Rig Veda · Chapter 9.102

krāṇā śiśur mahīnāṁ hinvann ṛtasya dīdhitim |
viśvā pari priyā bhuvad adha dvitā ||

upa tritasya pāṣyo3r abhakta yad guhā padam |
yajñasya sapta dhāmabhir adha priyam ||

trīṇi tritasya dhārayā pṛṣṭheṣv erayā rayim |
mimīte asya yojanā vi sukratuḥ ||

jajñānaṁ sapta mātaro vedhām aśāsata śriye |
ayaṁ dhruvo rayīṇāṁ ciketa yat ||

asya vrate sajoṣaso viśve devāso adruhaḥ |
spārhā bhavanti rantayo juṣanta yat ||

yam ī garbham ṛtāvṛdho dṛśe cārum ajījanan |
kavim maṁhiṣṭham adhvare puruspṛham ||

samīcīne abhi tmanā yahvī ṛtasya mātarā |
tanvānā yajñam ānuṣag yad añjate ||

kratvā śukrebhir akṣabhir ṛṇor apa vrajaṁ divaḥ |
hinvann ṛtasya dīdhitim prādhvare ||