Saṃvitsiddhi · Verses 41-60

tathā surāsuranara brahmabrahmāṇḍakoṭayaḥ //

kleśakarmavipākādyair aspṛṣṭasyākhileśituḥ //

jñānādiṣāḍguṇyanidher acintyavibhavasya tāḥ //

viṣṇor vibhūtimahima samudradrapsavipruṣaḥ //

kaḥ khalv aṅgulibhaṅgena samudrān saptasaṅkhyayā //

gaṇayan gaṇayed ūrmi phenabudbudavipruṣaḥ //

yathaika eva savitā na dvitīyo nabhaḥsthale //

ity uktyā na hi sāvitrā niṣidhyante 'tra raśmayaḥ //

yathā pradhānasaṅkhyeya saṅkhyāyāṃ naiva gaṇyate //

saṅkhyā pṛthaksatī tatra saṅkhyeyānyapadārthatvat //

pādo 'sya viśvā bhūtāni tripād asyāmṛtaṃ divi //

iti bruvañ jagat sarvam itthambhāve nyaveśayat //

etāvān asya mahimā tato jyāyastaro hi saḥ //

yatrānyan na vijānāti sa bhūmodaram antaram //

kurute 'sya bhayaṃ vyaktam ityādiśrutayaḥ parāḥ //

meror ivāṇur yasyedaṃ brahmāṇḍam akhilaṃ jagat //

ityādikāḥ samastasya taditthambhāvatāparāḥ //

vācārambhaṇamātraṃ tu jagat sthāvarajaṅgamam //

vikārajātaṃ kūṭasthaṃ mūlakāraṇam eva sat //

ananyat kāraṇāt kāryaṃ pāvakād visphuliṅgavat //