Saṃvitsiddhi · Verses 261-280
avidyā sā kim ekaiva naikā vā tad idaṃ vada //
tadāśrayaś ca saṃsārī tathaiko naika eva vā //
sā ced ekā tataḥ saikā śukasya brahmavidyayā //
pūrvam eva nirasteti vyarthas te muktaye śramaḥ //
syān mataṃ naiva te santi vāmadevaśukādayaḥ //
yadvidyayā nirastatvān nādyāvidyeti codyate //
muktāmuktādibhedo hi kalpito madavidyayā //
dṛśyatvān māmakasvapna dṛśyabhedaprapañcavat //
yat punar brahmavidyātas teṣāṃ muktir abhūd iti //
vākyaṃ tat svāpnamuktyukti yuktyā pratyūhyatām iti //
nanv īdṛśānumānena svāvidyāparikalpitam //
prapañcaṃ sādhayaty anyaḥ kathaṃ pratyucyate tvayā //
tvadavidyānimittatve yo hetus te vivakṣitaḥ //
sa eva hetus tasyāpi bhavet sarvajñasiddhivat //
ity anyonyaviruddhokti vyāhate bhavatāṃ mate //
mukham astīti yatkiṃcit pralapann iva lakṣyase //
yathā ca svāpnamuktyukti sadṛśī tadvimuktigīḥ //
tathaiva bhavato 'pīti vyartho mokṣāya te śramaḥ //
yathā teṣām abhūtaiva purastād ātmavidyayā //
muktir bhūtocyate tadvat parastād ātmavidyayā //
Original text: Saṃvitsiddhi · Edition: Roque Mesquita Wien : Verlag der Oesterreichischen Akademie der Wissenschaften, 1988 · Data entry Somadeva Vasudeva · GRETIL (Göttingen) · CC BY-NC-SA 4.0