ઋગ્વેદ · અધ્યાય 9.113

શર્યણાવતિ સોમમ્ ઇન્દ્રઃ પિબતુ વૃત્રહા ।
બલં દધાન આત્મનિ કરિષ્યન્ વીર્યમ્ મહદ્ ઇન્દ્રાયેન્દો પરિ સ્રવ ॥

આ પવસ્વ દિશામ્ પત આર્જીકાત્ સોમ મીઢ્વઃ ।
ઋતવાકેન સત્યેન શ્રદ્ધયા તપસા સુત ઇન્દ્રાયેન્દો પરિ સ્રવ ॥

પર્જન્યવૃદ્ધમ્ મહિષં તં સૂર્યસ્ય દુહિતાભરત્ ।
તં ગન્ધર્વાઃ પ્રત્ય્ અગૃભ્ણન્ તં સોમે રસમ્ આદધુર્ ઇન્દ્રાયેન્દો પરિ સ્રવ ॥

ઋતં વદન્ન્ ઋતદ્યુમ્ન સત્યં વદન્ સત્યકર્મન્ ।
શ્રદ્ધાં વદન્ સોમ રાજન્ ધાત્રા સોમ પરિષ્કૃત ઇન્દ્રાયેન્દો પરિ સ્રવ ॥

સત્યમુગ્રસ્ય બૃહતઃ સં સ્રવન્તિ સંસ્રવાઃ ।
સં યન્તિ રસિનો રસાઃ પુનાનો બ્રહ્મણા હર ઇન્દ્રાયેન્દો પરિ સ્રવ ॥

યત્ર બ્રહ્મા પવમાન છન્દસ્યા3ં વાચં વદન્ ।
ગ્રાવ્ણા સોમે મહીયતે સોમેનાનન્દં જનયન્ન્ ઇન્દ્રાયેન્દો પરિ સ્રવ ॥

યત્ર જ્યોતિર્ અજસ્રં યસ્મિઁલ્ લોકે સ્વર્ હિતમ્ ।
તસ્મિન્ માં ધેહિ પવમાનામૃતે લોકે અક્ષિત ઇન્દ્રાયેન્દો પરિ સ્રવ ॥

યત્ર રાજા વૈવસ્વતો યત્રાવરોધનં દિવઃ ।
યત્રામૂર્ યહ્વતીર્ આપસ્ તત્ર મામ્ અમૃતં કૃધીન્દ્રાયેન્દો પરિ સ્રવ ॥

યત્રાનુકામં ચરણં ત્રિનાકે ત્રિદિવે દિવઃ ।
લોકા યત્ર જ્યોતિષ્મન્તસ્ તત્ર મામ્ અમૃતં કૃધીન્દ્રાયેન્દો પરિ સ્રવ ॥

યત્ર કામા નિકામાશ્ ચ યત્ર બ્રધ્નસ્ય વિષ્ટપમ્ ।
સ્વધા ચ યત્ર તૃપ્તિશ્ ચ તત્ર મામ્ અમૃતં કૃધીન્દ્રાયેન્દો પરિ સ્રવ ॥

યત્રાનન્દાશ્ ચ મોદાશ્ ચ મુદઃ પ્રમુદ આસતે ।
કામસ્ય યત્રાપ્તાઃ કામાસ્ તત્ર મામ્ અમૃતં કૃધીન્દ્રાયેન્દો પરિ સ્રવ ॥