Rig Veda · Chapter 9.113

śaryaṇāvati somam indraḥ pibatu vṛtrahā |
balaṁ dadhāna ātmani kariṣyan vīryam mahad indrāyendo pari srava ||

ā pavasva diśām pata ārjīkāt soma mīḍhvaḥ |
ṛtavākena satyena śraddhayā tapasā suta indrāyendo pari srava ||

parjanyavṛddham mahiṣaṁ taṁ sūryasya duhitābharat |
taṁ gandharvāḥ praty agṛbhṇan taṁ some rasam ādadhur indrāyendo pari srava ||

ṛtaṁ vadann ṛtadyumna satyaṁ vadan satyakarman |
śraddhāṁ vadan soma rājan dhātrā soma pariṣkṛta indrāyendo pari srava ||

satyamugrasya bṛhataḥ saṁ sravanti saṁsravāḥ |
saṁ yanti rasino rasāḥ punāno brahmaṇā hara indrāyendo pari srava ||

yatra brahmā pavamāna chandasyā3ṁ vācaṁ vadan |
grāvṇā some mahīyate somenānandaṁ janayann indrāyendo pari srava ||

yatra jyotir ajasraṁ yasmim̐l loke svar hitam |
tasmin māṁ dhehi pavamānāmṛte loke akṣita indrāyendo pari srava ||

yatra rājā vaivasvato yatrāvarodhanaṁ divaḥ |
yatrāmūr yahvatīr āpas tatra mām amṛtaṁ kṛdhīndrāyendo pari srava ||

yatrānukāmaṁ caraṇaṁ trināke tridive divaḥ |
lokā yatra jyotiṣmantas tatra mām amṛtaṁ kṛdhīndrāyendo pari srava ||

yatra kāmā nikāmāś ca yatra bradhnasya viṣṭapam |
svadhā ca yatra tṛptiś ca tatra mām amṛtaṁ kṛdhīndrāyendo pari srava ||

yatrānandāś ca modāś ca mudaḥ pramuda āsate |
kāmasya yatrāptāḥ kāmās tatra mām amṛtaṁ kṛdhīndrāyendo pari srava ||