
atha sādhayitumicchet tena yathāvatpaṭaṃ citrāpayitavyaḥ / tatastathaiva pūjāṃ kṛtvā māsamekaṃ sarvakāmabhojī yathākāmakaraṇīyatayā, aṣṭasāhasrikeṇa jāpena catuḥsandhya vajravācā japet, tāvadyāvanmāsānte paṭasyodārāṃ pūjāṃ kṛtvā vajra-huṃkāramahāmudrāṃ badhvā tāvajjapedyāvattasmāt mudrāṃ bandhāt, huṃkāraśabdo viniḥsṛtaḥ / tataḥ prabhāte maheśvarādayo devādhipatayaḥ sagaṇaparivārāḥ puraḥsthitvājñāṃ mārgayanti / tato vidyādhareṇaivaṃ vaktavyaṃ "yadāhaṃ brūyāmāgacchatedaṃ kuruta tadā bhavadbhirāgatya mamājñā kārye-"ti / tataḥ prabhṛti sakalatrilokādhipatirbhavati / yathecchayā ca muhūrtamātreṇa sakalaṃ tribhuvanamājñāpayan bhramati / punarapyeti ca, nigrahānugrahaṃ kurvaṃ, divyāni ca trilokabhogāni copabhuñjan yathākāmakaraṇīyatayā, sarvasurādhipatiyoṣitādyāḥ sarvayoṣitā ārāgayitvopabhuñjati / na ca tasya kaścit kiṃcicchaknoti kartuṃ, huṃkāreṇa ca sarvaduṣṭade[vādīn pramarditvā tatastāvatkalpaśatasahasrān jīvatī-"tyāha bhagavān vajradharaḥ //
"atha mudrāsādhanamicched] yathāvajjapaṃ kṛtvā māsānte vajra-huṃ-kārasamayamudrāṃ badhvā sakalāṃ rātriṃ japet / tataḥ prabhāte mudrāḥ siddhā bhavanti / tato yathāvan mudrābandhena huṃkāraprayuktena ākāśagamanaviśvasaṃdarśanāntardhānamāyāsandarśanasarvāveśanākarṣaṇavaśīkaraṇasarvatuṣṭisaṃjananasarvaratnābhiharaṇamahātejojvālāsandarśanaratnavṛṣṭisandarśanamahāṭṭahāsapramuñcanasarvasatvasaṃśodhanacchindanabhindanaṛtucakraparivartanayathāvattatvollāpanasarvakarmapravartanarakṣajaṃbhanastaṃbhanatrāsanamāraṇasarvasatvamudraṇakāmaratikriyāpravartanābhiṣekasarvabhāvagāyāpananṛtyāpanāhvāyanapraveśanasphoṭanāveśanādīni sarvakarmāṇi karotī-"tyāha bhagavān vajradharaḥ //
"atha sūkṣmajñānasādhanamicchet tena vajra-huṃ-kārasamādhimabhyasatā tathaiva jāpayogena māsaṃ sādhayitavyaṃ / tato 'nte 'nenaiva samādhinā sakalāṃ rātriṃ japet / tāvad yāvat prabhāte pañcābhijñā bhūtvā sarvasatvānugrahanigrahakṣamo bhavatī-"tyāha bhagavān vajradharaḥ //
"atha karmasādhanamicchet tena tathaiva japatā māsamekaṃ sādhayitavyaṃ / tato 'nte sakalāṃ rātriṃ japet / tataḥ sarvakarmāṇi sidhyantī"tyāha bhagavān vajradharaḥ // tataḥ karmāṇi bhavanti sakṛduccāritena manīṣitayā rakṣādīni sarvakarmāṇi karoti //
vajrakulopacārasiddhividhivistaraḥ [parisamā]ptaḥ //
atha padmakulopacāravidhivistaro bhavati /
"tatrādita eva tāvacchatasahasraṃ japet, pūrvamevākṛtā bha[vati]tataḥ sādhanaṃ bhavati / paṭe bhagavān sarvajagadvinayādyāḥ kartavyāstasya sarvapārśveṣu caturmaṇḍalayogena mahāsatvacatuṣṭayaḥ kāryaḥ ante ca devyaḥ / tataḥ sa eva jāpavidhivistaro māsānte sakalāṃ rātriṃ japet / tataḥ sarvajagadvinayo bhagavānāgacchati, yathākālaṃ vareṇābhipracārayatī-"ti āha bhagavān vajradharaḥ //
"atha mudrāsādhanamicchet tena tathaiva padmavajrimudrābandhaṃ kṛtvā yathāvan mucyāṣṭasāhasrikeṇa jāpena catuḥsandhyaṃ japet / tataḥ sakalāṃ rātriṃ mudrābandhena japet / prabhāte siddhirbhavati / tato mudrābandhena yathāvat sarvajagadvinayaṃ karotī-"tyāha bhagavānavalokiteśvaraḥ //

"atha samādhinayasādhanamamicchet tena tathaiva māsānte sakalāṃ rātriṃ yathābhirucitena samādhinā jāpo dātavyaḥ / tataḥ prabhāte sarvasamādhaya āmukhībhavantī-"tyāha bhagavān vajradharmaḥ //
atha karmasādhanamicchet tathaiva japanmāsānte sakalāṃ rātriṃ japet / tataḥ sarvakarmakṣayo bhavatī-"tyāha bhagavāṃ vajradharaḥ //
padmakulopacāravidhivistaraḥ parisamāptaḥ //
atha maṇikulopacāravidhivistaro bhavati //
"tatrādita eva sarvatathāgatapraṇāmacatuṣṭayaṃ kṛtvā śatasahasraṃ japet / tatastathaiva paṭe bhagavāṃ sarvārthasiddhiṃ caturmudrāmaṇḍalayogena likhet / tatastathaiva pūjāṃ kṛtvā tathaiva sādhayet / māsānte sakalāṃ rātriṃ japet / tataḥ prabhāte bhagavāṃ sarvatathāgatābhiṣekaratnaḥ ākāśagarbho bodhisatva āgatyābhiṣekaṃ dadāti / tenābhiṣekeṇa trisāhasramahāsāhasre lokadhātau vidyādharacakravartī bhavatī-"tyāha bhagavān vajradharaḥ /
"atha mudrāsādhanamicchet tena tathaiva dharmavajriprayogeṇa vajraratnamudrā yathāvatsādhyā sarvāśākarmakarī bhavatī //
"atha maṇijñānamicchet sādhayituṃ tena tathaiva vajraratnodbhavasamādhiryathānukramato bhāvayitavyaḥ / niḥsvabhāvādākāśātkathaṃ ratnasaṃbhava iti, ratnācca kathaṃ bodhisatvakāyasaṃbhava iti / imaṃ samādhiṃ catuḥsaṃdhyaṃ bhāvya japed, yathopari tato māsānte tenaiva samādhinā [sakalāṃ rā]triṃ japet / tataḥ prabhāte sarvatathāgatairāgatya yathābhirucito 'bhiṣicyata"ityāha bhagavanākāśagarbhaḥ //
"atha kāmasādhana[micchet] tathaiva japatā māsānte sakalāṃ rātriṃ japet / tataḥ prabhāte bhagavānākāśagarbhaḥ sarvārthasādhako bhavatīti / tataḥ sarvakarmāṇi kuryād" ityāha bhagavānāryavajradharaḥ //
maṇikulopacāravidhivistaraḥ parisamāptaḥ //
atha sarvakulopacārasādhāraṇavidhivistaro bhavati //
tatrādita eva ca sarvahṛdayopacāravistaraḥ /
"hṛdayamanīṣitāni sarvatathāgatānāṃ sidhyantām" ityuccārya hṛdayaṃ yathābhirucito japya sādhanavidhiḥ kartavya iti //
tatrāyaṃ mudropacāravidhiḥ / "sarvamudrā me bhogyā bhavantī-" tyuktvā samayamudrāṃ badhvā yathābhirucito yathāśaktyā japet / tato yathāvatsiddhiriti //
tatrāyaṃ sarvamantropacāravidhiḥ / "niḥprapañcā vāksiddhirbhavatu, sarvatathāgatasamādhayo me ājāyantām" ityuktvā mantraṃ yathābhirucito japet, eṣā siddhiriti //
tatrāyaṃ vidyopacāravidhiḥ / "avidyāndhā ca te me satvāḥ sarvatathāgatāśca vidyādhigamasaṃvarabhūtā" ityuktvā vidyāṃ yathābhirucito japya sādhanamāvahed" ityāha bhagavānāryavajradharaḥ //
"atha sarvahṛdayamudrāmantravidyānāṃ yathākāmakaraṇīyatayā vajrajāpavidhivistaro bhavati / yasya satvasya hṛnmudrāṃ mantraṃ vidyāṃ tu sādhayet / jāpārthatastamātmānaṃ satvaṃ vā sādhya sidhyatī-" tyāha bhagavān vajrasatvaḥ //
sarvakulasādhāraṇajāpavidhivistaraḥ parisamāptaḥ //
atha sarvakulasādhāraṇasiddhividhivistaro bhavati //
tatrādita eva tathāgatakulasiddhayaḥ / tadyathārthaniṣpattisiddhiḥ ṛddhisiddhirvidyādharatvaṃ mahāsiddhiśceti //
"tatrārthaniṣpattirbhavati / yatrā nidhiśaṅkā bhavet tatra mudrāṃ badhvā svasamādhinā tannidhisthānaṃ vajradṛṣṭyā nirīkṣayet / yadi vajrākāramuttiṣṭhatvaṃ paśyati tathā jñātavyaṃ nidhiratrāstīti / tato vajrasphoṭasamayamudrāṃ badhvotkhanya yathākāmakaraṇīyatayā gṛṇhīyādacirāt prāpnotī-" tyāha bhagavān vajrasatvaḥ //
"tatra ṛddhisiddhiniṣpattirbhavati / yāṃ mudrāṃ sādhayed "vajrasiddhir / "ityuktvā ṛddhisiddhiścaturvidhā bhava[nti tadyathā] jalasyoparicaṃkramaṇaniṣīdatādikaṃ tathāgatādisarvarūpasaṃdarśanaṃ yāvadabhirucistāvad adreṣyatvaṃ / ākāśagāmī ca yojanasahasramūrdhvamutpatyadhastācca gacchati / sarvādiśaśca yojanasahasrād yathābhirucitavegaḥ paribhramyāgacchati / yojanasahasrādarśena sarvasatvamanīṣitāni jñānāti / sarvabhāvāni ca cakṣuṣā paśyati śrotreṇa śṛṇoti / sarvadikṣu sa yojanasahasrādarśena mano 'bhirucitāḥ sarvastriyo 'ṅge samutkṣipyānayati / sarvahiraṇyasuvarṇamaṇimuktādayaśca sarvārthānapaharati, na cāsya kaścit kiṃcit chaknoti kartuṃ / yad vajreṇāpyadṛśyo bhavati /
kiṃ punaranyaiḥ? / daśapuruṣasahasrabalī nityārogyavān nityaṃ sarvakāmopabhojī sadāyauvano divyarūpī sarvatathāgatān savajrasatvāṃ paśyan pūjayaṃścānuttaravajrasiddhiścatvārivarṣasahasrāṇi jīvatī-" tyāha bhagavān sarvatathāgatavajraṛddhiḥ //
tatrāyaṃ vajravidyādharasiddhiniṣpattirbhavati / mudrān sādhayaṃ "vajravidyādhara" iti kuryāt, siddhayā vajravidyādharacakravartī bhavati / sarvakāmopabhogī sahasrabuddhakṣetramekakṣaṇena paribhramyāgacchati / sarvasukhāni paribhuṃkte / dviraṣṭavarṣavayuḥ ākuñcitakuṇḍalakeśadhārī mahāvajravidyādharaḥ sarvatathāgatān savajrasatvān paśyan mahākalpasthāyī bhavatī-" tyāha bhagavān sarvatathāgatavidyādharaḥ //
tatra mahāsiddhiniṣpattirbhavati / svamudrāṃ hṛdayārthataḥ sādhayan / svamudrā satvarūpī bhavatya, ekakṣaṇena daśasu dikṣu sarvalokadhātuṣu viśvarūpī viśvakriyāpravartakaḥ, sarvatathāgatān savajrasatvāṃ dṛṣṭvā sarvākāravaropetābhiḥ sarvatathāgatapūjābhiḥ saṃpūjyāśeṣānavaśeṣasatvārthaṃ ca kṛtvā punarapyāyāti / sarvalokadhātusarvakāmasarvasukhasaumanasyāni sarvākāravaropetānyupabhuñjan, vajrasatvasamo mahābodhisatvaḥ aśeṣānavaśeṣamahākalpāyurbhavatī-" tyāha bhagavān sarvatathāgatasiddhiḥ /
tatraitā vajrakulasiddhayaḥ / tadyathā trilokavijayasiddhiḥ sarvābhiṣekasiddhiḥ sarvasukhasaumanasyasiddhiḥ uttamasiddhiriti //
"tatra trilokavijayasiddhirbhavati / trilokavijayamudrāṃ badhvā maheśvaraṃ [vāmapa]denākramya sādhayet / tataḥ sā pratimā nādaṃ muñcati / tato huṃkāraḥ prayoktavyaḥ / huṃkāre prayuktemātre maheśvarādayaḥ sarvatrailokyādhipatayaḥ saparivārā; sādhakasya purata āgatvā ājñāvaśyavidheyā bhavanti / tataḥ prabhṛti sarvatrilokādhipatirvajradharo bhavati / ākāśena gacchati sakalatrilokacakraṃ parikramyāgacchati, duṣṭadevādayaśca sarvasatvān huṃkāreṇa damayati / sarvatathāgatavajrahuṃkārarūpī sakalatrilokamājñayā vartayan sarvatathāgatān savajrasatvān paśyannārāgayaṃśca varṣahasrān jīvatī-" tyāha bhagavān vajrahuṃkāraḥ //
"tatrāyaṃ sarvābhiṣekasiddhimudrāṃ sādhayan / sarvatathāgatābhiṣekaratnamudrayā pūrvamātmānamabhiṣicya sādhayet / tatastasya siddhasya caturvidhamabhiṣeko bhavati /
vajrābhiṣeko ratnābhiṣeko dharmābhiṣekaḥ karmābhiṣekaśceti / tatra vajrābhiṣeke labdhe sarvatathāgatānāṃ vajradharo bhavati / ratnābhiṣeke sarvaratnādhipatirbhavati /

dharmābhiṣeke dharmarājā bhavati / karmābhiṣeke laukikarokottarasarvakarmasiddhimavāpnotī-" tyāha bhagavāṃ sarvatathāgatābhiṣekaḥ //
"tatreyaṃ sarvasukhasaumanasyasiddhir, yaduta guhyapūjābhirnityaṃ sarvatathāgatapūjāṃ kurvan, sarvatathāgatasarvasukhasaumanasyasiddhimavāpnotī-" tyāha bhagavāṃ sarvatathāgatasarvasukhasaumanasyaḥ //
"tatreyamuttamasiddhiḥ, yaduta vajradharasamo 'ham" ityāha bhagavāṃ vajradharaḥ //
tatraitāḥ padmakulasiddhayaḥ / tadyathānurāgaṇavaśīkaraṇarakṣapadmasidviśceti //
"tatrānurāgaṇasiddhirbhavati, yathāvatpadmarāgabhāvanayā sarvatathāgatādisarvasatvānurāgaṇakṣamo bhavati /
svalokeśvarānusmṛtyā tathaiva sarvasatvavaśīkaraṇasamartho bhavati /
maitryaspharaṇasamādhinā sarvajagadrakṣāvaraṇaguptakṣamo bhavati /
svaṃ padmasamādhinā padmaṃ hastena gṛhya sādhayaṃ lokeśvararūpī sarvākāravaropetaścaturvarṣahasraṃ jīvatī-" tyāha bhagavān sarvatathāgatapadmaḥ //
tatraitā maṇikulasiddhayaḥ / tadyathā sarvakulābhiṣekasiddhiḥ, mahātejastvaṃ, sarvāśāprapūraṇaṃ, ratnasiddhiśceti //
"tatra sarvatathāgatābhiṣekasiddhiḥ / yaduta svābhiṣekaniryātanā pradīpadānaṃ dānapāramitāpāripūriḥ, yathāśakyaratnasādhanaṃ catvābhiḥ siddhibhiḥ sarvatathāgatāṃ pūjayannacirāt sidhyatī-" tyāha bhagavāṃ sarvatathāgataratnaḥ //
sarvakulasādhāraṇasiddhividhivistaraḥ [parisamā]ptaḥ //
"atha sarvakalpopāyasiddhitantramanuvyākhyāsyāmī-" tyāha bhagavānanādinidhanasatvaḥ //
[tatrādita eva hṛdayopāyasiddhitantraṃ /]
yathā vinayo loko hi tādṛśī siddhiriṣyate /
upāyastatra mudrā hi sarvasiddhipradaṃ mahat //
tatrāyaṃ mudropāyasiddhitantraṃ /
virāgavinayo loko mudrāsiddhistu rāgajā /
upāyo bhāvanā tatra sarvasiddhikarī varā //
tatredaṃ mantropāyasiddhitantraṃ /
loko 'yaṃ satyavibhraṣṭo mantrasiddhirna iṣyate /
upāyo niḥprapañcastu sarvasiddhikaraḥ paraḥ //
tatredaṃ vidyopāyasiddhitantraṃ /
avidyābhiniviṣṭo 'yaṃ vidyāsiddhirna iṣyate /
upāyastatra caudārāṃ sarvasiddhipradaṃ varam // iti //
sarvakalpopāyasiddhitantraṃ //
"atha sarvakalpapuṇyasiddhitantramanuvyākhyāsyāmī-" tyāha bhagavāṃ sarvatathāgataḥ //
tatrādita eva svahṛdayapuṇyasiddhitantraṃ /
kṛtvā caturvidhāṃ pūjāṃ mahāpuṇyamavāpnute /
buddhapūjāgrapuṇyā hi sidhyate nātraṃ saṃśaya // iti //
tatredaṃ mudrāpuṇyasiddhitantraṃ /
rakṣaṃstu samayaṃ guhyaṃ mahāpuṇyamavāpnute /
apuṇyo 'pi hi sidhyeya śīghraṃ samayarakṣaṇād // iti //
tatredaṃ mantrapuṇyasiddhitantraṃ /
buddhānāmādivacanairmahāpuṇyamavāpnuyāt /
dharmadānādapuṇyo 'pi śīghraṃ siddhimavāpnute //
tatredaṃ vidyāpuṇyasiddhitantraṃ /
dānamagryaṃ hi puṇyānāṃ dadanpuṇyamavāpnute /
dānapāramitā pūrṇaḥ śīghraṃ buddhatvamāpnute- // ti //
sarvakalpapuṇyasiddhitantraṃ //
"atha sarvakalpaprajñāsiddhitantramanuvyākhyāsyāmi //
tatrādita eva hṛdayaprajñāsiddhitantraṃ /
a-akṣarapraveśena sarvākṣaravijānanā /
svavaktraparavaktraṃ tu bhāvayaṃ siddhimāpnuyād /
ityāha bhagavān mañjuśrīrmahābodhisatvaḥ //
tatredaṃ mudrāprajñāsiddhitantraṃ /
prajñā nairvedhikī nāma samādhiriti kīrtitā /
tayā tu mudrāḥ sidhyante bhāvayaṃ sidhyati kṣaṇād //
ityāha bhagavān prajñāgryaḥ //
tatredaṃ mantraprajñāsiddhitantraṃ //
prajñāghoṣānugā nāma samādhitvātprapañcataḥ /
taya bhāvitayā śīghraṃ mantrasiddhimavāpnuyād //
ityāha bhagavān vajrabuddhiḥ //
tatredaṃ vidyāprajñāsiddhitantraṃ /
vidyāmantraviśeṣāṇāṃ viśeṣo nahi vidyate /
prajñayā bhāvayannevamāśu siddhirdhruvā bhaved //
ityāha bhagavān sarvatathāgataprajñājñānaḥ //
sarvakalpaprajñāsiddhividhivistaratantraṃ // //
"atha kalpasaṃbhārasiddhitantramanuvyākhyāsyāmī-" tyāha bhagavān vajrapāṇiḥ //
tatrādita eva sarvahṛdasaṃbhārasiddhitantraṃ /
sarvapūjāṃ prakurvāṇaḥ saṃ[bhāraṃ hi] vivardhate /
kuśalānāṃ tu dharmāṇāṃ tataḥ sidhyati saṃbhṛtaḥ //
tatredaṃ mudrāsaṃbhārasiddhitantraṃ /
bahucakrapraveśācca bahumaṇḍala[kalpanāt] /
[saṃbhāra]pūjāmudrāṇāṃ mahāsiddhiḥ pravartate //
tatredaṃ mantrasaṃbhārasiddhitantraṃ /
anumodanādiyogena saddharmapaṭhanāttathā /
bahujāpapradānācca mantrasiddhirdhruvā bhaved // iti //
tatredaṃ vidyāsaṃbhārasiddhitantraṃ /
avidyāsuprahīṇatvāt dānapāramitānayāt /
saṃbhāraparipūrṇastu śīghraṃ siddhimavāpnute- // ti //
sarvakalpasaṃbhārasiddhitantraṃ //
sarvakalpavidhivistaratantraṃ parisamāptaṃ //
atha vajrapāṇirmahābodhisatvaḥ sarvakulacihnasaṃbhavajñānatantramudājahāra // tatra kathaṃ vajrasaṃbhavaḥ? /
sa eva bhagavāṃ satvaḥ sarvacittaḥ svayaṃ prabhuḥ /
kāyavākcittavajrastu dṛḍhaḥ satvaḥ svayaṃbhuvāṃ //
satvānāmuttamaḥ satvo vajrabhāvanayā hṛdi /
vajrasatva iti khyātastu tasmiṃ vajro pratiṣṭhitaḥ //
sa eva jñānayogena buddhānāmasamatviṣāṃ /
niḥkramya hṛdayādviśvo viśvarūpo bhavatyapi //
sarvadhāturajaḥsaṃkhyāḥ sa eva tu jino bhavet /
tebhyo vai vajrakāyebhyo vajrasatvastu saṃbhavet //
tata evādisatvāstu sarvacihnasamudbhavaḥ /
cihnebhyastu mahāsatvāstebhyaḥ sarvamidaṃ nayam // iti //
ya idaṃ śṛṇuyātkaścicchddadhed dhārayed hṛdi /
bhāvayecca sadā tuṣṭaḥ śīghraṃ siddhimavāpnuyād //
ityāha bhagavān vajrasatvaḥ //
sarvatathāgatatatvasaṃbhavajñānavidhivistaratantraṃ //
// atha vajrapāṇirmahābodhisatvaḥ sarvakalpasaṃbhavajñānavidhivistaratantramabhāṣat //
tatrādita eva tāvat sarvatathāgatakalpasaṃbhavajñānantantraṃ bhavati /
buddhānāmavikalpaṃ tu jñānaṃ bhavati śāśvataṃ /
avikalpāttato jñānātkalpanātkalpa ucyate //
tatredaṃ tathāgatakulakalpasaṃbhavajñānatantraṃ /
yatrāvikalpaḥ kalpātmā kalpyate kalpanodbhavaḥ /
vajrasatvo mahāsatvaḥ tena kalpo nirucyate //
tatredaṃ vajrakulakalpasaṃbhavajñānatantraṃ /
yathā likhya hi kalpayante vidhayaḥ kalpasiddhidāḥ /
tena kalpa iti prokto vikalparahitātmabhiḥ //
tatredaṃ padmakulakalpasaṃbhavajñānatantraṃ /
rāgo vikalpasaṃbhūtaḥ sa ca padme pratiṣṭhitaḥ /
tatastu kalpasthāyinyaḥ siddhayaḥ saṃbhavanti hi //
tatredaṃ maṇikulakalpasaṃbhavajñānatantraṃ /
maṇayo hyavikalpāstu prabhāvaiḥ susamucchritāḥ /
evaṃstu siddhayo divyāḥ saṃbhavantyavikalpitāḥ //
ityāha bhagavān vajradharaḥ //
sarvakulakalpasaṃbhavajñānatantraṃ //
atha sarvakalpahṛdayasaṃbhavajñānatantraṃ //
manīṣitavidhānaistu sidhyate tu manīṣitaṃ /
samādhisādhano hṛdsthaḥ hṛdayastu tena cocyate //
atha sarvamudrāsaṃbhavajñānatantraṃ //
duratikramo yathābhedyo rājamudrāgraśāsanaḥ /

mahātmacihnaviśvastu tathā mudreti kīrtitā //
atha mantrasaṃbhavajñānatantraṃ //
anatikrama[ṇo ca] hi durbhedyo guhya eva ca /
mantryate guhyasiddhyatvaṃ mantrastena nirucyate //
atha vidyāsaṃbhavajñānatantraṃ //
avidyāvipraṇāśāya vāgvidyo[ttama]siddhaye /
vidyate vedanāsiddhistena vidyā prakīrtite //
tyāha bhagavān vajradharaḥ //
sarvakalpahṛdayādisaṃbhavajñānatantraṃ // //
atha sarvakalpajñānotpattitantraṃ //
tatrādita eva hṛdayajñānotpattitantro bhavati //
hṛdayaṃ japya vijñeyamātmano vā parasya vā /
bhavyaṃ bhūtaṃ bhaviṣyaṃ ca yaḥ paśyati śṛṇoti ca //
tatredaṃ mudrājñānotpattitantraṃ bhavati /
mudrāmekatarāṃ badhvā yathāvadvidhinā manaḥ /
kṛtvā nirīkṣellokaṃ tu sarvaṃ jñeyaṃ yathoparī- // ti //
tatredaṃ mantrajñānotpattitantraṃ /
sakṛduccārayanmantraṃ brūyājjihvāṃ svakīntu yaḥ /
bhavyaṃ bhūtaṃ bhaviṣyaṃ ca tatsarvaṃ satyamāvahed //
ityāha bhagavānavalokiteśvaraḥ //
tatredaṃ vidyājñānotpattitantraṃ /
sakṛduccārya vidyāṃ tu vedayenmanasā sa tu /
bhavya bhūtaṃ bhaviṣyaṃ [ca vajravākśāsa]naṃ yathe- // ti //
sarvakalpajñānotpattividhivistaratantraṃ parisamāptaṃ // //
atha sarvakulasādhāraṇaguhyakāyavākcittavajramudrāsādhanatantraṃ bhavati //
tatredaṃ tathāgatakulaguhyakāyamudrāsādhanaṃ bhavati /
yathā tathā niṣaṇṇastu paryaṅkena tu sādhayet /
yathā lekhyānusāreṇa mahāsatvaḥ prasidhyatī- //
tyāha bhagavān vajrasatvaḥ //
tatredaṃ vajrakulaguhyakāyamudrāsādhanaṃ bhavati /
pratyālīḍhasusaṃsthānaṃ yathā lekhyānusārataḥ /
sādhayeta susaṃkruddhaḥ sidhyate nātra saṃśaya //
ityāha bhagavān vajrahuṃkāraḥ //
tatredaṃ padmakulaguhyakāyamudrāsādhanaṃ bhavati /
vajraparyaṅkasaṃsthaṃ tu vajrabandhaṃ karadvayaṃ /
samādhikāyo bhūtvā tu sādhayetpadmasaṃbhavam //
ityāha bhagavān padmasatvaḥ //
tatredaṃ maṇikulaguhyakāyamudrāsādhanaṃ bhavati /
utthito vā niṣaṇṇo vā caṅkraman vā yathā tathā /
vajraratnābhiṣekeṇa sidhyate natra saṃśaya //
ityāha bhagavān vajragarbhaḥ /
tatredaṃ tathāgatakulaguhyavāṅmudrāsādhanatantraḥ /
nātisyanditajihvāgradantoṣṭhadvayasaṃyutā /
sādhayetsarvakalpāntu vajravāksvaravarjite- //
tyāha bhagavān vajravācaḥ /
tatredaṃ vajrakulaguhyavāṅmudrāsādhanatantraṃ /
meghaghūllita-huṃ-kārakrodhagaṃbhīravāksthirā /
krodhasphuṭā mahāvajraṃ vajrakrodhavāgsādhanam //
ityāha bhagavān vajrahuṃkāraḥ //
tatredaṃ padmakulaguhyavāṅmudrāsādhanatantraṃ /
anucchvāsaṃ sūkṣma[śvāsaṃ sūkṣmavācāsusaṃ]sphuṭaṃ /
sidhyate sarvajāpāni samādhijñānagarbhaye- //
tyāha sarvatathāgatasamādhijñānagarbhaḥ //
tatredaṃ maṇikulaguhyavāṅmudrā[sādhana]tantraṃ /
suparisphuṭayā vācā praṇāmaparamaḥ sadā /
japete vinayaiścāpi sarvamāśu prasidhyatī- //
tyāha bhagavān sarvatathāgatapūjāvi[dhivista]rakarmā //
tatredaṃ tathāgatakulaguhyacittamudrāsādhanatantraṃ /
kāmo hi bhagavāṃcchaśvaḥ sarvasatvasukhapradaḥ /
vajrasatvaḥ svayame[va i]ti bhāvyāśu sidhyatī- //
tyāha bhagavān kāmaḥ /
tatredaṃ vajrakulaguhyacittamudrāsādhanatantraṃ /
sarvasatvahitārthāya duṣṭānāṃ [vinayārthāya] /
buddhaśāsanarakṣārthaṃ krodhaḥ siddhikaraḥ para //
ityāha bhagavān sarvatathāgatavajrahuṃkāraḥ /
tatredaṃ padmakulaguhyacittamudrāsādhanatantaṃ /
yathā padmamaliṣṭhaṃ tu vāsadoṣaiḥ surāgavān /
tathā me rāgadoṣaistu bhavedrāgaḥ sa sidhyatī- //
tyāha bhagavān padmarāgaḥ //
tatredaṃ maṇikulaguhyacittamudrāsādhanatantraṃ /
kadā nu sarvasatvānāṃ sarvakāryārthasiddhaye /
ratnavarṣāṇi varṣeyaṃ siddhaḥ sarvāśu sidhyatī- /
tyāha bhagavānāryākāśagarbhaḥ /
tatredaṃ tathāgatakulaguhyavajramudrāsādhanatantraṃ /
utthito vā niṣaṇṇo vā [caṅkramanvā] yathā tathā /
vāmamudrāguhyakaraḥ sarvaṃ kurvaṃ sa sidhyatī- //
tyāha bhagavāṃ sarvatathāgataguhyavajrapā[ṇiḥ //
tatredaṃ vajrakulaguhyavajramudrāsādhanatantraṃ //]
yathā tathā sthitaścaiva kurvan cāpi yathā tathā /
vakrajrodhāṅguliṃ badhvā vastracchannāṃ tu sidhyatī- //
tyāha bhagavā[n sarvatathāgatakrodharājaḥ //
tatredaṃ padmakulagu]hyavajramudrāsādhanatantraṃ /
padmamuṣṭiṃ tu vāmena kareṇācchāditena tu /
badhvā yathā śīghraṃ padma[siddhimavāpnuyād //
ityāha bhagavānavalokiteśva]raḥ //
tatredaṃ maṇikulaguhyavajramudrāsādhanatantraṃ /
ratnamuṣṭiṃ tu badhvā vai vāmācchāditasatka[raḥ /
yathā tathā kriyate vai ratnasiddhimavāpnu] yād //
ityāha bhagavānākāśagarbhaḥ /
tatredaṃ sarvakulaguhyasādhāraṇamudrāsādhanatantraṃ /
mahāmu[drāprayogeṇa svasatvasamādhinā hi /]
vajravāgvajradṛṣṭibhyāmacirātsiddhiruttame- //
tyāha bhagavān sarvatathāgatavajrasatvaḥ //
sarvakulaguhya[kāyavākcittavajramudrāsādhanatantraṃ sa]māptaṃ // //
atha bhagavān vajrapāṇiḥ sarvatathāgatanāhūyaivamāha / "pratipadyata bhagavantastathā[gatā idaṃ kalpamadhitiṣṭhanti prativedayanti /"
atha sa]rvatathāgatāḥ punaḥ samājamāgamya, punarapi sādhukārāṇyadaduḥ /
sādhu te vajrasatvāya vajraratnā[ya sādhu te /
vajradharmāya te sādhu sādhu te] vajrakarmaṇe //
subhāṣitamidaṃ sūtraṃ vajrayānamanuttaraṃ /
sarvatathāgataguhyaṃ mahāyānābhisaṃgraham // i[ti //
sarvatathāgatatatvasaṃgra]hāt sarvakalpānuttaratantraṃ parisamāptaṃ //
CHAPTER 26b EPILOGUE OF THE SARVA-TATHAGATA-TATTVA-SANGRAHA
atha vajrapāṇirmahābodhisatvaḥ utthāyāsa[nād bhagavantamanena nāmāṣṭaśatenādhyeṣāmā]sa /
vajradhātu mahāsatva sarvārtha paramārthaka /
śākyarāja mahājñāna vajrātmaka namo 'stu te

[satvasaṃbhava tatvārtha satvahetu mahānaya /]
mahāsatvārtha kāryārtha satvasatva namo 'stu te

buddhadharma mahādharma dharmacakrapravartaka /
ma[hāvacana vidyāgrya mahāsatva namo 'stu te]

mahākarma mahārakṣa sarvakarma prasādhaka /
mahātma satvacaryāgra satvaheto namo 'stu te

[sarvapāramitāprāpta sarvajñajñānavedaka /
sarvasa]tva mahopāya mahāprajñā namo 'stu te

mahākāruṇikāgryāgrya kāruṇya karuṇātmaka /
sarvadā[na mahāmaitrī sarvakāra namo 'stu te]

śākyasiṃha mahāśākya śākyaśākya mahāmune /
vibho mahāvinaya neyārtha vinayāgra namo 'stu [te

dharmadhātu samaprāpta dharmadhātu tathāga]ta /
vajranātha mahānātha satvarāśi namo 'stu te

mahāprabha mahāloka mahāvīrya mahābala /
ma[hāvīra suvīrāgrya śambhu vīra namo 'stu te]

brahman svayaṃbhū bhagavan śākyavīra mahāmune /
sarvātmaka mune śuddha dharmarāja namo 'stu te

ā[kāśakāya kāyāgrya trikāyākāyabhā]vaka /
sarvakāya mahākāya vajrakāya namo 'stu te

avāca vāca [vācāgrya trivācāvācadarśaka /
sarvavāca] sumahāvāca vajravāca namo 'stu te

acitta citta cittāgrya tricittācittadarśaka /
sarvacitta mahācitta [vajracitta namo 'stu te

avajra vajra va]jrāgrya trivajrāvajraśodhaka /
sarvavajra mahāvajra vajravajra namo 'stu te

sarvavyāpi bhavāgryāgrya su[gatādhipati jaya /
traidhātukamahārāja] vairocana namo 'stu te

nāmāṣṭaśatakaṃśca tadyaḥ kaścicchṛṇuyā sakṛt /
paṭhedvā bhāvayedvāpi [sarvo buddhatvamāpnuyāt

adhyeṣayā]mi tvānnātha sarvasatvahitārthataḥ /
mahākāruṇyamutpādya dharmacakraṃ pravartaye-